Хайдағ даа тоғысты чахсы идерге
30.07.2025
Хабарлар
Идінҷек Ананий Кулогашев (оң саринаң) хада тоғынчатхан харындазы Владислав Канзычаковнаң хада
ПОС КИРЕЕ: асчабыс, тилітчебіс, парыстанчабыс
Идінҷек. Ананий Кулогашев харындастарынаң хада республиканың чуртағҷыларына чарытхы тартарынҷа полызығлар читірче
Пӱӱнгі кӱнде идінҷек чуртағҷылар пос киреен социальнай сетьтер пастыра сабландырарға кӱстенчелер. Пастағы туста андағ оңдайнаң ӧӧнінде ипчі чон тузаланған полза, амды иреннер дее пос киреенеңер чоохтирға чалтанминчалар, кем-де, тізең, пос страницазын, ол кӧстегнең ӧнетін азып, ипти апарып одырча. Андағ идінҷектернің пірсі Ағбанның чуртағҷызы, 36 частығ Ананий Кулогашев полча. Ол ирткен чылда чарытхы тартарынаң палғалыстығ пос киреен асхан. Олох туста соцсетьтерде пос страницазын апарарға чаратхан. Іди алында ВКонтакте социальнай сетьте пос страницазы чох ирен ол киректі тӱзеткен. Че ол пос киреен сабландырарына пастағы ла хаалағ полған. Иң нандырығлығ чардығы – страницаны орта апарарға, искіріг-хабарларны орта тимнеп турарға. Ананий Леонидович туртухпаан, иң пастап, видеоларны суурарынҷа, оларны сығарысха тимнирінҷе ӧнетін ӱгредіг курстарын ирткен. Идінҷектің кӧзідіглері пос киреенеңер ле нимес, ідӧк чуртастаңар суурылчалар. Ӧӧні – кӱлкістіг, хайығ тартчатхан кӧзідіг суур турарға!
– Ананий Леонидович, чоохтап пиріңер, кӧзідіглерге сценарийлерні хайдаң алчазар?
– Мин оларны хайдаң-да албинчам, уламох хобырбинчам. Чыыл парған кӧзідіглернің ӧӧн чардығы чапчаң тӧріп турған. Ӧменең иптіг ле тоғын парчабыс. Мында минің пазымда пір сценарий тӧріп килче, анаң ол наа сағыстарымнаң арғыстарымнаң ӱлесчем. Нинҷе-де тус пазынаң хысха видеолар тимде полча, соонаң олар ол сценарийҷе чыы тартыл парчалар, – ӱлесче идінҷек. – Кӧрігҷілер сағызында ӱрге халар ӱчӱн сағал ӧскіріп алғам. Пастағызын Норильскте ӧскір кӧргем, олаңай ла чи, анаң хырығыбысхам. Соцсетьті апар сыхханда, сағынчам, мині кӧрігҷілер ундутпаан ӱчӱн «фишкаҷах» кирек. Іди мындағ сағал ӧскіріп алғам. Ол сынында пӧгінін толдырча, кізілер сағалымнаң мині тасхар танып салчалар.
Ананий Кулогашевтiң бригадазында ӱс кізі тоғынча. Ӧӧн специалист позы полча. Ананий Леонидович Ағбанда тӧреен-ӧскен, мындох 19 № школаны тоосхан. Пастағы ортын профессия ӱгредиин Хакас политехническай колледжте алған, специальнозы – «Ағас пилетеҷең технолог». Cоонаң тимір чол пастыра хоза машинист полысчызына ӱгренген, андох чарытхынаң танызып алған.
– 2016 чылда мин Ағбаннаң Норильсксер кӧскем. Анда хада хонғанымнаң танызып алғабыс, андох той иткебіс паза тун хызыҷаабыс тӧреен. Мин Норильскте, пір чыл иирдегі курстарға чӧріп, наа квалификация алып алғам: «Электротехник». Пӧзік ӱгредіг аларға пастабысхам, заочно электротехникке ӱгренгем. Аныңох сылтаанда пастап чарытхы тыхтаҷаң техник полып істенгем, анаң мағаа инженер орнын пиргеннер. Істенген предприятие Норильскникельнің шахталарында паза предприятиелерінде чарытхы ӱчӱн нандырчатхан.
Че сигіс чыл Норильскте чуртаан соонаң, 2024 чылда хосхар айында, прай нимебісті – чуртыбысты, тоғызыбысты, анда ӧзер оңдайларны – тасти, сӧбіремнең Ағбанзар айланғабыс. Ӱгредиимні пос кӧңнімнең тохтатхам. Ол туста пістің пір хызыҷах полған, ипчім ікінҷі палаға азах аар полған. Іҷем аар ағырчатханнаңар, аны сыбыра кӧрҷең кізі киректелген, аннаңар мағаа позым позыма ээ полар тоғыс киректелген. Іди мин алынҷа чахығларҷа чарытхы тартарынҷа полызығларны читірерге чаратхам. Пастағы чарлағларны Авито, ВКонтакте пастыра пиргебіс. Мин пілгем, амғы чон социальнай сетьтерде кӧп тус иртірче. Аннаңар ВКонтакте социальнай сеть пастыра пос киреенеңер чоохтирға, искірерге чарадылған, – чоохтаан Ананий Леонидович.
Ирткен чылда кічіг хырлас айында іҷезі, ағыриина сыдаспин, ӱреен. Андада пос алынҷа тоғынарына кирексініс тее чох пол парғанға тӧӧй полған, че ирен пос киреен узарадарға чаратхан. Олох туста сӧбіре Норильсксер айланмасха чарат салған. Ағбан чир-чайааны, киизi хоостыра Норильсктең тың пасхалалча: алтынзархы городта чылның ӧӧн чардығында хар чатчатса, Хакас чирінде айас кӱннер дее кӧп, чир-чайаан даа пай, чыл тустары даа иптіг алызып одырчалар, анзы, тізең, палаларға хазых ӧзерге чахсы полысча.
– Ағбанда промышленность предприятиелері асхынах, аннаңар мин чурт істінде чарытхы тартарынаң айғазарға чаратхам. Пӱӱнгі кӱнде кізілер чуртты наа турада аларға кӱстенчелер, анаң аны пос хынғанни ӧнетін тимнеен проектче иптеп одырчалар. Ол дизайнға килістіре ідӧк чарытхыны тартарға киректелче. Піс, тізең, хайдағ даа проектке чапсынарға тимдебіс: тимде проекттерге, кізі пазындағы ла проекттерге (чаҷынға салылбаан)... – чоохтапча идінҷек ирен.
– Андағ-да сірерні хығырза, стенеде ле розетка алай выключатель хайда поларын кӧзіт пирерге чарир ба? – сурчам мин чарытхы узынаң.
– Іди дее хығырарға чарир, піс кізінің кӧрізінҷе проект тимнеп пирербіс паза прай кирек ниме-нооны, санап, читкіҷе ал пирербіс, тӧбін паанаң тоғынчатхан садығ туралары парох, – чазырбинча идінҷек. – Пӱӱл мин пілістерімні алғыдып алғам, таныстар бригадазынаң хада пір неделяҷа тоғынып, кондиционерлер турғызарға ӱгреніп алғам. Чайғы пасталғаннаң кондиционер турғызарынҷа 20 азыра чахығ толдыр салғабыс. Піс квартира-туралар істінде чарытхы тартарынаң пасха ідӧк чирлерде чарытхы тартчабыс, пасха идінҷектернең тоғынчабыс. Пірееде пісті хазна чӧптезіглерінҷе тыхталчатхан алай пӱдірілчеткен тураларзар полызыға хығырчалар. Оңдайыбыс паза тузыбыс пар полза, хынып ӱндесчебіc. Тиксі Хакасияҷа чӧрчебіс. Абазада кӧп квартиралығ наа тура істінде тоғынғабыс, Асхыссар, Кызлассар паза Пиизер чӧргебіс. Оларның аразында наа даа, иргі дее туралар пар. Пірдең, кізілер килчеткен ӱчӱн хоза даа тӧлирге тимделер. Чахығлар аймах-пасха полча: ӱс розетка турғыс пирерінең пасти чылығ полларға, ибіре чарыпчатхан потолоктарға паза «хыйға тура» устаанҷа тоғынчатхан чарытхаа теере.
Пілдістіг, пос киреен пастир ӱчӱн идінҷекке тиріглерге хорадынарға киліскен. Тиксі алза, Ананий Кулогашевтiң пастағы хорадығлары чӱсче муң салковай полған. Хайығ тартчатхан тиріглернің пірсі – тайах азахтар (ходулялар). Аның полызиинаң пӧзіктегi тоғыстарны толдырарға чарир. Тоғынҷылар стене тӧзіне пасхыс турғыспинчалар, аны ідӧк андар-пеер кӧзір чӧрерге кирек нооза. Ходуляны кизіп алза, кізі кирек синге пӧзік пол парча паза пойли пас чӧрче. Чарытхы тартчатханнарның пасха даа хынығ тиріглері пар. Аннаң пасха идінҷек кӧзідіглер суурарына киректелчеткен тиріглерні алча.
Пу толдыра нимес чыл аразына, хай син Ананий Кулогашев идінҷек чіли тоғын салған, иң сидік хосхар айында полған, ноға-да ол айда чахығлар асхынах кірген. Піди, тізең, тоғыс айныпча, чахығлар тӧреміл кірче. Кізі сурыныснаң сығдыратса, идінҷек ағаа хаҷан аның туразынзар тоғынарға кил поларын паза нинҷе тусха чахиин толдыр поларын чоохтап пирче.
Пӱӱнгі кӱнде хайдағ даа кӧcтегде тоғынҷылар чидіспинче, чахсы пілістіг, нандырығлығ кізілерні таап аларға най сидік. Ананий Кулогашевтiң ӧмезінде харындастары істенче, аннаңар сағам ол тоғынҷыларнаң сидіксініске урунғалах. Че мыннаң мындар паза пір ӧме тӧстирге чарадылза, ол сурығ турыбызарын азынада оңарча. Сағам, тізең, Ананий Леонидович пӱдіріг киреенде удаа тоғасчатхан читпесті позының ӧмезінде хыйа иткен: олар ачығ суғ іспинчелер.
– Мин андағ чарадыға ирткен чылда килгем: тамкы тартпасха, ачығ cуғ іспеске іҷеме сӧс пиргем. Ол тустаң сығара сӧзіме турысчам. Ағаа хоза миннең хада тоғынчатхан харындастарым ідӧк тудынчалар, пістің ол сурыға тӧӧй кӧріс, – тіпче Ананий Кулогашев.
Амғы чуртас прайзын даа посты, пос чайаачызын кӧзідерге, пілістерінең ӱлезерге кӧcтепче. Кізее чапсых, удаа тоғаспинчатхан на кирекнең айғазарға кирек чоғыл. Ӧӧні – пос киреене хынарға, аны прайзынаң чахсы идерге, наа кӧрістер, тиріглер табарға. Ана андағ устар чон хайиин тартчалар. Піс ізенчебіс, Ананий Кулогашев позының ӧмезінең пістің чир-суғҷыларыбысха пос киреен пастирға, соцсетьтерге сығарға, алнынзар тибірирге чахсы кӧзідім полар.
Сом Ананий Кулогашевти
Автор :
Тимнеен Наталья Сюптерекова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
