Олған хирургиязы пӧлиине – 40 чыл
30.07.2025
Хабарлар
Владимир Сагалаков Хакасия пазының алғыстас пічиин алғаннарнаң хада
Имнег кирее. Пӱӱл Хакасияда олған хирургиязының пайрамнығ 40 чылы таныхталған. Ағбандағы аймахтар аразындағы имнег туразы танығлығ чылын С.П.Кадышевтiң адынаң чон чайаачызы кiнiнде иртiрген
Ағбан городтың имнег туразында 1985 чылның чарыс айының пастағы кӱнiнде олған хирургиязының пӧлии азылған. Хырых чыл аразына пӧлiк палаларға паза оларның iҷе-пабаларына киртiнiс паза iзенiс пирчеткен кiнге айлан парған тирге чарир. Анда профессияа прай чӱреенең пирiнген специалисттер тоғынчалар. Олған хирургы хайди даа пӧзiк квалификациялығ специалист поларға кирек, палаларны чахсы сизiнiп, пiлiзерге паза оларның чобағларына айирға, олох туста посты хатығ хылыхтығ тудынарға кирек.
Культура туразының кӧрiгҷiлер залында Ағбан город чуртағҷылары паза имнег тоғынҷылары чыылыс парғаннар. Олған хирургиязы пӧлиинiң тоғынҷыларын пайрамнаң алғыстирға паза сыйыхтар читiрерге республиканың устағ-пастаа килген: Хакасия пазы Валентин Коновалов, Ӧӧркi Чӧп кнезi Сергей Сокол, Хазна Думазының депутады Бадма Башанкаев, Хакасияның хазых хайраллаҷаң министрiнiң орынҷызы Елена Быкова, Ағбандағы аймахтар аразындағы имнег туразының ӧӧн имҷiзi Александр Стреленко паза ӧӧн имҷiнiң хирургия тоғызынҷа орынҷызы Валерий Чочумаков.
– Хакасия правительствозы республика чуртағҷыларына чахсы паза тузында имнег полызии пирiлер ӱчӱн прай кӱзiн салча. Пiс имнег учреждениелерiнде материально-техническай базаны тыытчабыс, имҷiлерге тоғынарға истiг оңдайлар тӧстепчебiс паза наа технологияларны олған имнег учреждениелерiнзер кирчебiс. Имнег учреждениезiнiң ӧӧн пайы ол сiрер, сiрернің пiлiстерiң паза имнег киреене прай чӱреенең пирiнчеткен тоғыстарың полча. Сiрерге оой нимес тоғызыңар ӱчӱн улуғ алғыс. Олған хирургиязы пӧлиинiң тоғынҷыларын пӧлiк тӧстелгеннең 40 чыл толчатханынаң алғыстапчам. Прайзыңарға пик хазых алғапчам, сӧбiреңер часкалығ ползын паза профессияда пӧзiк чидiглерге чидiңер, – чоохтаан Хакасия пазы.
Хакасияның олған хирургиязы пӧлиинiң 40 чылына чарыдып, Хакасия пазы Валентин Коновалов хирургия пӧлииндегiлерге правительство сыйыхтарын читiрген. Олған хирургы Евгений Демченкоға паза улуғ медсестра Наталья Цивелеваа республиканың Аарластығ пiчии читiрiлген. Хакасия пазының алғыстас пiчиине турысханнар: олған хирургы Владимир Сагалаков, улуғ медсестра Нина Шевцова, медсестралар Елена Манько паза Татьяна Постой, воспитатель Татьяна Селезнева.
Чиит хирург Владимир Сагалаков Хакасия пазының алғыстас пiчиин алған. Ол ӱгредиинеңер паза тоғызынаңар хысхаҷахти чоохтаан.
– Мин, Хызылчардағы имнег университедiн тоозыбызып, Ағбандағы перинатальнай кiнзер 2021 чылда тоғысха кiрiп алғам. Иркутсктағы хазна имнег университедiнде ординатураны тоозыбызып, перинатальнай кiнзер олған хирургы поларға айланғам. 2023 чылда минi Ағбандағы олған хирургиязы пӧлиинзер тоғынарға ысханнар, анда Владимир Сбитневтiң устаанынаң iстен парчам.
Имҷiнiң тоғызы уғаа нандырығлығ, уламох хирургтың. Операциялар оой паза ниик полбинчалар, полғаны ла имҷiнiң прай хайиин, сизiгiн кирексiпче. Аннаңар полған на операцияа нандырығлығ хайарға киректелче. 2021 чылда пос алынҷа операцияларны иртiрерге пастаам. Пiске пос пiлiстерiне паза сидiк сурығлар полыбысса, опыттығ хирургтарның хабазиина iзенерге киректелче, – чоохтаан Владимир Николаевич.
Чиит хирург Владимир Сагалаков сӧбiрелiг, хонғаны Светлана реанимациядағы медсестра полча. Олар, Иркутскта ӱгренчеткенде, танызып алғаннар, амды сӧбiренең мында чуртапчалар. Ирепчi Ренат оолғыҷаан ӧскiрче. Светлана паза Владимир iкiнҷiзiн iҷе-паба поларға тимненчелер.
Сергей Сокол Хакасияның Ӧӧркi Чӧбiнiң алғыстас пiчiктерiн хирургия пӧлиинiң турыстығ тоғынҷыларына читiрген.
Михаил Субраков, Сергей Сокол, Константин Алагашев
– 40 чыл – ол муңарлап хайраллап алған чуртастар, алғыстарын читiрчеткен чӱзер сӧбiрелер паза имҷiлернiң тоозылбас махачы тудыныстары. Пӱӱнгi кӱнде хирургия пӧлии тиксi Хакасияның тайаа полча, итсе, ол хонҷых регионнарға даа хабасча. Сiрер, палаларға операцияларны оой иртiрер ӱчӱн, кiзi идiн киспин иртiрiлчеткен операцияларны кирерiнҷе тоғыс апарчазар. Сидiксiнiстер ам даа пар, ахча сурии, имнег тирiглерi паза кадрлар сурии. Уламох хомзындырча, хаҷан чиит специалисттер пасха чирзер тоғынарға парыбысчатханы. Улуғ алғыс ол специалисттерге, кем мында тоғынарға халча, – таныхтаан Сергей Сокол.
Ӧӧркi Чӧптiң алғыстас пiчiктерiне турысханнар: хирургтар Андрей Навалихин паза Константин Алагашев, iдӧк олған хирургиязы пӧлиинiң устағҷызы полған Михаил Субраков.
– Мин Асхыс аймаандағы Паза Пиизi аалда тӧреем. Улуғ класстарда пабамның туңмазы Николай Маркович Каковта чуртаам. Асхыстағы школа-интернатта ӱгренгем. Тайым Асхыстағы имнег туразында хирург полып тоғынған, аның ибiнде имнег киреенең палғалыстығ книгалар кӧп полған. Мин хығырарға хынҷаңмын. Ол книгаларны прай хығыр турҷаңмын. Iди имҷi поларға сабыл чӧрiбiскем. Iдӧк минiң кирi iҷем пала тӧріттiрҷең кiзi полған, аалда прайзы аны полызыға хығырҷаң полған. Аннаң сығара даа ханымда имнег киреене чайалғаным пар полған полар, неке.
Хакасияда олған хирургиязы пӧлии тӧстелген чылда, мин Хызылчардағы хазна имнег институдын олған хирургына тоос салып, Ағбанзар тоғынарға килгем. Пӧлiк азылғаннаң сығара тоғынчам, пӱӱл 40 чыл iстен парирбын. Хырых чыл асхынах нимес, тоғынар кӧңнiм паза кӱзiм ам даа пар, анзы минi ӧрiндiрче, – ӱлескен Константин Алагашев.
Хазна Думазының Аарластығ пiчiктерi ӧӧн имҷiнiң хирургия тоғызынҷа орынҷызы Валерий Чочумаковха паза олған хирургиязы пӧлиинiң устағҷызы Владимир Сбитневке читiрiлгеннер. Хакасияның хазых хайраллаҷаң министерствозының Аарластығ пiчiктерiне медсестралар Юлия Тиникова паза Ольга Топоева турысханнар. Аннаң пасха ӧӧн имҷiнiң адынаң Аарластығ пiчiктер 16 имнег тоғынҷызына читiрiлген. Прай аалҷыларға паза араласчыларға улуғ нимес концерт кӧзiдiлген.
Сомнар Илона Каковани
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
