Сӧбiре часказы ирепчiнiң холында
30.07.2025
Хабарлар
Анатолий Тюкпиековтың паза Зинаида Туниекованың ынағ сӧбірезі
Сӧбiре – чуртас ӧзенi. Ағбанда чуртапчатхан Зинаида Туниекова паза Анатолий Тюкпиеков 2002 чылда танызып алғаннар
Чуртас чоллары
Iди Зинаида Геннадьевна паза Анатолий Николаевич, сӧбiре тӧстеп, кӧп палалығ іҷе-паба пол парғаннар. Амғы туста оларның улуғлары хоныхтығлар, иң кiчии, тiзең, ам даа олған садынзар чӧрче.
Зинаида Туниекова Пии аймаандағы Табат пилтiрi аалда тӧреен-ӧскен, Бондаревтегi школаны тоозып, Ағбандағы музыка колледжiндегi чон чайаачызының пӧлиинде ӱгредiг алған. Хонғаны Анатолий Тюкпиеков Пии аймаандағы Хызыл хара суғ аалдаң. Школа тоозып, каменщик-монтажник паза тимiр хабыстырҷаң ус специальностьтар алған. Ӱгредiг алып, армияа парыбысхан. Ол Чечняда пограничник войскозында служба ирткен.
Танысханы
Ирепчi 2002 чылда танызып алған. Анатолий армия соонаң тоғынчатхан, Зинаида Хакас хазна университедiнiң искусство институдының студентi полған. Хайди танызып алғаннарын сағысха кирiп, чоохтап пирерге сурынғам.
– Пiстi Оля туңмам таныстыр салған. Ол туста пiс туған пиҷелер студенттер полғабыс, хада, пiрiгiп, арендаа квартира суурып чуртаабыс. Мин аар-пеер тың чӧрбинчеткен кiзiбiн, аннаңар туңмам пiстi таныстырарға сағыныбысхан. Анатолий, танызарға килген кiзi, пiсте стол салыбысхан. Мин пансионда хызыл хара суғдағыларнаң хада чуртаам. Олар уйатчыл полғаннар, орыс тiлiнең сала-сула ла чоохтасчаңнар. Анатолийнi андағох тiп сағынғам, че ол саңай пасха полған. Чоох-чаахнаң хынығ одырып алғабыс, аннаң сығара тоғазып пастаабыс, – чоохтаан Зинаида Туниекова.
Зинаиданың пастағы хонығынаң пала пар полған, институтта ӱгренчеткенде, паланы iҷе-пабазы кӧрчеткен. Анатолийнең чағын танызып алған соонаң Зинаида Анастасия хызыҷаанаң таныстыр салған. Хоных хонғанда, cӧбiре пазы аны, пос ла палазына чiли хайып, тӧрт частығдаң сығара ӧскiрген.
Паарға тох палалар
Зинаида Геннадьевнаның паза Анатолий Николаевичтiң сигiс пала. Улии Анастасия сӧбiрелiг, 30 часха чағдапча. Музыка колледжiндегi чон кӧг тирiглерi пӧлиин тоозыбысхан. Хонғаны Аркадий iдӧк кӧп палалығ сӧбiредең. Чииттер ӱс пала ӧскiрчелер – Егорны, Еваны паза Артёмны. Олар ӱр ниместе Катанов аалзар кӧзiбiскеннер. Iкiнҷi хыс Ангелина 2003 чылда тӧреен. Чолда саайға кiр парып, ах чарыхтаң парыбысхан. Сӧбiренi ол чобағ пӱӱнгi кӱнге теере хомзындырча. 2005 чылда Татьяна тӧреен. Сағам iдӧк сӧбiрелiг, хонғаны Максим. Оларның Дима оолғыҷаана пiр час ас парған.
Анаң Николай оол тӧреен, ол 2007 чылдаң, 17 частығ. Коммунальнай хоных паза сервис техникумында сантехник-электрик специальность алып алған. Сағам Николай автомобильліг чӧрерге ӱгренче, кӱскӱзiн армияа парар. Iдӧк спортнаң айғасча. Оларның футбол ойнапчатхан ӧме пар, хайда прай араласчылар пос кӱзiнең аймах марығларға, постары ахча чыып, чӧр килчелер. Халғанҷызын Хызылчарда иртiрiлген марығда аралас килгеннер. Анаң 16 частығ Александр оол парча. Ол, пӱӱл 9 класс тоозыбызып, аймах техникумнарзар пiчiктерiн пир салған. Чайғызына ӱр нимеске тоғыс таап алған.
Саяна 22-ҷi № школада читiнҷi классха сыххан, Тарина олох школада тӧртiнҷi классха парар. Иң кiчии Леонид алты частығ, «Жаворонок» олған садынзар чӧрче.
– Амғы чииттер посха ахча тоғынып аларға кӱстенчелер. Аннаңар тынағ кӱннерде, ӧӧнiнде каникулларда, хайдағ-да тоғыс таап алчалар. Ахчаны постарынаох хоратчалар. Пiр саринаң, анзы чахсы, палалар ахчанаң орта тузаланарға ӱгренчелер, – теен iҷе Зинаида.
Танығлығ сыйых
Иң кiчии тӧреен соонаң Зинаида Геннадьевна Ағбандағы чонға социальнай хабазығ пирҷең устаныссар пiчiктер хоостыра парған. Анда тоғынчатхан специалист Анатолий паза Зинаида ирепчiнi, чахсы пiлiзiп чуртапчатханнаңар паза палаларын чахсы ӧскiрчеткеннеңер, микроавтобус алар тееске турарға хығырған. Олар ГАЗель пирiлчеткеннеңер искеннер, че хайдар айланарын пiлбинчеткеннер.
– Пiстiң Лёня тӧреен соонаң, 2019 чылда, микроавтобусха тееске турыбысхам. Анаң ирткен чылда, арса, пирiбiзерлер тіп сағыс полған. Че пӱӱл ле сiлкер айының халғанҷы кӱннерiнде, сығдырадып, микроавтобус клӱстерi читiрiлерiнеңер искiргеннер. Пiс прай сӧбiренең оңнығ ӧрiнмеебiс. Хонғанымның автомобильнең чӧрҷең правазы чоғыл, минiң дее, аннаңар Николай оолғыбысты ӱгредiп пастаабыс. Транспорт парда, тузаланарыбыс килче. Аннаңар позым даа машиналығ чӧрерге ӱгренерге сағыс тутчам, – сағыстарынаң ӱлескен Зинаида Туниекова.
Сӧбiрелерге «Соболь» маркалығ микроавтобустарның клӱстерiн правительство туразы алнындағы ачыхта ciлкер айының 28-ҷi кӱнiнде читiргеннер. Олох кӱнде Ағбандағы Чиңiс паркында Россияның Пограничник войсколарының 107-ҷi чылына чарыдылған пайрамнығ митинг ирткен. Сӧбiре пазы Анатолий Николаевич пограничник войскозында службазын апарған, аннаңар ол кӱнде iкi дее ӧрiнiстiг пайрам полған.
– Хонғаным Чиңiс паркындағы мероприятие соонаң фуражкалығ, тельняшкалығ паза флагтығ килген. Ол прай даа иреннер чiли чӱреенде патриот полча, прай ооллар армияа парарға киректер тiп санапча. Позы андағ войскода службазын апарғанына поғдархапча, палалар даа пабаларына поғдархапчалар, – сыйыхтас кӱнiн сағысха кирiп, чоохтаан Зинаида Туниекова.
Хазна хабазығлары
Кӧп палалығ сӧбiре кӧрiлген хазна хабазығларынаң чахсы тузаланча, ол полызығлар тузалығ полча. Сӧбiре кӧп квартиралығ турада чуртапча, аннаңар чурт-коммунальнай хоных полызығлары ӱчӱн компенсация алча. Школада ӱгренчеткен палалар анда тикке азыранчалар, че льготалығ ас-тамах тӧлеп чiпчеткен палаларнинаң сала пасхалалчаттыр. Аннаңар iҷе-паба, чиис толдыразынаң полар ӱчӱн, улуғ нимес чардығын тӧлепче. Iдӧк школада ӱгренчеткен палаларға паза iҷе-пабаның пiрсiне город iстiнде автобустығ тикке чӧрҷең талон пирiлче. Палаларға тынағ лагерьлерiнзер чӧрҷең оңдай пар, че iҷе-паба оларны ыспинча. Пiр паланы ысханда, пiр неделя тынанып, ибзер килерге сурынған. Анда тынанарға кӧңнiне кiрбеен, аның соонаң паза паланы ыспааннар. Чайғы тынағ кӱннерiнде палалар аға-ууҷаларынзар тынанарға чӧр килчелер. Хынғанҷа сомып алчалар, чиис пилен полча. Аға-ууҷаларына маллар кӧрерге, хойлар хадар пирерге, хустар азырирға паза ӱӱҷiкте хайынарға полысчалар.
Сӧбiре iдӧк палаларға школаа парарға ручка-тетрадь паза ӱгредiге киректелчеткен пасха даа ниме-ноо аларына тӧлег алча. Пӱӱл пастағызын на школа формазын аларына ахча пирiлер, аның синi 10 муң салковай полар тiп пазылча.
Тынанарға пӧгiннер
Анатолий Тюкпиеков паза Зинаида Туниекова, наа транспорт алып алғанда, прай сӧбiренең Тросин ӱлӱкӱннi тударға аалзар пар килгеннер.
– Минiң Оля туңмам автомобильліг чӧрерге ӱгренiп алған, ол пiстi аалзар тарт пар килген. Пастағы чорых минiң чирiмзер, Табат пилтiрiнзер, полған. Iкiнҷi чорых – хонғанымның ӧскен чирiнзер, Кирбi аалзар. Андар пiстi Анатолийнiң Сергей туңмазы апарған. Тынанарға чӧрерге прайзыбыстың кӧңнiне кiрче, палалар пiрее чирзер пазох парарға сурынчалар. Полған на чорыхха сурынчатпассың нооза, постарыбысха водитель удостоверениезiн алып аларға кирек, – сағыстарынаң ӱлескен Зинаида Туниекова.
Ирепчi пу чағында палыхтап пар килерге сағыс тутча. Сӧбіре пазы Анатолий Тюкпиеков палыхчы нооза.
Сом сӧбiре архивiнең
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
