Кiзi праволарын арачылапчалар
30.07.2025
Хабарлар
Хакасияның ӧӧн приставы, полковник Омак Достай чоох тутча
Чыылығ. Пу кӱннерде Россияның чарғы приставтарының федеральнай службазының Хакас Республикадағы устағ-пастаа пӱӱлгi чарым чылның салтарларынҷа чыылығ иртiрген
Чыылығда приставтар пӧлiктерi устағҷыларынаң пасха Россияның Хакас Республикадағы iстiндегi киректерҷе министрi, полицияның генерал-майоры Владимир Генералов, Хакас Республиканың прокурор орынҷызы Денис Стонт, Россияның Хакас Республикадағы юстиция министерствозының пастых тоғызын толдырчатхан Лилия Винокурова паза пасха даа хазна учреждениелерiнiң устағҷылары араласханнар.
Хакас Республикаҷа чарғы приставтарының федеральнай службазының 2025 чылның пастағы чарым чылындағы тоғыс салтарларынаңар паза iкiнҷi чарым чылға пӧгiннердеңер чоох тутхан Хакас Республиканың ӧӧн чарғы приставы, iстiндегi киректер службазының полковнигi Омак Достай.
Пӱӱлгi пастағы чарым чылда Хакасиядағы чарғы приставтары постарының тоғыстарын аннаң андар тӱзiмнiг апарарға кӱстенгеннер. Оларның тоғыстарына кiрчелер чарғы чарадығларын толдырары, чарғы парчатхан туста хадағ тоғыстарын апарары, хазнаа паза кiзiлерге ӧдiстерiн айландырары, алимент тӧлебинчеткен кiзiлернi, тiлеп, хатығлиры паза пасха даа киректер.
Ӧӧн тоғыстарынаң пасха чарғы приставтары республикадағы халыхтар, культура, спорт паза чонға полызар киректерде тӧремiл араласчалар. Оларның аразында «Чиит правозащитник», «Хрусталь чылтыстары» тиксi Россиядағы марығлар, хайда араласчалар право арачылаҷаң паза пасха хазна органнарында тоғынчатхан кiзiлернiң палалары, iдӧк олған туразындағы, школа-интернатта ӱгренчеткен палалар. Iдӧк пӱӱл тиксi Россиядағы «Иң артых чарғы приставы» марығның пастағы чардығында республикадағы приставтар араласханнар. Имнег тураларына хан пирер киректе (донорлар) тӧремiл полчалар.
Чарғы приставтары пiстiң улуғ хазнабыста полчатхан улуғ киректердең хыйа турбинчалар паза Россия президентi турғысхан пӧгiннернi толдырарға кӱстенчелер.
Iди хазнаа ӧдiстiг полчатхан кiзiлерге чаа службазынаң чӧптезiг идiбiссе, хайдағ праволары пардаңар чарыда чоохтап пирчелер. Ол оңдайнаң пӱӱл андағ ӧдiстiг 244 кiзi контракт чӧптезиинде хол салған. Оларның 35-зі алиментче ӧдiстiг полған. Iди оларның толдырығлығ производстволары тохтадылған паза чох идiлген. Пӱкӱлее алза, пӱӱл СВО-да араласчатхан кiзiлернiң паза оларның ипчiлерiнiң ипотека паза пасха даа кредиттерҷе 107 миллион азыра салковайға ахча суурары тохтадылған. Андағ сурыныс пiчиинең ӧнетiн чаа операциязының 381 кiзiзi паза 61 андағ чааҷының ипчiзi айланғаннар.
Амғы туста кӧп тоғыстарны электроннай оңдайнаң апарчалар. Iди пӱӱл электроннай толдырығлығ документтернең тузаланары 40 процентке ӧс парған.
Чарғы приставтары тоғызына турыстығ кiзiлернi аларға кӱстенчелер. Олар профессия, психология паза физическай саринаң таллағ иртчелер. Приставтар службазының тоғынҷылары республикадағы институттар паза техникумнар тоосчатхан студенттер аразында чарыдығлығ тоғыс апарчалар паза приставтар тоғызынаңар чоохтапчалар. Кӧбiзiн юридическай пiлiстер алчатхан чииттер киректелчелер.
Чыылығ тузында
Приставтарның ӧӧн тоғыстарының пiрсi – чарғы кирее хорғыс чох иртерiн кӧрерi. Чарғы тузында сайбағлар полбазын тiп хадарчалар. Iди пӱӱл чарғы тураларынзар кiрчеткен кiзiлернi сыныхтап, 257 чарабас ниме-ноо iлезiне сығарып алғаннар.
Пӱӱлгі пастағы чарым чыл аразына 305 административнай сайбағ идiлген. Оларның аразында 121 чарғы тузында постарын иптiг тудынминчатхан кiзiлер полғаннар. Iдӧк приставтарның тоғызында паза чарғы киреенде араласчатхан кiзiлернi арачылиры полча. Пӱӱл андағ 1300 cурыныс пiчии кiрген. Iдӧк чарғы чарадиин толдырчатхан приставтар, кӧбiзi анда ипчiлер тоғынчалар, ӧдiстiг кiзiлернiң иблерiнҷе чӧргеннер. Ол кiзiлернiң прайзы ла чарғы приставтарын чалахай удурлабинчалар нооза. Оларны iдӧк пристав-конвоирлер хадар чӧрчелер. Сайбағ иткен кiзiлернiң пiреезi, повестка алып алзалар даа, чарғызар килбин салчалар. Андағ кiзiлернi приставтар иблерiнең чарғызар кӱснең ағыл килчелер. Iди пӱӱл 570 кiзiнi чарғы туразынзар читiргеннер. Пiрееде чарғыдаң тис чӧрчеткен кiзiлернi тiлирге килiсче. Пӱӱл приставтар андағ 14 кiзiнi тудып алғаннар. Пасха хазналардаң чарадығ чох пiстiң республикада чуртапчатхан 9 кiзiнi нандыра ызыбысханнар. Сағам ол саринаң законда хатығлас тыыпча.
Чарғы приставтарының ӧӧн тоғыстарының пiрсiне кiрче толдырығлығ производстволарны толдыразынаң паза тузында иртiр салары, хазна бюджедiне алымнығ ахчаларны пирерi, социальнай киректерге теелчеткен толдырығлығ документтернi толдырары. Пӱӱлгi пастағы чарым чыл аразына андағ 86 муң толдырығлығ производство толдырыл парған. Ахчанаң саназа, ол 1,9 миллиард салковай пол парча. Анзы, пастағы чарым чылнаң тиңнестiрзе, 365 миллион салковайға кӧп пол парча. Iдӧк федеральнай бюджетке 90 миллион салковай пирiл парған. Анзы, пылтырғы пастағы чарым чылнаң тиңнестірзе, 16 миллион салковайға кӧп.
Административнай сайбағлар ӱчӱн штраф ахчаларын приставтарох чыыпчалар. Iди пӱӱл андағ сайбағлар ӱчӱн кiзiлер 33 миллион салковайҷа тӧлеп салғаннар, ол санда 24 миллион салковай Хазна автоинспекция органнарының штраф ахчалары.
Уғаа тӱзiмнiг полча, хаҷан чарғы приставтары ГАИ тоғынҷыларынаң хада, «Чол приставы» аппаратнаң тузаланып, чолдағы чӧрiмнерде араласчалар. Пӱӱлгi пастағы чарым чыл аразына андағ чӧрiмнерде ӧдiстiг кiзiлернiң 10 транспорты 4 миллион салковайға алылған. Андағ сайбағҷыларның кӧбiзi ӧдiс ахчазын табырах тӧлеп салча.
Кiзiлер паза организациялар пасха даа хазна органнарына ӧдiстерiн тӧлебинчелер. Чарғы органнарына 19 миллион салковай штраф ахчазы пирiл парған, налог ахчазын 66 миллион салковайға бюджетке пир салғаннар. Пенсия паза социальнай страхование чыындыларына 2 миллион салковай хос салғаннар. Алимент ахчазын 337 миллион салковайға тӧлеттiргеннер. Чонға тоғыс тапчаң кiн пастыра алимент хоостыра ӧдiстiг 28 кiзi тоғыс тапхан паза 196 кiзi ол кiнде санға турғызылған. Чоохтирға кирек, ӱр ниместе алылған федеральнай закон хоостыра алименттердең тис чӧрчеткен кiзiлердеңер прай интернет-сайттарда пiлiп аларға чарир.
Iдӧк ӧдiзiн тӧлирге хынминчатхан кiзiлернiң ниме-ноозын, кӱснең алып, садыға сығарыбысчалар. Пӱӱл андағ ниме-нооны 451 миллион салковайға алып алғаннар. Тис чӧрчеткен 220 кiзi табылған.
Ӧдiстiг кiзiлер пасха хазналарзар чуртирға алай тынанарға даа пар полбинчалар. Олар, ӧдiстерiн прай тӧлеп салзалар ла, пасха чирлерзер сығып алар праволығлар. Андағ чарадығлар пӱӱл 64 муңа чит парғаннар, ахчанаң саназа, 219 миллион салковайға бюджет ахчазы хозыл парған.
Пiстiң чарғы приставтары спорт марығларында хынып араласчалар. Iди Россияның чарғы приставтарының аразында биатлон спорт кӧрiмiнде чарғы приставтары Олег Сандыков паза Анна Белобородова команда эстафетазында кӱмӱс медальлар утып алғаннар. Чарғы приставтары iдӧк республика синiндегi спорт марығларында араласчалар. Оларны кӧбiзiн «Динамо» спорт пiрiгiзi иртiрче. Iди приставтарның спорт ӧмезi Илбек Ада чаадағы чиңiстiң 80 чылына чарыдылған гирялар кӧдiрер спорт мариинда iкiнҷi орын алған. Марығда Александр Володько алтын медаль, Василий Хартюк кӱмӱс медаль паза Александр Майтаков хола медаль утып алғаннар.
Ӱр ниместе Россияда чарғы приставтары тӧстелгеннең пеер 160 чыл толчатханына чарыдып, Харатас городтағы «Шахтёр» стадионда Хакасияда М.И.Рысиновтың адынаң Спартакиаданың пастағы чардығының таллағлығ спорт марығлары ирткеннер. Марығда республикадағы приставтарның 9 командазы араласхан. Спорт пайрамын асхан Хакас Республиканың ӧӧн приставы Омак Достай.
Спартакиадада 7 спорт кӧрiмi полған: скиппинг, мини-футбол, волейбол, двоеборье, гиря кӧдiрерi паза даа пасхазы. Уғаа хынығ полған ӧмелернiң канат тартысханы.
Iди двоеборье спорт кӧрiмнерiнде пастағы орын алып алған Ағбандағы 1№ приставтар пӧлии. Саяногорск паза Пии аймааның пiрiктiрiлген командазы мини-футболда пастағы орында пол парған. Волейболда чиңiс тутхан Харатас городтың паза Алтай аймааның пiрiктiрiлген командазы.
Пу чыылығның iкiнҷi чардығында 2025 чылның iкiнҷi чарым чылына пӧгiннер кӧрiл парғаннар.
Сомнар Анастасия Соленниковани
Автор :
Илья Топоев
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
