Часкалығ хоных тӧстелген
23.07.2025
Хабарлар
Тагир Бурнаковнаң Татьяна Торбастаева
Той фестивальы. Хакас чиит ирепчi Тагир Бурнаков паза Татьяна Торбастаева хазна синiндегi «Россия. Чӱректернi пiрiктiрiп» II той фестивальында аралас килген
Тиксi хазнаның чииттерi пӱӱл iкiнҷi чылы Москвада пайрамни хоных хончалар. Той фестивальы сӧбiре пiрiктiрчеткен пайрам на нимес, ол Ада чир-суубыста чуртапчатхан чоннарның ынархазын паза аймаан кӧзiтче. Хакас чиит ирепчiнең тоғазып, андар хайди чӧр килгеннеңер паза хайдағ сағыстар халғаннаңар чоохтазып алғабыс.
Пастағызын оларнаң танызып алғабыс. Наа сӧбiре пазы Тагир пурнада сӧс алған:
– Минiң тӧреен чирiм – Асхыс аал, ӧскем Ӱc чул аалда. Школаны Асхыста тоосхам. Тоғыс класс соонаң Харатастағы тағ-пӱдiрiг техникумынзар кiрiбiскем, аны тоозыбысхам. Сағам Шира аймаандағы «Сибзолото» холдингте, тағ мастерi полып, тӧртiнҷi чылы iстен парирбын. Хакас хазна университедiнде хоза ОБЖ ӱгретчiзiне заочно ӱгренчем.
Татьяна Торбастаева Асхыс аалда тӧреен-ӧскен, школа соонаң Новосибирсктегi суғ транспорты хазна университедiнде экономист специальнозын алып алған. Амды Асхыстағы МФЦ-да экономист полып iстен парча.
Чииттер хайди танызып алғаннарынаңар пiлiп аларға чапсых полған. Олар даа хыныстары хайди тамызылғаннаңар хынып ӱлескеннер, пала-пархаларына сӧбiре тӧстелгеннеңер чоохтап пирҷең нимелер пар полар тiп таныхтааннар.
– Пiс Тагирнең 2020 чылда пiр оолны армияа ӱдесчеткен иирде танызып алғабыс. Анда чоохтасханда, пiлдiстiг пол парған – пiс 5 класстаң 9 классха теере тиң класстарда ӱгрентiрбiс. Че удур-тӧдiр сизiнмеҷең полғабыс. Аның соонда телефоннаң палғалысхабыс, че хатабох чоллар хыйыс парғаннар. Анаң iкi чыл пазынаң мин ағаа смс пазыбысхам, Хызылчарзар пар килерге хығырғам. Андар пар килiп, удур-тӧдiр уламох тың хайығ салғабыс, тусты хада иртiрерге хынығ пiлдiр парған. Аннаң сығара палғалыс тыыған. Полған на тоғазығда Тагирнiң хылии кӧңнiме кiрҷең. Минзер хайди хайчатханы, чооғымны хайди ситкiп исчеткенi паза минiң хылиимны оңарчатханы чӱрееме чатхан. Ол сын ирен, хаҷан даа мағаа пик чӧлег полча, – чоохты узаратхан Татьяна Торбастаева.
«Татьянаның холын пастағызын алып алғанда, чӱреемҷе чылығ ойлап парыбысхан», – теен Тагир. Чағын танызып алғанда, аның чалахай кӧңнiн сизiнген.
– Татьяна ӧкер, сылағай паза кiзее хайди кӧңнiн кӧдiр пирерiн сизiнче паза чахсы арғыс полча. Сыннаң чоохтаза, мин аннаң чағын танызып алғанымдох, ол минiң чамдығым тiп сағын салғам. Пiр чыл чарым тоғасхан соонда, хоных хонып, сӧбiре тӧстирге чӧптирге сағыныбысхам. Наа чылда ирге парарға хығырғам, – теен Тагир Бурнаков.
Чииттер Наа чылны Татьянаның iҷе-пабазынаң хада удурлааннар. Анаң Асхыстағы парксар салют кӧрерге парғаннар. Тагир Татьянаны салют тузында ирге парарға хығырарға сағынтыр, че ол чыл салют позыдылбиндыр. Хайди сағысха кирген оол, азынада чоохтанҷаң чооғын тимнеп салған, че анда, тiзең, сағыссыраанына сӧстерiн ундут салтыр. Ол, тiзекке турып, пурба сыйлап, ирге хығырған. Татьяна ынабысхан.
Олар Асхыстағы ЗАГС-сар хоныхтарын санға турғызарға пiчiктерiн пир салғаннар. ЗАГС тоғынҷылары, оларға сығдырадып, Москвада иртчеткен «Россия. Чӱректернi пiрiктiрiп» II той фестивальына парар кӧңнiлiглернiң мариинда аралазарға хығырғаннар. Тагирнең Татьяна хайди танысханнарын паза нименең айғасчатханнарын прай пас салғаннар. Марығда утып, Москвазар парарға тимненгеннер. Оларға хоныхтарын санға алар пайрамға хайди даа амғы тустағы кӧгенектерiн хакас оңдайлығ ит саларға киректелген. Чииттер андағ кӧгенектернi тiкчең устарға чахып салғаннар.
Тагирнең Татьяна Москвазар Сӧбiре, кӧӧленiс паза киртiнiс кӱнiнде иртен самолеттығ учух килгеннер. Оларны анда ӧнетiн кiзi удурлаан, анаң «Москва-Сити» отельзер апар салған. Пастағы кӱнде чииттер тынанып, пайрамнығ хоных хонарына тимненгеннер паза хазнаның ӧӧн городынҷа чӧрiп алғаннар. Тиксi Россия синiндегi той фестивальында аймах-пасха регионнардаң килген 200 азыра чиит ирепчi араласхан.
– Фестивальның пастағы кӱнiнде 151 чиит ирепчi хоных хонған, пiс iкiнҷi кӱнiнде, 9 отта, хонғабыс. Ол кӱн асхынах кiзi полғабыс, 55 ирепчi. Иртен пiссер визажист килген, ол чазанарға паза тимненерге полысхан. Анаң сомҷы, килiп, аймах-пасха ӧкер орыннарда сомға суурған. Фестиваль программазы хоостыра пiс Москва суғҷа теплоходтығ парғабыс. Анда даа пiстi сомға уғаа кӧп суурғаннар, хабарҷылар пiснең чоохтасханнар. Москва суғҷа парчатханда, пiске анда стол салылған. Анда пiс ДНР-даң килген чиит ирепчiнең танызып алғабыс. Чоохтазар тус чох таа полған, че хайдаң паза хайди килгеннерiн сурастырып алғабыс. Теплоходтаң сығып, «Национальнай центр» орынзар чол тутхабыс. Пайрамнығ чӧрiсте пiснең хада аймахти чазанған кiзiлер парғаннар: барабанщиктер, теелбек салчатханнар паза даа пасха матырлар полған. Прайзы чалахай кӧңнiлiг паза ӧрчiлiг полған, іди парчатханда, чӱрек талбырапчатхан. Илееде кiзi чыылысхан, сомға сыбыра суурғаннар. Пiстiң сағызыбыста піди хоных хонғаны хаҷанға даа халар, – кӧңнiнең ӱлескен Татьяна Торбастаева.
Москвада ол кӱннерде тың iзiг полтыр, анзы хомай полған тiп ӱлескеннер чииттер. Амды олар мында, туған-чағыннарынаң хада ӧрiнiстерiнең ӱлезiп, орғах айында той саларлар.
Татьяна паза Тагир Хызылчарзар тынанарға пар килген соонаң удаа чорыхтарға чӧр сыхханнар. Олар ӧткiн тынанарға хынадырлар. Чир-суубыстың аймах тынағ базаларында, музейлерiнде, ӧкер паза танығлығ орыннарында пол килгеннер. Хайди таныхтаан Татьяна, аны Тагир аймах чапсых чирлерзер ал чӧрче.
– Пiс «Ергаки» тынағ базазынзар чайғызын даа, хысхызын даа чӧр килчебiс. Анда уғаа сіліг. Хысхызын саналығ алай сноубордтығ чылчабыс. Ӧткiн тынанарға кӧңнiбiске кiрче, чыларға хынып чӧрчебiс. Саналығ чылҷаң тус чит килзе, iдӧк «Гладенькая», «Сюгеш» тынағ базаларынзар чит пар килчебiс. Аннаң пасха, пiс Татьянанаң хада чир-суубыстың аймах танығлығ орыннарынзар чит пар килгебiс. Оғлах тағларынзар, Сойан-Сус ГЭС-сар паза Шира, Пiлӧ, Пуланнығ кӧллерде тынан килгебiс. Iдӧк Хызылчарзар чӧр килчебiс.
Пiс, Москвадағы фестивальдаң айлан киліп, кип-азаабысты ла кир салып, «Томичка» тынағ базазынзар парыбысхабыс. Пастағы кӱн тынанып алғабыс, андартын кимелiг Ах Ӱӱс суғҷа ингебiс. Ӱзiнҷi кӱнiнде пiс Ӧбекелер чолынзар экскурсияа чӧргебiс. Анда чахсы тынанып алғабыс, – чооғын тоосхан Тагир Бурнаков.
Чиит ирепчiнің тиксi хазна синiндегi «Россия.Чӱректернi пiрiктiрiп» II той фестивальында араласханы сағыстарында хаҷанға даа халар. Хайди фестивальда араласханын паза хайди анда тус иртiргенiн сағысха кирiп, пала-пархаларына чоохтап турарлар тееннер Татьянанаң Тагир. Ағаа хоза, чииттернiң сӧбiрезiнде пастағы кибiр тӧстелген – чыл сай хоных хонған кӱнде Москвазар чӧр турарға. Анда олар, танығлығ кӱннi сағысха кирiп, чӧрген орыннарҷа хатап пар кил турарлар.
Сом чиит ирепчінің архивінең
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
