Кемнiң узы артых
16.07.2025
Хабарлар
Дмитрий Мамышев
Хазна хабазии. СВО ветераннарына олаңай чуртасха кӧнiгiп аларында ӱлгӱ саринаң аймах-пасха полызығлар пирiлче. Ол санда тузалығ марығлар иртiрiлче
Тиксi Россия синiндегi «Чир-суубыс арачылағҷылары» чыындының Хакасиядағы пӧлии СВО ветераннарын сыбыра хайығда тутча, оларға полызығ пирерге харасча. Iди пу наада пiстiң республикада чуртапчатхан СВО ветераннары Дмитрий Мамышев паза Каадыр Монгалбии Хазан городта пастағызын на иртер «Абилимпикс» чемпионатта аралазарға парардаңар чарадығ алылған. Ол 25 – 29 отта иртердеңер чарлалған.
Пу чемпионат Россия президентi Владимир Путиннiң чарадии хоостыра иртiрiлче. Аның ӧӧн пӧгiнi – СВО ветераннарына наа тоғыс оңдайларына кӧнiгерi. Аны тимнирiнде паза иртiрерiнде пастағҷы полчалар Россияның просвещение министерствозы паза Россияның «Чир-суубыс арачылағҷылары» хазна фонды. Оларға ӧӧн полызығ пирче Россия правительствозы.
«Абилимпикс» профессиональнай мастерствоҷа хазна чемпионады тоғыс пирчеткеннернiң паза эксперттернiң хайиин матап тартча. Пу олаңай ла иртiрiлчеткен марығ нимес. Аның араласчылары – СВО ветераннары. Олар кӧнiк парғаннар пик сындырлығ поларға, хайдағ даа чахығны чахсы толдырарға паза сыбыра чиңiске кӱстенерге. Аннаңар «Абилимпикс» марығ ӧнетiн чаа операциязының ветераннарына постарының пик хылыхтарын, хайдағ даа тоғысты толдырчатса, чалтырама чидiглерге чидер оңдайларны маңат кӧзiт пирер орын полча. Че иң не ӧӧнi – Россияны мыннаң мындар тилiдерi. Аннаңар чемпионат тузында чалтырама кӧзiдiмнер полары сала даа iкiнҷiлес ағылбинча», – таныхтаан Россияның Арачыланыс министрiнiң орынҷызы, «Чир-суубыс арачылағҷылары» хазна чыындызының кнезi Анна Цивилева.
«Абилимпикс» марығ Хазандағы вертолёт заводы» АО-ның ӱгредiг-тоғынҷаң мастерскойларында иртерi кӧрiлче. СВО ветераннары постарының устарын 15 аймах номинацияҷа сынирлар: наа технологиялар сағын табары, пилот чох дроннарның операторы полары, сомға суурары, автомобильлернi тыхтиры, ағаста киртерi, сарын сарниры паза даа пасхазы.
«Чир-суубыс арачылағҷылары» хазна чыындызының Хакасиядағы пӧлиинiң устағҷызы Оксана Трусова «Абилимпикс» марығны уғаа пӧзiк паалапча. «Анда араласчатхан чир-суғҷыларыбыстың кӧңнiлерiн кӧдiрiп, оларға хабазарға кирекпiс. Олар анда аймах-пасха наа тоғыстарның оңдайларын пiлiп аларлар паза кӧрiстерiн алғыдарлар. Пiс оларның ӱчӱн поғдархапчабыс, чахсы кӧзiдiмнерге чидерге алғапчабыс», – теен ол.
Чемпионатта араласхан, маңат чидiглерге читкен иң артых 75 кiзi азах меетке сығар. Анаң оларның аразында пу чылның чарыс айында арға-мӧрiй иртер. «Абилимпикс» чемпионаттың чиңiсчiлерiне хазнабыстың иң артых предприятиелерiнде стажировка иртер оңдай пирiлерi таныхталча. Олар анда тоғыс пирчеткеннернiң хайиин тартары iдӧк тее пiлдiстiг.
«СВО ветераннары аразында иртiрiлер национальнай марығ чаа махачыларына хайығ cалчатханын паза полызар оңдайлар табарға харасчатханын кӧзiдер. Анзын Россия президентi Владимир Путин сыбыра таныхтапча», – чоохтапча Россия правительствозының кнес орынҷызы Дмитрий Чернышенко.
Сом «Чир-суубыс арачылағҷылары» чыындының пресс-службазыни
Автор :
Елизавета Гончарова, «Чир-суубыс арачылағҷылары» хазна чыындызының Хакасиядағы пӧлии устағҷызының орынҷызы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
