Ӱлгӱ. 14 кiзiнiң аразында спорт министрiн табарлар. 

Пу кӱннерде Хакасияның правительствозында спорт миниcтрiн табарынҷа комиссияның тоғызы узарадылған. Сыныхтағны алты кiзi ирткен:

– Сергей Дьяконов – ниик атлетикаҷа Россияның cпорт узы, волейболҷа cпорт узына кандидат. Амғы туста Сибирьдегi федеральнай университеттiң «Радуга» кӧп оңдайлығ комплекстiң администрация-спорт пӧлиинiң устағҷызы;

– Саяна Казыгашева – боксча Россияның чоннар аразындағы класстығ спорт узы, тренер;

– Елена Краснова – Олимп резервi училищезiнiң (техникумының) директоры. 2021-2024 чылларда Хакасияның спорт министрiнiң орынҷызы полып iстенген;

– Андрей Шулбаев – 2019-2024 чылларда Хакасияның кiзi праволарынҷа уполномоченнай полған. Пӱӱнгi кӱнде позына тоғыс таапчатхан кiзi;

– Виктор Таскараков – самбоҷа СССР-ның спорт узы, Хакасияның физическай культуразының паза спортының саблығ тоғынҷызы, тренер. Харбас кӧрiмнерiнiң олимп резервiнiң спорт школазында iстенче;

– Надежда Чепсарова – Сустағы хус ӧскiрҷең фабриканың ветеринары, тӧрт чыл спорт организациязынаң устаан.

Iкi кiзi – Денис Кокояков паза Василий Таланов – чыылыға кил полбаан. Олар командировкаа парыбысханнар. Пу iкi кандидатты комиссия заочно ӱзӱрген. Чир-суғҷыларыбысты комиссия араласчылары чахсы таныпчаттырлар. Денис Кокояков – каратеҷе Россияның спорт узы, Ағбандағы харбазығлар спорт школазында улуғ ӱгретчi-тренер полча. Василий Таланов – CВО араласчызы. Ол гиря кӧдiрерiнең айғастыр. 2007 – 2020 чылларда Шира аймааның культураҷа, чииттер киреенҷе, спортча паза туризмҷе устааның пастығы полған. 2023 чылға теере Шира аал чӧбiнең устаан.

Комиссияның тоғызы олох оңдайнаң парған. Кандидаттар, пiрердең кiрiп, постарынаңар искiргеннер паза сурығларға нандырғаннар. Сынны чоохтаза, прайзын ахча сурии сағыссыратча. Хайдағ даа сферада хорадығлар кӧп нооза. Хакасияның культура министерствозы, гранттар мариинда аралазып, федеральнай бюджеттең ахча кирiп алчаттыр. Спорт ведомствозы аннаң махтан полбас. Итсе, спонсорларнаң тоғыс апарылча. Хайди пастағы чыылығда искiрген министрнiң тоғызын толдырчатхан Дмитрий Сафронов, министерство, спонсорларнаң тоғынып, «Ӧбекелер ойыннары» турнирнi иртiрерiне 800 муң салковай чыып алған. Iдӧк спорт кӱрезiнҷе федерацияны таныхтирға кирек. Халых пiрiгiзi Вадим Топоевтiң устаанынаң Президенттiң гранттар фондының мариинда тӧремiл араласча. Утхан ахчаа федерация ӱзiнҷi чылы изере «Таңдағы чуртас ӱчӱн харбас» проекттi чуртасха кирче. Ол аалдағы палаларға кӧрiлген.

Пу чағында комиссия, халғанҷы хати чыылызып, прай кандидаттарны пазох ӱзӱрер. Пӧзiк устығ эксперттернең чӧптескен соонда Хакасия пазы Валентин Коновалов кемнi спорт министрiне турғызарға чарадығ алар.

Сом Илона Каковани