Пресс-конференция. Хакасияҷа МВД-да республиканың Хазна автоинспекциязының устаа пресс-конференция иртiрген.

Мероприятие «Таңдағы чуртазыңнаң уста» социальнай кампания пасталчатханына чарыдылған. Аны Хазна автоинспекциязы иртiрче, че ағаа прай министерство-ведомстволар хозыларға киректер. Чӧрiм хоостыра чазы читкелектерге орамаларда, чолларда хорғыс полдыртпазына кӧстелчеткен профилактика мероприятиелерi иртiрiлер.

Пресс-конференцияда араласханнар Хакасияҷа МВД-ның Хазна автоинспекциязы пастығының тоғызын толдырчатхан, полиция полковнигi Владислав Лапутин, Хакасияның пала праволарынҷа уполномоченнайы Ирина Ауль, Хакасияның чииттер правительствозы кнезiнiң орынҷызы Дарья Якубенко паза Хакасияҷа МВД-ның Хазна автоинспекциязының пропаганда пӧлиинiң пастығы Ирина Дельхман.

Хайди искiрген полиция полковнигi Владислав Лапутин, «Таңдағы чуртазыңнаң уста» социальнай кампания 8 оттаң сығара 30 ӱртӱнге теере иртiрiлер. Аның пӧгiнi – олғаннарны, прай чазы читкелектернi орамаларда, чолларда саайларға кирбес профилактика тоғызын апарары. Чайғыда олғаннар велосипедтiг, мопедтiг, самокаттығ, мотоцикллiг дее кӧп ойлат чӧрчелер. Пу кӱнге республикада чазы читкелектер араласхан 34 саай пол парған (пылтыр пуох туста – 40). Ол саайлар полғанының 14-iнде чазы читкелектер постары пыролығ полғаннар. Олар, кӧрiл парған правилоларға тудынмин, саайланғаннар.

Социальнай кампания иртiрерiнде волонтёрлар аралазарлар, СМИ-лар аны чарыдарлар, профилактика чоохтазығларын ӱгредiг, спорт, культура министерстволарының тоғынҷылары апарары кӧрiлче. Iдӧк мындағ кирекке палаларның паба-iҷелерi тартылар. Профилактика тоғызы городтағы паза городтар тастындағы олған лагерьлерiнде апарылар.

Ирина Аульның чооғынаң, прайзы хада-пiрге тудынып, профилактика тоғызын апарза, чахсы салтарға килербiс. Пала позының прай хаалағлары ӱчӱн нандыр полбинча, хомзынысха, олар саайға кiр парчалар. Аннаңар оларнаң чолларда сизiктiг полардаңар, правилоларға тудынардаңар сыбыра чоохтазығлар апарарға кирек.

Дарья Якубенко таныхтаан: «Чолларзар мопедтер, байктар, бигбайктар кӧптең кӧп ле сыхчалар. Пiрееде гаражтарда пос идiп алған транспорттығ даа чолзар сых килчелер. Чонда чазы читкелектерге мындағ аймах транспорттығ чӧрерге чаратпастаңар чоох-чаах парча. Пiлерге кирек, палаларға мопедтернi, мотоцикллернi, электросамокаттарны паба-iҷелерi постары ал пирчелер. Олар палалары саайға кiр парарын оңарбинча поларлар ба? Палалары тутырза, паба-iҷелер нандырығ тударлар нооза. Пiстiң кӧрiзiбiс – паба-iҷелернiң нандыриин кӧдiрерi, андағ тоғысха хайығ салары.

Пiс электроннай листовка тимнеп алғабыс, анда паба-iҷелернiң нандыриинаңар искiрiг пирiлче, уголовнай нандырығ тударына теере. Чииттер правительствозы паба-iҷелерге лекциялар тимнепче, пастағы лекция, кӱскӱ пасталчатса, иртiрiлер. Iдӧк брошюра тимнелче, оларны садығ тураларынҷа тарадарбыс. Садығҷылар хайди ағаа хайарлар, анзы кӧрiнер. Закон сығарар пастағнаң Ӧӧркi Чӧпсер айланар сағыс пар. Андағ пастағнаң Хакасия пазынзар айланарбыс. Транспорт министерствозынзар айланарбыс, олар чоллардағы сайбағлардаңар ГАИ-зар социальнай сетьтерҷе искiрзiннер. Iдӧк хада-пiрге тоғызыбыс чахсы салтарға ағыларына iзенербiс».

Ирина Дельхманның чооғынаң, волонтёрлар чайғыда от-орғахта парктарда, скверлерде профилактика тоғызын апарарлар, ӱртӱнде – школаларда. Пу тоғысха прай ведомстволар тартылар.

Сом Хакасияның Хазна автоинспекциязының ВКонтакте страницазынаң алылған