Хумартхылас. Чукотка автоном округында чир-суғҷыбыс Россия Матыры Аймир Миягашевке хумартхы чарды азыбысханнар.

Гвардияның ефрейторы Аймир Евгеньевич Миягашев Россия армиязында контрактча чааҷы службазын ирткен. Ол Россияның Тирiглiг кӱcтерiнiң войсколар частьтарының пiрсiнде связь ротазындағы ӧменiң улуғ радист-разведчигi полған. Украинада Харьков облазының Изюм аймаандағы аалларның пiрсiнде, ӧнетiн чаа операциязының пӧгiннерiн толдырчадып, 27 сiлкерде 2022 чылда чир-суғҷыбыс матыр чiли чуртазын пир салған. Чаалазығ парчатхан туста Аймир, ыырҷы тастаан граната ӱстӱне чадыбызып, позының чуртазын пирiп, хада служба иртчеткен арғыстарын ал халған. Ағаа 26 час полған...

Чааҷы службазын толдырчадып, сындырлығ паза матыр хылиин кӧзiткен ӱчӱн, Россия президентi Владимир Путиннiң Указынаң пiстiң чир-суғҷыбыс Аймир Миягашевке Россия Федерациязының Матыры иң пӧзiк ат пирiлген (ӱреен соонда).

– Аймирнiң ады Ада чир-суубыстың матыр тархынына хаҷанға даа кирiл парған! Аны пiс хаҷан даа ундубаспыс, ол олаңай оол полған, чуртирға тың сағынған, чағыннарына хынған, хоных хонып, сӧбiре тӧстеп аларға сағыс тутхан... Че кирек туста ол тӧдiр пазынмаан, позының чуртазын пирiп, чаалазығдағы арғыстарын ал халған! Амғы ӧсчеткен тӧлге Аймир махачыланыстың кӧзiдiмi пол парған, пiс позыбыс саринаң матырдаңар хумартхыласты хайраллирын узарадарға прай ниме идербiс, – теен Россияның чаа-тархын пiрiгiзiнiң региондағы пӧлиинiң кнезi, Хакасияның культура министрi Светлана Окольникова.

Аймирдеңер хумартхылас аның кiчiг чир-суунда, Хакасияда, хаҷанға даа хайраллалча: республиканың ӧӧн городының вокзалы алнындағы ачыхта ағаа хола бюст турғызылған, Таштып аймааның Аңчул аалындағы школаның стенезiнде Россияның чаа-тархын пiрiгiзi хумартхы чарды турғыс салған.

Ӱс частығ полғанда, Аймир паба-iҷезiнең хада Чукотка автоном округынзар кӧс парыбысхан. Андағы Эгвекинот посёлокта тиксi ӱгредiглiг школаны тоосхан. Пу кӱннерде ӱгредiг заведениезiнде Россия Матыры Аймир Миягашевке хумартхы чарды азылчатханына чарыдылған мероприятие ирткен.

– Пiс Аймирнең поғдархапчабыс паза аның махачы тудынызында хаҷан даа iкiнҷiлебеебiс. Амғы туста матырлардаңар паза ӧнетiн чаа операциязы араласчыларынаңар хумартхыласты хайраллиры улам кирек полча. Олар пiстiң алнындағы амыр чуртазыбыс ӱчӱн, нацизм паза фашизм чох амыр чуртас ӱчӱн чуртастарын пир салчалар. Пiстiң ӧӧн кӱзiбiс – ол хумартхылас. Хумартхыластың ӧлiмi чоғыл... Аймирдеңер хумартхылас пiстiң чӱреебiсте ле, пiстiң сӧбiребiсте ле нимес, ол Эгвекинотта, чуртағҷылар паза школа ӱгренҷiлерi аразында чуртир, хайзында Аймир пастағы класстаң он пiр классты тоосханҷа ӱгренген. Мин алғызым читiрчем Россияның чаа-тархын пiрiгiзiне пу хумартхы чардыны тӧстеен ӱчӱн, Хакасияның культура министерствозына паза алынҷа Светлана Анатольевна Окольниковаа пiстiң матыр оолғыбыстаңар хумартхыласты хайраллир киректе чахсы хабасхан ӱчӱн! – чоохтаан Аймирнiң iҷезi Елена Миягашева.

Россия Матырының паба-iҷезi ӧткiн кӧрiстiг полып халчалар: олар «Аймир Миягашевтiң» полызығлығ чыындызын тӧстеп алғаннар, хайзы пiстiң чаа­ҷыларыбысха – Хакасиядаң паза Чукотка автоном округынаң СВО араласчыларына – полысча.

– Ӱр ниместе ле пiс «Хакас» солалығ чааҷаа iкi радиотахта аларға 164 муң салковай чыып алғабыс. Пiс прай киректердең хыйа тур халбинчабыс, позыбыс ит полар прай нимелернi идерге кӱстенчебiс. Мин iзенчем, пiс хада-пiрге тудынып ла ыырҷыны чиңiп аларбыс, – теен Елена Миягашева. «Аймир Миягашевтiң» полызығлығ чыындызының тоғызынаңар пiлiп аларға чарир официальнай телеграм-каналда.

Сом r-19.ru сайттаң