Суғ хазындағы ӱлӱкӱннiң ӧңнiг сырлары
04.07.2025
Хабарлар
Автоквестте 3-ҷі орын алған Матвеевтер сӧбірезін Таштып аал чӧбі пазы сыйыхтапча
Чииттер кӱнi. Таштып аалда пу ӱлӱкӱнге чонны Суғ хазы адалчатхан орынзар хығырғаннар
Ол ачыхта чайғы туста аал пайрамнары, концерттер иртчелер. 19 час иирде Суғ хазында чон толдыра чыыл парған. Ӱлӱкӱнге Таштып аалның на нимес, аймахтың пасха даа аалларының чуртағҷылары килгеннер.
Чиит iҷе-пабаларның кӧбiзi, аарсынмин, палаларынаң хада килтiр. Оларға аймах батуттар тоғынған, тадылығ нимелер, ойнаҷахтар садылған, улуғларға – сiстеен ит, аймах чистек сӱзӱннерi, пасха даа чиистер. Суғ хазында киме оңдайынаң олған площадказы пӱдiрiлген, анда кiчiг олғаннарға ойнирға уғаа чахсы. Iдӧк 19 частаң 20 часха теере палаларға марығлар, ойыннар иртiрiлген, прайзына – пос холынаң иткен ниме-ноо кӧзiдии, аймах-пасха мастер-класстар. Сомға суурынҷаң пiр орынны Таштыптағы чииттер постары ӧңнiг сырларнаң хоостааннар. Паза чон аразынзар «абаны» позыдыбысханнар, ол «цыганканаң» хада пас чӧрген, анзы пастырған кiзее, карталарҷа кӧрiп, ухаанҷыластар тимнеен.
Уғаа хынығ полған, хаҷан кӧрiгҷiлер алнынзар Таштып аал чӧбi пазы Рустам Салимов паза Таштып аймаа депутаттар чӧбi кнезi Георгий Тодинов сых килгеннер. Олар ӧткiн пираттар кип-азаана чазан салғаннар! Ойын хоостыра пастыхтар Таштыптағы чииттернi ӱлӱкӱннең алғыстааннар. Анаң азынада иртiрiлген автоквест чиңiсчiлерiн алғыстас пiчiктерiнең сыйыхтааннар. Ӱзiнҷi орын алғаннарға сыйыхха 10 литр бензин сыйлалған, iкiнҷi орын ӱчӱн – 20 литр бензин, пастағы орын ӱчӱн – 30 литр бензин. Iдӧк чон алнынзар халыхтарның орындағы пос устаныстары аразындағы волейбол марии призерлары сыхханнар, оларны даа чеестееннер, сыйыхтааннар. Пӱӱл марығда 4 команда араласхан.
Саарбахтар, ӧңніг сырларнаң ойнап, чайаачыларын кӧзітчелер
Ӱлӱкӱн хыызында сценаа «КрышЫ» рок-группа сых килген. Ӧткiн пис оол поп-рок, альтернативнай рок, блюз-рок жанрларны толдырча. Оларның «хазыр» сарыннары кӧрiгҷiлернiң кӧңнiне уғаа кiрген! Хайдағ-да ортын частығ ир кiзi, аның хыринда турчатхан палаҷахтарны хада плесет саларға хығырып, сах андох плесет сал сыххан.
Харасхы пол парғанда, концерт чарытхы шоузынаң тоозылған, прай саринда ӧңнiг чарытхы сустары сіліг чайылғаннар. Анаң Таштыптағы саарбах-чииттерге дискотека иртiрiлген, ол 23 часха теере полған.
Сомнар авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
