Алылған законға вето салылған
04.07.2025
Хабарлар
Кӱн сурии. Хакасия пазы Валентин Коновалов, вето правозынаң тузаланып, республиканың Ӧӧркi Чӧбi орындағы пос устаныс реформазынаңар алған законны хыйа идiбiскен
Чоох парча «О территориальной организации местного самоуправления в Республике Хакасия» законнаңар, хайзынаң депутаттар посёлок чӧптерiн паза ааллардағы кӧнi табығларны чох идiбiзерге сағыс тутханнар. Аның ӱчӱн Ӧӧркi Чӧп 19 хандыхта ӱн пирген.
Регион устағҷызы аның алнында даа пу сурығҷа позының кӧрiзiн таныхтап турған. Аның чооғынаң, депутаттар законны мындағ кӧрiмде аларға маңзырабысханнар, чарадығ чахсы тимнелбеен полған. Ол республика чонының ӱлгӱзер айланар оңдайын хызырча, аал чуртағҷыларының кӧбiзiнiң кӧрiзiн санға албин алылған.
Амды закон Ӧӧркi Чӧпсер читiре тоғыныбызарға ызылған. Аны ысчатхан пiчiкте кизекти таныхталча: закон алылчатханда, аны орындағы пос устаныс органнарынаң пiр чӧпке килер турғызыл парған оңдайнаң тузаланмааннар паза чоннаң аны ӱзӱрбееннер, ағаа киректелер хорадығлар кӧзiдiлбинче, аны чуртасха кирчетсе, бюджеттiң, хоных-устағ, социальнай салтарлары чахсы iстезiлбееннер. Ӧӧркi Чӧп депутаттарының кӧбiзi республика чуртағҷыларының кӧрiзiн санға албаан, хайзылары орындағы пос устаныстың ам тоғынчатхан iкi синнiг системазын артызар ӱчӱн турысчатханнар.
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
