«Ол минің інегім, мин аны сағам...»
02.07.2025
Хабарлар
Идінҷек Андрей Чаптыков – ікі садығ туразының ээзі
Идінҷек. Пӱӱн піс садығ киреенде пос киреенең айғасчатхан идінҷек Андрей Чаптыковнаң чоохтасчабыс
– Андрей Алексеевич, чоохтап пиріңер, хайда тӧреезер паза ӧскезер?
– Мин Ағбанда тӧреем, 3№ школаны тоосхам, анаң политехническай институтта ӱгренгем. 1996 чылда «Промышленно-гражданское строительство» специальность алғам. Iҷем Алла Георгиевна Чаптыкова, Райковтар хызы, национальнай гимназияда англия тілі ӱгретчізі полған, пабам Алексей Авдеевич Чаптыков чуртазы тооза башеннай краннарның инженер-пӱдірігҷізі полып тоғын салған. УМ-17 предприятиеде тоғынған.
Институт соонаң армияа пар килгем. Айланғанда, гаражсар парғам, анда хада ӱгренген арғызыма тоғас парғам. Ол мині тура істі-тастын иптеҷең ниме-ноо садығҷызы тоғызына хығырған. Ол туста ахча садығ киреенде ле полҷаң. Аннаңар мин, наа ла сӧбіре тӧстеп алған кізі, садығҷы тоғызына ынабысхам. Пілдістіг, іҷе-пабам анзынаң чараспаан. Оларға пӧзік ӱгредіг аарлығ полған...
Iди мин «Премьер» садығ туразында тоғынып пастаам. «Тіріг ахча» кӧргем. Аннаңар тура тасты-істін иптир ниме-ноо садиинда 1998 чылдаң тоғын парирбын. Пастап садығҷы полғам, анаң садығ туразына ниме-ноо садызып пастаам. 2005 чылда «Джем» садығ туразынзар парыбысхам. Iди читі чыл «Премьерде», читі чыл «Джемде» тоғынғам. 2012 чылда мин тоғыстаң саназыбысхам. Пос кӧңнінең сурыныс пічиин пас салғам. Андада поставкалар пӧлии пастығы полғам.
– Сірер садығ киреенде тоғысча ӧскезер. Ноға тоғыстаң саназарға паза пос киреен пастирға чарадыбысхазар?
– 2012 чылда улуғ хырласта тоғыстаң саназыбысхам. Аның алнында, тізең, позымның пастағы квартирамны алып алғам. Тыхтағ тоғыстарын пастабысханда, чахсы пӱдіріг ниме-ноозын таап аларынҷа, ол тоғыстарны нандырығлығ, ізестіг толдырҷаң устарны табарынҷа сидіксініcтерге урунғам. Аннаңар тыхтағ тоғызы пілдірте сӧӧ тартыл парыбысхан. Анзы минің кӧңніме пір дее кірбеен.
Тоғыстаң парыбысханда, мин олаңай чуртағҷыларға чахсы ниме-ноо аларға истіг оңдайлар тӧстирінеңер, тыхтағ тоғыстарын толдырҷаң сынағ иртібіскен устарны таап аларынаңар сағыныбысхам, кем тоғысты тузында идер, тиспес, ахчалығ чітпес...
2013 чылда кӱрген айында идінҷек чіли санға турғам. Ол тустаң сығара, пос садығ туразын азып, тура істі-тастын иптирінҷе пӱдіріг ниме-ноозы садиинаң айғазып пастаам. Пастағы офис Ағбан городта Жуковтың орамазында республика ипподромының пір пазындағы ікі хадыллығ турада 10 квадраттығ метр пӧлікте орныххан. Аны садығ туразы даа тіп полбассың, ол кабинетке тӧӧй полған. Анда ламинат аймаан садыға сығарғам. Аны мағаа поставщиктер тикке пиргеннер. Мин интернетнең чахсы тоғынып пілгем, сайттар позым итчеңмін. «Ламинат19.rғ» сайт тӧстеп, ниме-ноо садызар кізілерні тілеҷеңмін. Клиенттер килҷеңнер паза тӧбін пааларны кӧрҷеңнер. Минің хорадығлар кӧп полбаан, аннаңар ниме-ноо паазы аарлығ полбаан. Пӧлікті суурарына айда алты муң салковай хоратчаңмын. Мин маркетингнең, клиенттер хайиин тартып аларынаң айғазарға хынҷаңмын. Ағырин-кӧӧлҷе азахха турып алғам.
– Кізілер ӧӧнінде хайди сағынчалар, идінҷек іҷе-пабазының киреен узаратча алай 1990 чылларда «кӧдірініп алған», алай ізестіг ӧзенніг полған...
– Минің іҷе-пабам олаңай тоғынҷылар полған: іҷем – ӱгретчі, пабам – инженер. Ол минің кӧңнім, пӧгінім полған, кізілерге тыхтағ тоғыстарының сидік сурығларын пӧгерге полыс пирерге. Аның сылтаанда клиенттернің хайиин тартчатхан оңдайларнаң тирең танызып пастаам, ол пілістерімні алғыдып одырғам. Салтарында ол пос киреемні кӧдірерге чахсы полысхан.
– Пу чыллар аразына сірер пірее пӧгіннер хайди даа турғысхан поларзар, кӧңніңернең не алнынзар хаалабаан поларзар?
– Пола-пола оңар сыххам: чуртаста пірее нимее чидінерге сағынзаң, син хайынарға кирексің, ниме поларынаңар сағынмасха, пулуттарда учух чӧрерге кирек чоғыл, хайынарға, идерге кирек!
Пірсінде чуртазымда мындағ кирек полған: минің чахсы сағыс полған, че ікі чыл аны чуртасха кирбин чӧргем, ол сағыстаңар тӧреміл сағынғам. Хаҷан, тізең, мин позыма теем: «Андрей, сағынарға чидер, идіп паста!» Телефоным алып, сығдыратхам, олох айда 30-ча муң салковай тоғынып алғам. Мин андада «Джемде» тоғынчатхам. Iди хоза ахча тоғынып пастаам. Андадох оңар cыххам, хыймыранарға, идерге кирек! Пӧгін чох син хаҷан даа пір дее нимее чидінмессің, хаҷан пӧгін пар, чол таныхтал парған, син парчазың, итчезің, салтар пар. «Полбас ниме полар!» – минің паза пір хынған хыйғым.
– Сірернің соцсетьте пос страницазында садығ киректерінеңер чоохтарың хынығ пазылых полча. Хығырығҷы хайиин тартча...
– Ол маркетинг оңдайы. Ол олаңай садығдаңар нимес, хайда садығҷы алнында ниме-ноо паза аның паазы пар.
Алында, кӧзідімге, мин пір садығ туразынзар тоғысха кіріп алғанымда, мындағ кирек полған: андар ікі ӧңніг кафель ағыл килгеннер, аны нинҷе-де ле кӱнге садызып алғаннар. Чырғалда ниме-ноо чох полғаннаңар ла! Андада тоғыс іди тӧстелген: ниме-ноо пір-ікі ле садыл парҷаң. Амды ниме-ноо толдыра, мының алнындағы чіли тоғын полбассың. Ниме-ноонаң орта таныстырарға, кӧзідерге, клиенттер хайиин тартарға кирек. Андағ тиріглернің пірсі – клиенттернің полған киректерін чоохтирға. Мин ағаа хайығ салғам, сыныхтаам, тоғыс оңдайларын кӧргем. Ол позының тӱзімніг полчатханын кӧзіткен, аннаңар мин аннаң хынып тузаланчам.
Прай нимені пасхазына тӧӧй нимес идерге кӱстенчем. Прайзы іди итчетсе – іди итпеске кӱстенчем, анда мин артыхпын, мин дее чох, анда ітклесчелер. Аннаңар телевидениезер, радиозар рекламанаң парбинчам, пастағызынаң ала амға теере сайтнаң на тоғынчам. Сайт пастыра реклама паза соцсетьтерде тоғынчам, «сарафан радиозына» ізенгем, че пасха чирзер чӧрбеем. Чуртағҷылар пісті пасхазына чӧптир ӱчӱн, пасхазында чох, кізі кӧңніне кірчеткен, чахсы ниме-нооны ағыларға кӱстенчебіс. Ол минің ӧӧн кӧстеем полча.
– Сірер, пос киреен азып, иң пастағызын чырғалдағы кирексіністерге тудынчазар, чуртағҷыларның кӧңнін толдырарға кӱстенчезер. Олох туста полған на сай наа оңдайларны сыныхтап, тузалан турчазар, я?
– Хайди даа, че полған на сай хаҷан даа полбаан ниме пол парча. Идінҷектернің хорылыстарын санға аларға кирек ле. Пӱӱнгі кӱнде чырғалда ниме полары пілдізі чоғыл. Ниме-нооға кирексініс тӱсче, идінҷектер, кемнең мин чоохтасчам, садығ парбинча тіпчелер. Че анзына тимдебін дее тібеспін, мин хайди поларын пілчем, аннаңар хайынчам. Кӧбізі пілбинче, холларын пос салыныбысчалар, ниме итпин, одыр салчалар. Че ол пазох ла іди поларға кирек: кӱзі чохтар чырғалдаң парчалар, кӱстіглері халчалар. Кем тоғыс оңдайларын оңар полбаан, оларға чырғалдаң парарға килісче.
– Пос чырғалында сірер позыңарны хайди кӧрчезер?
– Мин позымны чахсы кӧрчем. Кем хайди тоғынчатханын, кем нименең тынчатханын пілчем, оларның кӱстіг паза уйан сариларын пілчем. Минің мыннаң мындар тиліс кӧстеем пар, тоғыс оңдайларыма киртінчем, олар салтар пирчелер. Ол чох пастағы чылындох чабыл парарҷыхпын. Пӱӱн, тізең, пос киреенең 12 чыл айғас салып, мындағ салтарға килгем: нинҷе экономика кризизін иртчем, ол сингеӧк кӱстіг, хыйға паза ырах кӧрістіг полып одырчам.
Пу наада Хызылдағы садығ туразында садығлар тӱс парған. Аннаңар, андар позым парып, тоғысты иптеем. Алызығлар пар. Ам, салтарларны кӧріп, ӧрін парчам.
– Минің кӧрізімнең, пос киреен тӧстирін таллаза, садығ кирее иң оой паза парыстығ пілдірче. Орта сағынчам ма?
– Мының алнында сынында андағ полған. Амды тоғынҷаң тиріглерні пілчетсе, ноға чарабас садығ киреен таллирға? Кӧзідімге, минде тоғынған иң артых садығҷылар, пос киреен азып, конкурентім полыбысханнар. Пу тусха теере кем парған, оларның пірдеезі чабылбаан. Анзы минің пос киреем пӱдізі сынында кӱстіг полчатханынаңар паза чахсы сарилары парынаңар чоохтапча. Аннаңар пілчезің хайди тоғынарға – пос киреен ас. Олох туста олар минің конкуренттерім полчалар. Мында ӧӧні орта «анымҷохтазарға». Кемнең хада мин ынағ халғам, олар, кӧзідімге, хонҷых городсар кӧзе халғаннар, наа кӧстег таллап алғаннар алай минің садиима харығ полбинчалар тирбіс. Олар улуғлирға паза алғыстирға пілчелер. Iдӧк, минің кӧрізімнең, мин пирген піліснең тузаланып, хомай тудынчатханнар пар. Iди минде тоғынған пір тоғынҷы садығ туразын минің садығ турамнаң тоғыра азып алған. Андағ кізіні хайди улуғлирзың? Піс кӱресчебіс...
Пір саринаң, компанияда полған на тоғынҷы ӧзерге кирек. Ол ӧспезе, компания даа ӧспинче. Мин тоғынҷаа аны хайди даа читірчем, ол ноға читіре тоғынминчатханын позы кӧріп, пілерге кирек. Че ол ӧспинчетсе, мин аннаң анымҷохтасчам. Пілдістіг, анзын прайзы ла піл полбинча... Мин анзын сын кирекке санапчам.
Паза пір кирексініс – компания адын турыстыра синде тутханы. Аны сайбаан ӱчӱн компания хатығлапча. Тоғынҷылар аннаңар пілчелер.
Минің орным – ол Ағбан городтағы Кравченко орамазында 11-ҷі тура. Ол хуруғ турчатхан ӱртӱн орыннарын позым кӧдіріп алғам. 2014 чылда отха пастырчатхан пулуңаста садығ турамны асханда, анда минің не машинам турҷаң. Аның ӱчӱн іди тың сағыссырапчам. Мин прайзына тіпчем: «Ол минің інегім, мин аны сағам...» (кӱлініп ала, таныхтаан Андрей. – Авт.).
Кӧбізі, минің кӱрезиимні кӧріп, тіпчелер: «Ноға син позыңа конкуренттерні ӧскіріп алғазың?» Мин анзын ӧнетін итпеем нооза. Аннаңар мин позымнаң пір орында турбасха, алнынзар хаалирға киректепчем! Пір орында турыбыссамох, олар азах табаныма пазып пастирлар...
– Сірер килкім пӱдіріг предприятиелерiнең тоғынчазар ба?
– Чох, пӱӱнгі кӱнде олаңай чуртағҷыларнаң на тоғынчам. Ноға? Олар иң алғыстығ клиенттер, махтирлар, читпестерге хайығ айландырарлар. Кӧңнілеріне кірбезең – аар айланып, оортах пастыра халарлар. Полған на парыбысхан чуртағҷыны айландырып аларға кӱстенмессің, сылтағларны сурағластырбассың. Сананыстарҷа, парыбысхан клиент ортымахти пис чыл пазынаң на айланча. Аннаң хада, тізең, син инвестициялар чардығын чідірчезің. Килкім клиенттернең тоғынар кӧңнім пар, ол ідӧк ӧзер оңдай. Оптнаң тоғынып пілерге кирек, аннаңар мин ол кӧстегнең ағырин-кӧӧлҷе танызып одырчам.
– Сірернің сӧбіре пар теезер?
– Я, мин ипчілігбін, оол палалығбыс, ол студент, программистке ӱгренче, 4-ҷі курста. Ӱгренче чахсы. Хазии уйаннаңар ырахтын ӱгренче.
– Сірер, идінҷек полып, позыңарға отпуск алчазар ба?
– Отпуск – уғаа кирек ниме. Хараа-кӱнӧрте тынағ чох тоғынғанын хомай тіп санапчам. Кізі табырах «кӧй парча». Сірернің отпуск чох полза, сірер саба итчезер тіп сағынчам.
– Хайди тынанарға хынчазар?
– Піс сӧбіренең чорыхтарға чӧрерге хынчабыс. 2009 чылда пастағызын на Таиландсар пар килгебіс, ол тустаң сығара пасха хазналарҷа, Россияҷа чӧрерге хынчабыс. Ағаа хоза мин анда пос кирее хайди тоғынчатханын кӧріп алчам. Хайдағ акциялар иртірчелер, хайди сатчалар? Ноға пістің паа ла, паза ниме чоғыл? Кӧзідімге, пірсінде орындағы садығ туразынзар сланцы аларға кіргем, аны алып алғанда, мағаа пазағы ниме-ноо аларына купон пирчелер. Мин, тынанарға килген кізі, хайдаң кӧрчем, хаҷан паза килербін. Тіпчем, амох пірее ниме алып алим. Іди мин ипчіме сумка ал пиргем, пазох купон пирчелер, ам, хур алып, паза мағаа купон пирбеңер теем. Iди сланцы ла аларға парған кізі садығ туразынаң ол туста мағаа киректелбеен сумкалығ паза хурлығ сыххам. Итсе, мин чахсы пілгем, нимее оларға пу купоннар. Iди мин позымның садығ туразында аймах-пасха акциялар иртір сыххам.
– Сірернің полға тӧзирге пірее ниме алза, аны тикке тӧзеп пирерінҷе акция пар ба?
– Я, пастағызынаң ала тоғынча. Піснең хада сыбыра тоғынчатхан устар пар, акция улуғ кирексініснең тузаланча. Аннаң піс пасхалалчабыс.
Ам пістің обойларға акция тоғынча: пизінҷі рулон тикке. Акция чарлалған кӱндӧк кізі килзе, мин ӧрінчем. Ол тоғынчатханын киречілепче.
Мында сурығ орта садарынаңар даа нимес, мында ӧӧні – клиенттернің хайиин орта тартып аларынаңар. Кізілер кӧрчелер, оларның кӧңніне кірче!
– Пос киреен наа ла пастапчатхан идінҷектерге хайдағ чӧп пирерҷіксер?
– Чӧп пір ле – артых сурығлар чох ит. Сайттар идерге позымох ӱгреніп алғам. «Кирек? Позың идерге ӱгреніп ал» – мындағ хыйғыға тудынчам. Ӱгренчезің, істесчезің. Салтар кирек полза, син чапчаң идібізерге кӱстенерзің. Уғаа чахсы, иптіг ит саларынаңар сағынмассың даа. Сайтта пу чылларға кӧп ниме чыыл парған, че хатығластар кирілген ӱчӱн, мағаа сайт ӧзенін алыстырарға киліскен. Мин 10 муң страница, 630 ӱндезіг чідір салғам. Iди мин иргі сайттаң кӧп ниме айландыр полбаам. Пӱӱнгі кӱнде піс сайттаң пасха Яндексте страница апарчабыс, 2Gis картада тоғынчабыс. Ӱндезіглер – тоғынчатхан тиріг.
Сом Дмитрий Сунчугашевти
Автор :
Чоохтасхан Наталья Сюптерекова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
