Сiрер – Хакасияның таңдағызы
02.07.2025
Хабарлар
Республика пазы Валентин Коновалов, «Хакасияның алтын ізенізі» медальға турысхан Дмитрий Сунчугашев, Алина Миягашева, Карина Мамышева паза Радмила Топоева
Танығлығ кӱн. Н.Ф.Катановтың адынаң Хакас национальнай гимназияда 11 класс тоосханнарға аттестаттар читiргеннер
Пӱӱл пу ӱгредiг организациязын 67 оол-хыс тоосхан. Оларның аразында «Хакасияның алтын iзенiзi» медальға тӧрт ӱгренҷi турысхан: Дмитрий Сунчугашев, Радмила Топоева, Карина Мамышева паза Алина Миягашева. Олар хазна сыныхтағларын пӧзiк балларға тудыбысханнар, ӱгренчеткен туста олимпиадаларда, чайаачы паза спорт марығларында пӧзiк чидiглерге читкеннер.
Дмитрий Сунчугашев Ағбан пилтiрi аалдаң, гимназияның интернадында чуртаан. Математикаҷа ЕГЭ-ны чиит оол «5» паалаға тудыбысхан, орыс тiлiнең iдӧк чахсы – 94 баллға! Аннаң пасха Дмитрий химия паза биология предметтерҷе сыныхтағлар тутхан. Анда ол 99 паза 91 баллар алған!
– Балларым пiлiп алғанымда, матап ӧрiн парғам. Пу салтарлар мағаа таллап алған специальностьха ӱгренерге кiрiп алар оңдай пирерлер. Мин имнег киреенҷе парарға сағыс тутчам. Сибирьдегi вузтар кӱстiглер, андар пiчiктерiм пирерге пӧгiнчем, – ӧрiнiзiн чазырбинча Дмитрий Сунчугашев.
Гимназияны тоосхан 20 азыра пала кӱстенiзi ӱчӱн «За особые успехи в учении» I паза II cтепеньнiг медальлар алғаннар.
Хакас тiлi ӱгретчiзi Татьяна Казанаева пӱӱл тӧртiнҷi хати олғаннарны улуғ чолға сығарча. Гимназияда аның холынаң тиксi 100-че пала сыххан.
– Мин сығарған олғаннарның полғаны ла минiң чӱреемде. Олар ӧрiнчетселер, пӧзiк чидiглерге читчетселер, мин дее оларнаң хада ӧрiнчем, хомзынчатсалар, хадох хомзынып одырчам. Мин сығарғаннарның кӧбiзi Хакасиязар айланчатханы чӧпсiндiрче.
Гимназиянаң пӱӱл анымҷохтасчатхан клазымда, тiзең, iдӧк хыйға, кӱстенҷiк олғаннар. Пiрдеезiнiң аттестатта «3» паалағ чоғыл. Класстың чарымызы даа алтын паза кӱмӱс медальлар алған. Мин оларға азых чол алғапчам, пӧзiк чидiглерге читсiннер, чӱректерi азых ползын, пасха чон аразында, туртухпин, пик пазыстығ ползыннар. Пiстiң гимназиябысты, чоныбысты ундутпазыннар, – таныхтаан класс устағҷызы Татьяна Фёдоровна.
Гимназияны тоосчатхан ӱгренҷiлернi Хакасия пазы Валентин Коновалов алғыстаан:
– Аарлығ чииттер, сiрернiң алныңарда улуғ чол – ол чуртас адалча. Анда кӧп ниме сiрернi сахтапча. Iкiнҷiлебинчем, сiрер тоғысха кӱс, iзестiг кiзi пол парарзар, улуғ пӧгiннер турғызарға хорыхпассар паза оларға чидерге кӱстенерзер. Сiрернiң полғаны ла чӱреене чатчатхан тоғыс таап алзын паза пӧзiк чидiглерге читсiн. Хаҷан даа пiлiңер, сiрер Хакасияның таңдағызызар, аның пайы паза поғдархазы!
Танығлығ кӱнде Хакасияның ӱгредiг паза наука министрiнiң орынҷызы Елена Конева, гимназия директоры Лилия Ахпашева iдӧк ӱгренҷiлерге чидiглерге чидерге алғааннар, гимназияны ундутпасха сизiндiргеннер.
Сом Илона Каковани
Автор :
Оксана Котюбеева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
