«Хакасия матырлары» проект чуртасха кирiлче
02.07.2025
Хабарлар
Чыылығда «Восток» штурм бригадазының хирургия службазының пастығы, халых чӧбi кнезiнiң орынҷызы Игорь Арчимаев чоох тутча
Чыылығ. Хакасия пазы Валентин Коновалов «Хакасия матырлары» республика проектiне иртiрiлген таллағ салтарларына чарыдылған халых чӧбiнiң чыылиин иртiрген
Хайди искiрген Валентин Коновалов, Россия президентi Владимир Путиннiң чахиинҷа тӧстелген «Матырлар тузы» федеральнай программа хоостыра хазнаның прай регионнарында паза экономиканың пасха даа сфераларында ӧнетiн чаа операциязы араласчылары паза ветераннары санынаң устағҷылар тимнир проект чуртасха кирiлче. Ол федеральнай программа хоостыра республикада «Хакасия матырлары» проект пӱӱл азығ айында тоғызын пастаан. Анда ӧнетiн чаа операциязы зоназынаң айланчатхан чааҷылар араласчалар. Проектте аралазарға прай 80 азыра сурыныс пiчии кiрген. Таллағ мероприятиелерi кизекти апарылған соонда, анда ам 19 кiзi халған. Пӱӱн пiс пастағызын «Хакасия матырлары» республика проектiне таллағ салтарларын кӧрер халых чӧбiнiң чыылиин иртiрчебiс.
Анаң чыылығда программаа таллағ салтарларынаңар паза таллалған араласчылар санынаңар чоох тутхан «Хакасия матырлары» проектте аралазар кандидаттарны паалирынҷа эксперт, Хакасия пазы паза Хакасия правительствозы аппарадының хазна службазы паза кадрлар департаментiнiң устағҷызы Наталья Романова. Аның чооғынаң, проектте аралазарға позыдылчалар СВО араласчылары паза ветераннары, олар пӧзiк ӱгредiглiг, кiзiлернең устаан опыды пар паза чарғаа тартылбаан поларға киректер. Позыдылбинчатханның ӧӧн сылтағлары: сын нимес, тайма искiрiглер пирiлгенi, чарғаа тартылғаны паза пасха даа андағ танығлар. Тиң арах кӧзiдiмнер полза, пастағы теесте алылчалар устағ тоғызында иң пӧзiк кӧзiдiмнер кӧзiтчеткен кiзiлер, ӧнетiн чаа операциязындағы пӧзiк чидiглерi.
Проектте аралазарға сурыныс пiчiктерiн пастап 30 кӧрiкке теере пирерге кирек полған, соонаң ол тус узарадылған, анаң хоза анкетирование иртiрiлген. Пастағы чардыхта 80 кiзi сурыныснаң айланған, 17 – 19 хосхарда iкiнҷi чардых иртiрiлген. Анда кандидаттар тест ирткеннер, аны прайзы ирт полбаан. 12 – 15 сiлкерде ӱзiнҷi сыныхтағ иртiрiлгенде, 65 кiзi халған. Сыныхтағны прай кандидаттар иртпееннер, СВО-да ол туста чааласчатхан араласчылар сыныхтағ чох иртiрiлгеннер. Сiлкерде паза хандыхта 32 ветеран чоохтазығда араласхан. Хандыхта халғанҷы сыныхтағлар апарылған соонаң материаллар право хайраллаҷаң органнарзар ызылған. Анда хайдағ кiзiлер устағ тоғызына чарапчатханын кӧргеннер, аның салтарында 19 кiзi халған. Олар ам кадрлар резервiнде полчалар. Салтарында пу халған кiзiлер пӱӱл 1 ӱртӱннең ХГУ-да пiр чыл ӱгренерлер, оларға, ӱгредiгнi тоосса, хазна паза муниципальнай устағ специальнозынҷа дипломнар пирiлер.
Чыылығда iдӧк халых чӧбi кнезiнiң орынҷызы (аның кнезi Хакасия пазы полча), «Восток» штурм бригадазының хирургия службазының пастығы Игорь Арчимаев чыылығ араласчыларын азынада Республика кӱнiнең паза Чаалазығлар ветераны кӱнiнең алғыстаан. Хайди ол таныхтаан, СВО зоназынаң чааҷылар кӧптең кӧп ибзер айланчалар. Ыырҷылар оларны пастағы теесте чох идерге кӱстенчелер, андағ пӧгiннең аймах провокациялар итчелер. Республикада мындағ программа пары паза ол тоғынчатханын кӧрерге ӧрiнiстiг. Андар иң турыстығлар табылғаннар.
Проектке кiрiп алғаннарның ӱгредiг программазынаңар искiрген ХГУ-ның кадрларның квалификациязын кӧдiрер пасха даа специализацияа тимнир институдының директоры Татьяна Толмашова. Аның чооғынаң, пӱӱл 1 ӱртӱннең ӱгредiг пасталар, ағаа 114 час пирiлче. Кандидаттар хазна паза муниципальнай устағ специалисттерiне ӱгренерлер. Ӱгредiг оңдайлары очнай, заочнай, iдӧк ырахтын ӱгренерi полар. Тӧрт модульҷа ӱгренерi кӧрiлче. Пастағызы – теория паза практика; iкiнҷiзi – экономика паза финанстар (региондағы системаа тӧстенiп); ӱзiнҷiзi – хазна паза муниципальнай устағ (хазна ӱлгӱ органнарының системазы аралазар). Пу модульда диплом тоғыстарын тимнирлер, ӱгренчеткен полған на кiзiнiң алынҷа кӧстегҷiзi полар. Тӧртiнҷi модульда амғы наа технологияларнаң тоғыста тузаланарға ӱгренерлер (хазна ӱлгӱ устаанда, МФЦ офистерiнде). Iдӧк пу халғанҷы чардыхта диплом тоғыстарын арачылирлар. Ӱзiнҷi паза тӧртiнҷi модульларда проект араласчыларына министерство-ведомстволарның устағҷылары, специалисттерi чахсы хабазарлар. Ӱгредiг иртерi ниик полбас, иртеннең иирге теере ӱгренерге килiзер, пiреезi ырахтын, СВО зоназынаң даа ӱгредiг иртер.
Хайди таныхтаан, чооғын тоозып, Татьяна Михайловна, прай 19 кiзi, чiдiрiг чох, ӱгредiгнi маңнаныстығ иртiп аларына iзенербiс.
Чыылығның iкiнҷi чардығы СМИ-лар чох апарылған.
Сом Илона Каковани
Автор :
Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
