Алтын медальларның пызыңназы
02.07.2025
Хабарлар
Наталья Пудова пастағызын на Россия чемпионы полыбысты
Спорт. Россия чемпионадында Наталья Малышеванаң Наталья Пудова чиңіс тутханнар
Москвада 25-26 хандыхта ипчілер кӱрезінҷе Россия чемпионады ирткен. Анда 100 артиинаң абахай спортсмен узын сынаан. Хыстар 33 регионның алнын алғаннар. Арға-мӧрійде араласханнар Хакасияның кӱресчілері Наталья Пудова (50 кг) паза Наталья Малышева (53 кг). Ікізі дее ізестіг спортсмен. Халғанҷы чидіглердеңер чоохтаза, Пудова пӱӱл Европа первенствозында алтын медаль холға кирген. Малышева Европа чемпионадында ӱзінҷізі полыбысхан. Амды кирек хайди парыбызар ни?
«Ағырчатхан» улус тиктең чӱрексіптiр. Хакас хыстар пастағох кӱнде финалға сых парыбысханнар. Наташа Пудова марығның 1/8 чардығында Алдынай Даржааны (Тува) чиңіп алған, азах мееттің 1/4 чардығында – Дарима Санжиеваны (Бурятия). Чарым финалда пістің Наташа Ольга Рехметуллованаң (Чувашия) тоғасхан. Чир-суғҷыбыс, «ыырҷызын» 5:0 саннаң утчадып, аны учаландырыбысхан. Итсе, азах меетте Тӧӧ чирінең сыххан спортсменге хатығ чуххан. Ол Елизавета Смирнованаң тоғасхан. Смирнова 2000 чылдаң, аның тӧреен-ӧскен чирі – Чувашия. Пір туста Хакасия ӱчӱн харбастырох. Пӱӱнгі кӱнде Дагестанның командазына кірче. Ікі хысха тоғазығ сидік ирткен. Салтарында, пик хуйахтығ Наташа 7:6 саннаң чиңіп алған. Пудованың узы ӧсче. Пылтыр ол Россия чемпионадында, пастағызын на кӱс сынап, хола медаль утхан, амды Наташа – чемпион. Ӧріністіг.
Наталья Малышева пазох чиңіснең ӧріндірді
Наталья Малышева кибісте айағ пілбинчеткен машинаа тӧӧй. Пӱӱл Россия чемпионадында ол ідӧк тудынған. 25 хандыхта Наташа соон сӱрістіре Миллена Виноградованы (Дагестан), Надежда Матвееваны (Москва) паза Венера Нафикованы (Санкт-Петербург) чиңіп алған. Финалда, тізең, пазох Анжелика Ветошкинанаң (Санкт-Петербург) тоғасхан. Наташанаң Анжелика тӧреміл чиңіс ӱчӱн харбасчалар. Спортсменнернің кӱстері тиң, харбазығ хазыр парча. Санны асхан Ветошкина. Малышева тӧдір пазынминча. Тӱрчедең сан 2:2 пол парды. Тоғазығның ікінҷі чардығында хакас спортсмен 4:2 саннаң чиңіп алған. Наталья Малышева пизінҷі хати Россия чемпионы атха турысты.
53 кг кӧдірімде хола медальны утхан Валерия Тюкпиекова. Спортсменнің хыс фамилиязы Чепсаракова. Ол шор чонның хызы. Валерия, Кемеров облазы ӱчӱн харбазып, 2013 чылда Европа чемпионадында чиңіс тутхан. Ол 1989 чылдаң. Россия чемпионадында 11 хати сыйыхтығ орынға сыххан. Валерия Чепсаракова Хакасия ӱчӱн харбасханох. Амғы туста Кемеров облазы паза Пермь крайы ӱчӱн турысча.
Чоохтирға кирек, арға-мӧрій тузында тилекей чемпионадына таллағ парған. Ол ӱртӱн айында Загребте иртер. Ікі Наташа анда аралазарына ізенчебіс. Кӱресчі хыстар – Республиканың харбас кӧрімнерінің олимп резервінің спорт школазының спортсменнері. Спорт министерствозының таниинаң, оларны Россия чемпионадына тренерлер Леонид Чучунов, Виталий Канзычаков паза Денис Карамчаков тимнееннер.
Сомнар интернеттең
Автор :
Тимнеен Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
