Хада пiс кӱстiгбiс!
02.07.2025
Хабарлар
Республика синіндегі Чииттер кӱні Саяногорскта ирткен
Чииттер кӱнi-2025. Хандых айының 28 кӱнiнде тиксi хазнабыста пірге Чииттер кӱнi таныхталған. Хакасияда «Хада пiс кӱстiгбiс!» фестиваль Саяногорсктағы «Строитель» стадионда иртiрiлген
Фестивальны Хакасияның чииттер политиказы паза халых тилiзi министерствозы Саяногорск городтың устағ-пастаа хабазиинаң иртiрген. Ол Россияда чарлалған Ада чир-суубыс арачылағҷызы чылына паза Илбек Чиңiстiң 80 чылына чарыдылған. Чииттер пайрамы «Пiл. Хын. Поғдарха. Хозым ит» хыйғылығ ирткен. Ол хазнаның тархынын пiлерге, ағаларыбыстың матырын ундутпасха, оларның чидiглерiне поғдархирға, Ада чир-суубыстың культуразын улуғлирға ӱгретче.
Фестиваль ачыхтар тоғызынаң пасталған. «Пiл» ачыхта Хакасияның чииттер политиказы паза халых тилiзi министрi Евгения Майнагашеванаң азых чоохтазығ ирткен. Евгения Валерьевна араласчыларның республиканың чииттер политиказының тилiзiнеңер, ӧӧн кӧстеглерiнеңер, чидiглерiнеңер сурығларына нандырған. Iдӧк устағҷы Саяногорсктағы культура, спорт паза чииттер политиказы устанызының, ортын профессиональнай ӱгредiг учреждениелерiнiң тоғынҷыларына, «Пастағылар чӧрiмiнiң», «ЮНАРМИЯ» чӧрiмнiң ӧткiн араласчыларына министерствоның алғыстас пiчiктерiн читiрген. Паза пу ачыхта Чоннар аразындағы ынархас клубы Хакасияда чуртапчатхан диаспораларның кибiрлерiнең таныстырған.
«Хын» ачыхта спорт тимненiзiнҷе мастер-класс паза «ЮНАРМИЯ» чӧрiм тимнеен «Чииттер тузы» марығ ирткеннер. Марығда республиканың улуғ предприятиелерiнiң паза толдырығлығ ӱлгӱ органнарының командалары араласханнар – тиксi 7 ӧме. Араласчылар хада-пiрге тоғын полчатханнарын, кинетiн алызығларға табырах хайчатханнарын паза хайдағ даа сидiксiнiстi тобыр полчатханнарын кӧзiткеннер. Аның салтарларынҷа 3-ҷi орында «Саянский политех» ӧме пол парған, 2-ҷi орында – «Саяногорск АДМ». Пастағы орынны паза Хакасияның чииттер политиказы паза халых тилiзi министерствозының холдаң холға пирiлчеткен кубогын «РЖД» ӧме холға кирген.
«Поғдарха» ачыхта «Пастағылар чӧрiмiнiң» араласчылары олғаннарға паза чииттерге чапсых программа тимнееннер. Анда «Пiс Матырнаң хада» акция хоостыра ӱлӱкӱнге килген чон ӧнетiн чаа операциязы чааҷыларына пiчiктер пасханнар. «Пастағылар чӧрiмiнiң» ӧткiннерi ол пiчiктер СВО иртчеткен орыннарзар хайди даа ызыларлар тiп таныхтааннар. Iдӧк пу ачыхта ӧнетiн курстар ирткен кiзi пастағы имнег полызиин орта пирерге ӱгреткен. Чииттер анда хынып араласханнар, макеттерде чӱрекке массаж идерге, тынминыбысхан кiзее кии пирерге ӱгренгеннер. Паза иң кiчiглернi адайларына алай хоосхаларына ойнаҷах чайир оңдайларнаң таныстырғаннар.
«Хозым ит» ачыхта чииттер политиказы паза халых тилiзi министерствозының паза Чииттер кiнiнiң тоғынҷылары ӱлӱкӱн араласчыларын репортажтар, интервью паза пасха даа медиаконтент тимнирге ӱгреткеннер.
Чииттер кӱнiнiң пайрамнығ чардығы Россияның паза Хакасияның гимннерi толдырылғанынаң пасталған. Аның соонаң сценаа республика пазы Валентин Коновалов сыххан.
– Пiс пӱӱн, пiр саринаң, чииттерiбiске, оларның кӱзiне, пасха саринаң, пiстiң кибiрлерiбiске, пай культурабысха чарыдылған фестивальны асчабыс. Пiстiң кӱзiбiс хада-пiрге тудынғанында, тӧллер аразындағы пик палғалыста полча тiп прайзыбыс чахсы пiлчебiс. Анзы республикабысха паза тиксi хазнабысха танығлығ полча. Чиит тус – ол нимедең чалтанмас, улуғ чидiглерге чидер тус. Пӱӱн пайрамға чыылған чиит улус пiстiң таңдағызы полча тiп киртiнчем. Прай сағынған сағыстарың толзын, прай киректерiң килiссiн. Пу фестиваль наа арғыстарны табарға, наа чидiглерге чидерге кӧӧктiрер орын полар тiп iзенчем, – алғыстаан чыылған чонны Валентин Олегович.
Алғыстас сӧстерi соонаң ол чииттер политиказын паза пастағларын тилiдерiне хозым иткеннерге Хакасия правительствозының алғыстас пiчiктерiн читiрген.
Iдӧк фестивальның пайрамнығ чардығында Хакасияның чииттер правительствозы чарлаан чииттер брендiнiң ӱчӱн ӱн пирiстiң салтарлары чарлалған. Iди иң кӧп ӱн «ЯХакасиЯ» бренд ӱчӱн пирiлген. Пу танығ республиканың оол-хыстарын пiрiктiрер тiп кӧрiлче. Бренднең наа ниме-ноо сығарызында паза чииттер форумнарын, фестивальларын паза пасха даа улуғ мероприятиелернi иртiрерiнде тузаланарға пӧгiнчелер.
Прай марығларның чиңiсчiлерiне паза сыйыхтығ орыннарға турысханнарға фестивальны иртiрерге полысхан арғыстарның сыйыхтары читiрiлген. Чииттер пайрамы концертнең узарадылған. Ӱлӱкӱнге килген чонны «Каверауд» ӧме паза Александра Солнечная, Вася Сандерс артисттер чайаачыларынаң ӧрiндiргеннер.
Сом Хакасия пазының Телеграм-каналынаң
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
