Сурығлар – телефонҷа паза социальнай сетьтер пастыра
02.07.2025
Хабарлар
Хакасия пазы Валентин Коновалов кӧні эфирде чуртағҷыларның сурығларына нандырған
Кӧні эфир. Хакасия пазы Валентин Коновалов 26 хандыхта РТС телеканалда кӧні эфирде республиканың пӱӱнгi киректерiнеңер чоохтаан паза сурығларға нандырған
Кӧні эфирні РТС телеканалның хабарҷызы Эдуард Иванов паза Хакасия пазы пресс-службазының устағҷызы Константин Новоторженцов апарғаннар. Эдуард Иванов пастап Хакасия делегациязы Санкт-Петербургтағы чоннар аразындағы экономика форумында араласханының ӧӧн салтарлары хайдағ тіп сурған.
Валентин Коновалов хайдағ даа форум алнында улуғ тимнегліг тоғыс апарылча тіп таныхтаан. «Форумда полчатхан ниме, тізең, ол улуғ тоғыстың салтары тирге чарир. Форумда тоғазығлар кӧп иртірілген, улуғ паза ортын бизнеснең. Піс нинҷе-де чӧптезігде хол салғабыс, инвестициялар кирер сурығҷа нинҷе-де тоғазығ иртiргебiс. Ідӧк пасха регионнарнаң паза пасха хазналарнаң хайызығларны тыыт салғабыс», – хысхаҷахти чоохтап пирген Хакасия пазы. Форум салтарларынаңар Хакасия правительствозының ирткен чыылиинда республиканың экономика тилізі министрі Роман Ковтун прай чарыт пирген, аннаңар хати чоохтирға кирек чоғыл, неке, тiп таныхтаан.
Кӧні эфирде Хакасия пазы iдӧк чуртағҷыларның сурығларына нандырған. Хайзы сурығлар социальнай сетьтер пастыра азынада пирілгеннер. Чуртағҷылар кӧні эфир тузында телефонҷа сығдыратханнарох.
Марина, Саяногорск городтағы КСРЗ посёлок:
– Минің чуртағҷылар адынаң ікі сурығ: Олимпийскай орамадағы чолның пӱдірии паза участоктар хыринда сӧп-сап чыылған орынны чох идері.
Валентин Коновалов:
– Пу сурығлар город устағ-пастааның полномочиезінде. Кӧні эфирнің салтарларынҷа піc оларға пу сурығларҷа кӧстеглер турғыс саларбыс. Ағаа хоза, мин чир-чайаан, транспорт паза чол хонии министерстволарынаң сурынам, олар пу сурығҷа тоғыныбыссыннар тіп. Чол хоостыра: олар пу чылға планға кирiлбеен ползалар, пазағы чылларға кир саларға киректер. Сӧп-сапты, тізең, хайди даа чох идерге кирек. Саяногорск городтың пазына ол тоғысты ит саларға пӧгін турғыс саларбыс.
Ирина Щербакова, Таштып аймаандағы Мадыр аал:
– Ағбан – Мадыр паза Таштып – Мадыр маршрут автобустары чӧрбин сыхханнар. Валентин Олегович, полыс пиріңер піcке пу сурығҷа.
Валентин Коновалов:
– Ағбан – Мадыр муниципальнай пӱдістер аразындағы маршрут полза, аннаң Хакасияның транспорт паза чол хонии министерствозы айғасча. Мин оларға пу сурығҷа пӧгін турғыс салам. Анда, арса, перевозчик маршруттаң парыбысхан. Нааны, тізең, таап полбинча поларлар. Министерстваа чахығ пирілер.
14 частығ саарбахтың іҷезі, Ағбан пилтірі аал (социальнай сетьтер пастыра):
– Хайда оолғыма чайғызын ахча тоғынып аларға чарир? Iстенер кӧңні пар, че вакансиялардаңар паза саарбахтарны чайғызына тоғысха алчатхан предприятиелердеңер искіріглер чоғыл. Полыс поларзар ба?
Валентин Коновалов:
– Пӱӱнгі кӱнде Хакасияда паза тиксі хазнада пірге саннығ платформа тоғын сыххан, тоғыс табар паза істеніс хайызығлары сферазында. Ол платформа «Тоғыс Россияда» адалча. Іҷе-пабаларға анда хайдағ вакансиялар парын кӧріп аларға чарир. Ідӧк школаның устағ-пастаанзар айланарға. Оларның алнында андағ пӧгін турча – ӱгренҷілерге тоғыс табарында хабазары. Істеніс палаларны ӧcкірерінде ӧӧн оңдайларның пірсі полча. Паза муниципалитеттің устағ-пастаанзар, хайда сірер чуртапчазар, айланарға чарир, iдӧк – чонға тоғыс тапчаң кінзер.
Боград аймаандағы Пӧзiк хас аал чуртағҷызы (социальнай сетьтер пастыра):
– Пӧзiк хаста неделяа чағын суғ чоғыл. Хаҷан суғ полар паза кем анзында пыролығ?
Валентин Коновалов:
– Андағ сидіксініс сынап пар полған. Муниципалитет пастап ол сурығны позы пӧгіп аларға кӱстенген. Ирткен неделяда орындағы ӱлгӱлер, ол санда чуртағҷылар, регион синінзер искіргеннер. Орта иткеннер, піc ол сидіксіністі пӧгеріне хозылғабыс. Андар ісчең суғ тартары тимнелген. Хайдағ ізіг кӱннер турғанын пілчебіс, аннаңар чуртағҷылар орта айланғаннар. Салтарында кирек тоғыстар апарылған, насос оборудованиезі алыстырылған. Ол труба, хайзынҷа аалзар суғ читірілче, тың иргі – совет тузындох иділтір. Аннаңар тизіл парған орынны тілиріне кӧп тус парыбысхан. Пӱӱнгі кӱнге тизілген орын табылған, суғ резервуарзар ах сыххан. Пу чағында чуртағҷыларның суғ пар полар.
Эдуард Иванов:
– Сурығ наа закон хоостыра, Хакасияда муниципальнай ӱлгӱнің пір синніг системазынаңар закон алыл парған. Хысхаҷахти сурыбызарбын – Сірернің сағыс-кӧрізіңер пу чарадығ хоостыра?
Валентин Коновалов:
– Мин позымның сағыс-кӧрізімні пір ле хати искірбеем. Минің кӧрізім позыма ла нимес, ол чуртағҷыларның кӧп саннығ айланыстарына тӧстенче. Кӧбізі ікі синніг системаны хайраллап алары ӱчӱн. Минің кӧрізімнең, депутаттар, пір саринаң, пу чарадығны маңзырап алыбысханнар. Пасха саринаң, читіре сағынылбаан чарадығ алыбысханнар, салтарлар хайдағ поларын тирең істеспин. Право саринаң даа, ахча-экономика саринаң даа. Депутаттарның ам даа тус пар хайдағ-да алызығлар кирібізеріне, пілчем – от айының 2-ҷі кӱнінде сессия полар. Мин ол сессияда поларға пӧгінчем. Депутаттар ол законны алыстырыбызарына ам даа ізенчем. Килістіре тӱзедіглер тимнебізерлер, пістің чуртағҷыларға постарына таллирға оңдай пирер ӱчӱн: аалда оларға пір синніг алай ікі синніг система кирек. Анзы сын паза чон ӱлгӱзі оңдайы хоостыра орта поларҷых. Паза анзы депутаттар даа саринаң орта поларҷых, депутаттарны чон таапча нооза, олар чуртағҷыларның кӧбізі хайди сағынчатханын санға аларға киректер.
Эдуард Иванов:
– Мин полғам ол сессияда, минің кӧрізімнең, депутат Оксана Разварина орта сурығ турғысхан – хайди республика синіндегі реформа ахча хорадығларын кирексібинче?
Валентин Коновалов:
– Депутаттар закон проектінзер нинҷе ахча хорадыларынаңар тӧстегні кирбееннер. Ол улуғ сайбағ. Аннаңар хати чоохтапчам, оларның тус ам даа пар – прай ол нимені санабызарға паза, пір синніг система пол парза, килер чылға бюджетті хайди аларға. Ол хорадығларны хызырыбызар ба алай ӧскірібізер бе, минің кӧрізімнең, ікінҷізі пол парар.
Законны тимнееннер бюджет хорадығларын санабааны ол пір ле чардых. Хайди федеральнай закон алылғанын піс прайзыбыс пілчебіс, ол нинҷе-де чыл ӱзӱрілген. Пастап прай регионнарны пір синніг системаа кирерге иткеннер, че президент теен: «Чох, регионнарға таллир оңдай пиріңер». Депутаттар регионнарға андағ оңдайны пиргеннер. Мин пілчем, пасха регионнарның парламенттерінде пу сурығҷа ам даа ӱзӱріглер парча. Ноға піcтің депутаттар мындағ маңзытта паза пір дее іcтезіглер чох алыбысханнар, анзы мағаа пілдістіг нимес. Ол орта нимес, аны тӱзедерге кирек.
Надежда Новикова, Алтай аймаандағы Очыр аал чӧбінің депутады:
– Очырдағы «Беркут» олған лагерьінзер тикке путевкалар ноға чоғыл? Минің хызым кадет школазының ӱгренҷізі чіли чыл сай чӧрҷең, путевкаларны Алтай аймааның социальнай арачыланыс устанызында пирҷеңнер. Пу чылда ӱр ниместе сығдыратхам, путевка 50 муң салковайға турча. Минің, депутаттың чіли, пасха іҷелернің ӱчӱн чӱреем ағырча. Кемнің ікі-ӱс пала, прайзы лагерьзер чӧрҷең. Хайдаң ол іҷелерге анҷа ахча таап аларға?
Валентин Коновалов:
– «Беркут» муниципальнай лагерь, че мин сірернің айланыстарыңны пічікке кир салзыннар тіп сурынам, ол санда пасха чуртағҷыларның кирексіністері хоостыра. Піс аны Алтай аймааның устағ-пастаана читірербіс. Олар піске нандыр пирзіннер: тикке путевкалар хайдағ оңдайнаң ӱлестірілчелер.
Ады чох кізі (социальнай сетьтер пастыра):
– Хакасияның наа спорт министріне кем турғызылар?
Валентин Коновалов:
– Спорт министрі поларына ас нимес чуртағҷы айланыстығ пічіктер пас салған, пірее 30-ча кізі полар. Мин чарадығ алғам: піс марығ комиссиязын тӧстирбіс, ол прай кандидаттарнаң чоохтазар, оларның салтарларынҷа, кандидаттар критерийлерге килістіре полчатханы хоостыра чӧптер пирілер. Аның соонаң чарадығ алам – кемні турғызарға. Ноға іди идерге чаратхам? Ол должность ибіре улуғ суум-саам полған сылтаанда. Кӧп кізі спорт министрі поларға сағынча. Аннаңар прай сын паза азых ползын.
Эдуард Иванов:
– Пазох закон сығарчатханнардаңар, сурығ бюджеттер аразындағы хайызығлардаңар законнаңар. Хакасия правительствозы чарғызар айланған. Исктіг айланыс хоостыра кирек хайди парча?
Валентин Коновалов:
– Мин пу закон федеральнай законодательствоға хыйыстыра полча тіп санапчам. Аннаңар ол тохтадыларға кирек. Прай сылтағлар, хайзылары пістің пар, олар исктіг айланыста прай кӧзіділ парғаннар. Пастағы чыылығ иртірҷең кӱнні Хакасияның Ӧӧркі Чарғызы турғыс салған, ол от айының 7-ҷі кӱнінде иртер. Чарғылас хайди парчатханы хоостыра ідӧк искір турарбыс. Че пӱӱнгі кӱнге ол сурығ чарғы пастыра пӧгілер.
Ады чох кізі (социальнай сетьтер пастыра):
– Орбита дачалары орнын хаҷан иптеп пастирлар? Аның чардығы городха кірче, пірее тохтағ орыннары сӧп-сап орнына тӧӧйлер, хоза чарытхы кирек.
Валентин Коновалов:
– Пу айланысты Ағбан городха читірербіс. Городтың устағ-пастааның паза Хакасия правительствозының пірге пӧгiнi пар – Орбита чирінде туризм проектін чуртасха кирерінҷе. Бюджеттең аны иптиріне ахча позыдылған полған. Кӧзідімге, чолларда асфальт саларына. Ол микрорайонны тилідерге кирек, че хайдағ ахчаа, хайдағ туста – анзы городтың устағ-пастаанаң палғалыстығ.
Любовь Александровна, Харатас город:
– Минің ирім тың ағырча, амғы туста піс хазых хайраллаҷаң министерствонаң пір дее палғалыс полбинчабыс. Аның чӱреенең улуғ сидіксініс, операция идері киректелче, квота кирек. Че піс пір дее чирзер кір полбинчабыс. Мин Сірерзер ирткен чылның улуғ хырлас айында айланған полғам, андада хыймыран сыхханнар, нефрологсар кіріп алғабыс. Амды аны хатап пір имнег туразынаң пасха имнег туразынзар ысчалар.
Валентин Коновалов:
– Піс сірернің айланызыңарны пічікке кир саларбыс, квота хоостыра тоғыныбызарға чахығны хазых хайраллаҷаң министерстваа пир салам.
Ады чох кізі (социальнай сетьтер пастыра):
– Кӧп квартиралығ турада тиксі тыхтағ тоғызы уйан толдырылғаны хоостыра хайдар айланарға чарир?
Валентин Коновалов:
– Иң не пурун Тиксі тыхтағ чыындызынзар айланарға кирек. Чыындының нандыриина чӧпсінмезер, Хакасияның ЖКХ министерствозынзар айланарға чарир, аның тоғызын ол сыныхтағда тутча. Алай прокуратуразар. Ідӧк, ол санда, минзер кӧні айланарға чарир. Прай нандырығлығ кізілерге пӧгін турғыс салам: сыныхтағлар иртірібізерге, киректің узы-пазына сығарға.
Анатолий Николаевич, Ағбан город:
– Ноға льготалығ рецепттерҷе аптекаларда имнер чоғыл? Минің бронха астмазы, аптекаларда имнер чоғыл. Ингаляция идеріне беродуалны чарым чылҷа ал полбинчам. Имҷілер льготалығ имнерге рецепт пас пирчелер, аптеказар парзаң – чоғыл. Коммерческай аптекада аларға киліcче. Ноға ағырығ кізілерге мындағ хомай хайығ?
Валентин Коновалов:
– Мындағ ниме, ікінҷілес чох, полбасха кирек. Сірер палғалысчаң оңдайларны артыс салыңар. Мин профильліг орынҷыма, хайзы пу сурығны хайығда тутча, Татьяна Анатольевна Курбатоваа, паза хазых хайраллаҷаң министрге чахығ пирем – сірернің кӧзідімҷе ол киректің узы-пазына сыхсыннар. Сірер чалғызан андағ полбазар, прай системаҷа ӱзӱрзіннер – ноға мындағ сидіксініcтер сығысча, ноға аптекаларда льготалығ имнер чоғыл? Піс имнерні чарым чылға азынада садызып алчабыс, олар пар поларға киректер. Аннаңар пу киректің узы-пазына сығарбыс, нандырығлығ кізілернің пырозы пар полза, оларны хатығлирбыс.
Ады чох кізі (социальнай сетьтер пастыра):
– Хайдағ салтар сағыпча алтын аныпчатхан компанияны, хайзы Чоғархы Паза аал хыринда суғлығ тирең оймахтар артыс салған? Ӧӧні – олар чуртағҷыларнаң пір дее тоғазығлар иртірбееннер паза ол тоғыстардаңар искірбееннер.
Валентин Коновалов:
– Пу чуртағҷаа ідӧк палғалыс оңдайларын артыс саларға кирек. Айланысты пічікке кир салар ӱчӱн. Анда Росприроднадзорның сыныхтаа кирек полар, неке. Че піс Хакасияның чир-чайаан ис-пайы министерствозынаң ідӧк тоғын кӧрербіс. Анда чир-чайаанға ӱрег иділген полза, піс ідӧк Росприроднадзорзар айланарбыс. Ол кирекке хайығ саларына, сайбағлар пар полза, хатығлирына.
Сом кӧнi эфир кӧзiдиинең
Автор :
Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
