Хазнаның аймах театрлары – Хакасияда
20.06.2025
Хабарлар
Фестивальда аралазар «Той. Дым» ойыннаң ӱзік
Программа. Ағбанда 23 – 29 хандыхта Национальнай театрларның тиксi Россия синiндегi фестивальы iкiнҷi хати иртер
Фестиваль Россияның паза Хакасияның культура министерстволары хабазиинаң иртер. Анда пiстiң илбек хазнаның аймах пулуңнарының – Хакасияның, Татарстанның, Тағлығ Алтайның, Калмыкияның, Карелияның, Чувашияның – чайаачы артисттерi аралазарлар. Олар чапсых ойыннарын кӧзiдерлер, культураларынаң паза кибiр-чозахтарынаң таныстырарлар.
Ӱлӱкӱннiң пайрамнығ чардығы 23 хандыхта 17.00 часта М.Ю.Лермонтовтың адынаң Орыс академическай театрның кiрлезiнде пасталар (Ағбан г., Щетинкиннiң орамазы, 12).
Олох кӱнде 18.30 часта М.Ю.Лермонтовтың адынаң Орыс театрның артисттерi «Луноликая» (12+) этно-нымахты кӧзiдерлер. Ай-Хуучин – хыйға паза пiр дее нимедең хорыхпас чааҷы ипчi. Ол iдӧк уғаа абахай полча. Аның сiлии родына чобағ ағылбазын тiп, Ай-Хуучин сырайына хорғыстығ маска кис салча. Пiрсiнде ағаа чоны хырыл парған тiп чабал тӱс кiрче. Позының тӱзiнең азанып, ол Хан-Мирген харындазын прай килескiлернi чох идiбiзерге ысча. Ай-Хуучин килескiлер сӧбiрезiн харғап саларлар тiп чочынча. Чағбан чӱректiг Хан-Мирген, пиҷезiнiң чахиин чахсы толдырбин, пiр килескiнi позыдыбысча. Соонаң хара хорғыстығ нимелер пасталыбысча, аннаңар Хан-Миргенге сӧбiрезiн арачылирға килiсче.
Ойын 1 час 40 минута парча.
24 хандыхта 14.00 паза 18.30 частарда Г.Тукайның адынаң Атнинскай татар драма театры «В ночь лунного затмения» (12+) ойынны кӧзiдер. Апсаа ӱреен соонаң чонынаң Танкабике устапча. Аның ӱс оол полча: Юлмурза, Акъегет, Ишмурза. Юлмурза хаҷанох, ипчi алып, сӧбiрелiг чуртапча. Акъегет абахай Зубаржатнаң хада хоных тӧстирге чӧрче. Пу кӧӧленiсчеткен оолнаң хысха прайзы ӧкерсiнче. Че Юлмурза чаада кинетiн чат халча. Чонның кибiрi хоостыра хада тӧреен туңмазына харындазының ӧкiс халған ипчiзiн аларға киректелче. Андада Зубаржат 11 частығ Ишмурзаның ипчiзi пол парар. Че ай ӧлген хараада хыныс чӱзерлеп чыллар чуртаан кибiрлернi «алтап парыбысча».
Ойын 2 час 15 минута парча.
25 хандыхта 18.30 часта паза 26 хандыхта 12.00 часта П.В.Кучияктың адынаң драма театры «Восхождение на Хан-Алтай» (12+) ойынны кӧзiдер. Спектакль Тағлығ Алтайның пастағы профессиональнай хоосчызы, этнограф Григорий Иванович Чорос-Гуркиннiң чуртас чолына паза чайаачы тоғызына чарыдылча.
Ойын 2 час 45 минута полар.
26 хандыхта 18.30 часта паза 27 хандыхта 14.00 часта Калмыкиядаң килген «Джангар» кӧклӧ театры Хакасияның чуртағҷыларын «Онегин» (12+) трагифарснаң хайхадар. Артисттер, саблығ орыс поэт А.С.Пушкиннiң романына тӧстене, истең паза чаҷыннаң идiлген кӧклӧлернең чапсых спектакльны тимнеп салғаннар. Анда хал хылыхтығ Онегиннi, нымзах чӱректiг, че олох туста пiр дее нимедең чалтанмас Татьянаны, сiлiг оол Ленскийнi, чил сағыстығ Ольганы сах андох танып саларға чарир. Ойында тосханҷа хатхырып аларға паза матырлар ӱчӱн сағыссырап аларға чарир.
Спектакль 2 час 30 минута парча.
27 хандыхта 18.30 часта паза 28 хандыхта 14.00 часта Карелияның Национальнай драма театры «Нора» (16+) драманы кӧзiдер. Кiзi позының чуртас чолын позы таллапча, че ол аннаңар сыбыра ундут салча. Полған на нименiң ӱчӱн тӧлирге кирек, че кiзi анзына тимде ни? Кiзее чуртас салғағынҷа кӧӧлҷе «ағып» одырарға, че олох туста позын чидiглiг тiп сананарға истiг. Сынында посты алаахтырып чуртирға изi чоғыл, андада прай ибiркi изелчеткенге тӧӧй пiлдiрче: сӧбiре, ынархас, хыныс. Аннаңар чуртастың чолын алыстырыбызарға хаҷан даа орай нимес. Драматург Генрик Ибсен пьесаны чӱс чыл мының алнында пас салған полза даа, андағы ағырсымнығ сурығлар пӱӱнгi кӱнде улам iле кӧрiнчелер.
Ойын iкi час парча.
28 хандыхта 18.30 часта паза 29 хандыхта 14.00 часта Чувашияның К.В.Ивановтың адынаң академическай драма театры «Месяц в деревне» (12+) ойынны кӧзiдер. Аалзар чиит ӱгретчi тоғынарға килгенде, истiг чуртапчатхан Ислаевтер сӧбiрезiнiң амыр чуртазы сайбал парча. Наталья Петровна оолға прай чӱреенең хыныбысча. Ол хыпчых, кӱннегҷi паза илепчеткен ипчi пол парча.
Спектакль iкi час парча.
29 хандыхта 18.30 часта Национальнай театрларның тиксi Россия синiндегi фестивальы А.М.Топановтың адынаң Хакас драма театрының «Той.Дым» (12+) ойынынаң чабылар. Спектакльда Хакас чирiнiң ағырсымнығ сурығлары кӧдiрiлче: тiл чiтчеткенi, чон кибiрлерi ундудылчатханы, чир-чайаан кiрленчеткенi... Пу ойын пастыра «Тайна семи дев» пьесаның авторы Татьяна Майнагашева паза ӧӧн режиссёр Тимур Казнов орындағы чуртағҷыларның «хараан ас пирерге» кӱстенче. Чиит тӧлге ӧбекелерiбiс сибер артыс пирген ис-пайны хайраллирға кирек.
Ойын 1 час 10 минута парча.
Cпектакльларға билеттернi А.М.Топановтың адынаң Хакас драма театрының кассазында (Ағбан г., Щетинкиннiң ор., 12) алай пу https://spa.profticket.ru/customer/145/shows/110/# ссылкаҷа аларға чарир. Ойыннар хайда иртерін андох сурап ал турарға. Чииттерге Пушкин картазынаң тузаланҷаң оңдай пар.
Ойыннардаң пасха, фестивальда iдӧк чапсых мастер-класстар иртiрiлер, театр критиктерi паза режиссёрлар спектакльларны ӱзӱрерлер паза пасха даа мероприятиелер полар.
Сом А.М.Топановтың адынаң Хакас драма театрыни
Автор :
Тимнеен Аскар Артамонов
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
