Чиңiсчi ӧмелер Хакасия адын арачылирлар
20.06.2025
Хабарлар
Чиңiсчi ӧмелер тренерлерiнең хада
Спорт. Пу наада Хакасияда «Тууп меспек – Школа футболының лигазы» марығларның мини-футболҷа iкiнҷi чардығы ирт парды. Пастағы орын алған чиңiсчi ӧмелер Москвада Хакасия ӱчӱн турызарлар
Марығларда республиканың ӱгредiг организацияларының пiрiктiрiлген ӧмелерi араласханнар. Оолларның 90 ӧме пол парған, хыстарның – 14.
Хакасияның 9 муниципальнай пӱдiзiнең тиксi 1216 оол паза хыс чыылысхан. Олар Ағбан, Харатас, Абаза городтардаңнар паза Асхыс, Таштып, Алтай, Ағбан пилтiрi, Пии, Шира аймахтарынаңнар. Марығлар ирткен тус аразына, 1,5 айға, 104 школа ӧмезi 167 ойын ойнаан.
Ӱгренҷiлер частары хоостыра ӱс чардыхха чарылғаннар. Iди 2008 – 2010 чылларда тӧреен оолахтарның аразында Ағбандағы 31 №, Алтай аймаандағы Хубачар аалдағы паза Ағбан пилтiрi поселоктағы школалар чиңiсчi полыбысханнар. 2011-2012 чылларда тӧрееннернiң аразында Алтай аймаандағы хубачардағылар, Харатастағы гимназиядағылар паза Ағбандағы Н.Г.Булакиннiң адынаң лицейдегiлер сыйыхтығ орыннарда пол парғаннар. 2013-2014 чылларда тӧрееннернiң аразында 1-ғы орынны Ағбандағы 26 № школа, 2-ҷi орынны Алтай аймаандағы Хубачардағы школа паза 3-ҷi орынны Ағбандағы Н.Г.Булакиннiң адынаң лицей холға киргеннер.
Хызыҷахтар аразында харбазығ iдӧк хатығ парған. 2008 – 2010 чылларда тӧрееннернiң аразында чиңiсчi полыбысханнар: Абазадағы 50 № школа, Асхыс аймаандағы Асхыс чоғархы паза Ағбан пилтiрi аймаандағы Солнечнай ааллардағы ортымах школалар. 2011-2012 чыллардағылар аразында пуох школаларның ӧмелерi сыйыхтығ орыннар алғаннар: Абазадағы 50№ школа, Ағбан пилтiрiндегi Солнечнай паза Асхыс аймаандағы Асхыс чоғархы ааллардағы школалар. 2013-2014 чыллардағылар аразында Асхыс аймаандағы Асхыс чоғархы аалдағы, Ағбандағы 26 № паза Ағбан пилтiрi аймаандағы Сапогов аалдағы школаларның ӧмелерi чиңiс тутханнар.
Марығ салтарлары хоостыра, 2011-2012 паза 2013-2014 чылларда тӧреен саарбахтарның чиңiсчi ӧмелерi Хакасия ӱчӱн тиксi Россия синiндегi марығларда турызарлар. «Тууп меспек – Школа футболының лигазы» мини-футболҷа марығларның финалы Москвада пӱӱл кӱскӱзiн «Лужники» аренада иртер.
«Иң артых школа ӧмезi» ат аларға оолағастар ӧмезiнең Ағбандағы 26№ паза Хубачардағы школаларның ӱгренҷiлерi парарлар, хызыҷахтар ӧмелерiнең – Асхыс чоғархы аалдағы паза Абазадағы 50№ школаларның ӧмелерi.
Хакасияның футболҷа федерациязы паза чарғыҷылар коллегиязы чахсы тоғыс ӱчӱн таныхтааннар: Михаил Быковты (Хубачар аалдағы школа), Евгений Мамышевтi (Асхыс чоғархы аалдағы школа), Никита Кащицтi (Абазадағы 50№ школа), Оксана Таланованы паза Дмитрий Сазанаковты (Ағбандағы 26№ школа), Геннадий Екимковты (Солнечнай аалдағы школа), Яша Хрикулинi (Ағбандағы 31№ школа), Лилия Разгоняеваны (Харатастағы гимназия). Iдӧк спорт мариин иртiреріне орын пирген ӱчӱн Ағбан, Харатас городтарның паза Асхыс, Алтай аймахтарның устағ-пастаана алғыстас читiргеннер.
Хакасияның физкультура ӱгретчiлерi школа футболының тилiзiне улуғ хозым итчелер паза пiстiң ӱгренҷiлер спорт марығларында пӧзiк чидiглерге читчелер тiп таныхтапчалар Хакасияның ӱгредiг паза наука министерствозында.
Регионда ирткен марығның тӧстегҷiлерi – Хакасияның ӱгредiг паза наука министерствозы, республиканың физическай культура паза спорт министерствозы паза «Хакас Республиканың футболҷа федерациязы» региондағы халых организация.
Сом Хакасияның ӱгредiг паза наука министерствозының пресс-службазыни
Автор :
Хакасияның ӱгредiг паза наука министерствозының пресс-службазы
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
