Иптелер орыннар табылды
20.06.2025
Хабарлар
Нацпроект. Хакасия правительствозы «Городтағы осхас истіг оңдайлар тӧстирі» проектті чуртасха кирерінҷе ӱн пиріс салтарларын идібісті
Тиксі Россиядағы чіли, республикада 12 хандыхта «Чуртасха инфраструктура» нацпроектче 2026 чылда «Городтағы осхас истіг оңдайлар тӧстирі» проектче иптелер орыннар ӱчӱн ӱн пиріс тоозылған. Пӱӱл Хакасияда пизінҷізін ирткен ӱн пирісте 17 муниципалитет араласхан паза 43 муң ӱн пирілген. Волонтёрлар чуртағҷылар хайиин тартарында ӧткін тоғыныбысханнар.
– Республика чуртағҷылары иптелер орыннарны таллирында ӧткін араласчалар паза пос пастаанаң сыхчалар. Олар чуртапчатхан орыннарының кирексіністерін иң артых оңарчалар: парктарны нааҷылирын, наа скверлер тӧстирін, олған паза спорт ачыхтарын турғызарын паза чон чӧрчеткен орыннарны иптирін, – таныхтаан Хакасияның пӱдіріг министрі Виталий Пестриков.
Пілдістіг, иң кӧп ӱн, 27266, ағбандағылар пиргеннер. Город устағ-пастаа иң кӧп ӱн чыып алған ӱс орынны адап пирген: Тарас Шевченконың орамазындағы 74№ тура хыриндағы Политика репрессияларына тартылғаннарға хумартхы тас орны – 6910 ӱн; Чоннар ынархазы, Лермонтов паза Авиаторлар орамалары пірікчеткен орын, 31№ школа хыриндағы хуруғ турчатхан чир – 5140 ӱн; Маршал Жуковтың орамазының 74а№ турадаң 94№ тураа теере парчатхан дренаж каналы хастада парчатхан орын – 4028 ӱн.
Пӱӱл ідӧк Асхыс паза Копьёв посёлоктарның, Хубачар, Боград, Пии, Кӧк хайа, Таштып паза Тойым аал чӧптерінің чуртағҷылары ӧткін ӱн пиргеннер. Харатаста, Саяногорскта паза пірее пасха орыннарда чуртағҷылар уйан араласханнар, салтарлар андағох тӧбін полған.
2025 чылда ӱн пиріс наа орында ирткен. Алындағы чылларда чуртағҷылар волонтёрлар пастыра ӱн пирісте аралазарға чочынҷаңнар, анда Хазна полызығлары порталҷа кірерге киректелҷең. Аның ӱчӱн араласчылар саны хызырылҷаң. Пӱӱл, тізең, ӱн пиріс zagorodsrӱda.gosғslғgi.rғ платформада ирткен, анда сурастырығ иртірҷең наа оңдай кирілген.
Сағам ӱннер сыныхталча, аның соонаң улуғ нимес тӱзедіглер кирілер, че олар салтарларны тың алыстырбастар. Кӱскӱзін, тізең, бюджет тимнелзе, 2026 чылда иптелер орыннар паза ағаа позыдылар ахча сині чарадылар.
– Хайдағ орынны иптирін таллирында кибірли Хакасия чуртағҷылары араласхан сурастырығның салтарларына тӧстенчебіс. Андағ оңдай чуртағҷылар сағызын санға аларға паза улуғ кирексіністегі орыннарны алнынзар турғызарға полысча, – салтарлаан Виталий Пестриков.
Чоохтирға кирек, 2019 – 2024 чылларда республикада пу проектче 218 тура ибіркізі паза чон чӧрчеткен 325 орын иптелген. 2025 чылда 15 тура ибіркізі паза чон чӧрчеткен 53 орын иптелер, ол санда парктар, скверлер паза чазағ чӧрҷең орыннар. Ол пӧгінге 151 миллион азыра салковай кӧріл парған. Пӱӱнгі кӱнге Ағбанда, Хубачарда паза Кӧк хайада чон чӧрчеткен сигіс орынны иптирінҷе тоғыстар толдырыл парғаннар. Пу орыннарға кӧрілген ахчаның 9,4%-і алай 14,2 миллион салковайы хорадылған.
Сомнар В.Коноваловтың телеграм-каналынаң
Автор :
Тимнеен Наталья Боргоякова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
