Пастағы тоғыс салтарлары
20.06.2025
Хабарлар
Хакасияның экономика тилізі министрі Роман Ковтун паза аның орынҷызы Наталья Дворяк (сол саринаң) паза Дунъян городтың департамент кізізі Цзинь Лимэйнең Михаил Крутских (оң саринаң)
ПМЭФ-2025. 18 – 21 хандыхта Хакасияның делегациязы Санкт-Петербургта тоғынча. Анда Петербургтағы чоннар аразындағы экономика форумы (ПМЭФ) иртче
Пӧгіннер
Пӱӱл форум Россияның паза пасха хазналарның пос киреен паза хазна органнарын 28-ҷі хати піріктірче. Пу чылда аның ӧӧн хыйғызы: «Пірге аарластар – кӧп кӧстегліг тилекейде ӧзіс ӧзені».
Тоғыс чорығында Хакасия делегациязынаң республика пазы Валентин Коновалов устапча. Пістіңнернің ӧӧн киректері 19, 20 паза 21 хандыхта кӧріл парғаннар.
Хакасия, «Улуғ Сибирь» регионнарның пірге кӧзідиине хозылып, форум араласчыларына позының чуртас-экономика паза инвестиция оңдайларын кӧртісче.
Республика пазы нинҷе-де компания устағ-пастаанаң тоғазар паза мыннаң мындар хада-пірге тоғысты узарадарынҷа чӧптезіглерні апарар. Тиксі алза, Валентин Коноваловтың онҷа чӧптезігде хол салары кӧрілче, ол санда компанияларнаң, пірігіcтернең паза регионнарнаң хада-пірге тоғынардаңар чӧптезіглерде. Олар аймах-пасха киректерде паза кӧстеглерде проекттерні паза пастағларны чуртасха киреріне кӧрілгеннер, инвестиция оңдайларын чахсыландырарға, Хакасияның чуртас-экономиказының тилізіне полызарлар.
Валентин Коновалов форумның ӧӧн чыылиинда аралазар. Анда хазна пазы Владимир Путин Россияның паза тилекейнің экономиказындағы пӱӱнгі киректерiнеңер паза оңдайларынаңар улуғ чоох тудар, ідӧк Россияның паза хада тоғынчатхан пасха хазналарның хайызығларына пос паалаан пирер.
Хыдатнаң хада-пірге
18 хандыхта, форумның пастағы тоғыс кӱнінде, Хакасияның экономика тилізі министрі Роман Ковтун Хыдат Чон Республиказының Чжэцзян провинцияның Дунъян город округының культура, радио паза телевидение, туризм паза спорт департаментінің кізізі Цзинь Лимэйнең тоғасхан.
Дунъян Хыдаттың Чжэцзян провинциязының ӧӧн чардығында орныхча. Город округы пістің эра алнында 195 чылда тӧстелген паза Хыдаттың 100 тархын паза культура городы пічиине кірче. Анда 1,1 миллионҷа кізі чуртапча. Город провинцияның ӧӧн промышленность паза культура кіні полча.
Тоғазығ тузында чоннар аразындағы туризм киреенде хада-пірге тоғысты тилідер оңдайлар ӱзӱрілген. Хакасияның тархын ис-пайын паза Чжэцзян провинцияның туризм оңдайларын санға алып, культура паза экология туризміне алынҷа хайығ салылған.
Тоғазығ салтарларынҷа Хакасияны сабландырар пӧгіннең туроператорларны ааллап ағылардаңар, Хыдатнаң хада кӧні авиапалғалыс тӧстир сурығҷа тоғынардаңар паза Ағбан паза Дунъян городтар аразында ынағлас палғалыстарын тӧcтир ӱчӱн чӧптезіг идердеңер чарадыға килгеннер.
Пос киреене хабазып
Форумда «Индекс дела» тиксі Россиядағы кічіг паза ортын пос кирее рейтингінің азах меетке сыххан 100 араласчыны сыйыхтааннар. Рейтинг ирткен чылда кічіг хырласта тоғынып пастаан. Ол пик тиліпчеткен, наа технологияларны кирчеткен паза регион экономиказының тилізіне пос хозымын итчеткен пос киреене хабазарға кӧстелген. Кічіг паза ортын пос кирее тилізінің пис ӧӧн кӧзідии санға алылча: ӧзіс, таныс полчатханы, тилир оңдайлары, садығлары паза социальнай нандырығлығ полчатханы. Полған на кӧзідіг 100 баллға теере паалалған, кӧдірім синіне хаталған, компанияларның салтарлығ пічии алфавит изерізінҷе турғызылған. Андағ оңдай хазнада пос киреен сын паза тиксі паалирға полысча.
– Піcтің кӧрізібіснең, наа рейтинг системазы пір саңай ӱс пӧгінні толдырча: пос киреене посты паалирға оңдай пирче, кічіг паза ортын пос киреене кӧстеглер турғысча паза тузаланчатхан кізілерге тудынар синнерні таныхтапча. Олох туста Россияның экономика тилізі министерствозы алнында пос киреен чахсы синде тилідер пӧгін турча, «Индекс дела» рейтинг аны пӧгеріне кӧстелген. Рейтингте салылған компанияларны паалаҷаң оңдай мыннаң мындар Россияда хазых конкуренция тилізіне хабазар, че ідӧк аймах синдегі компанияларға тиліҷең наа сағыстар паза наа тиріглер тӧстир, – таныхтаан Россияның экономика тилізі министрінің орынҷызы Татьяна Илюшникова.
Форумда араласчатхан Хакасияның тиліс чыындызының – «Минің пос киреем» кіннің устағҷызы Александр Мяхар чарыт пирген:
– «Минің пос киреем» кінде социальнай идінҷектернең тоғынҷаң ӧнетін пӧлік чох таа полза, піс оларға улуғ хайығ салчабыс. Республиканың поғдархаҷаң салтарлары пар. 80 азыра социальнай идінҷек санға алылған, чылдаң чылға пу кӧстег айнып одырча. 2024 чылның салтарларынҷа Хакасия тиксі пос кирее санына килісчеткен социальнай идінҷектер санынҷа СФО-да 2-ҷі орынға сыххан, Россияда – 12-ҷі орынға. Чахсы чидіглерні мындағ киректер кӧзітче: хазии уйан кізілерге имнег хабазии паза реабилитация полызығлары, сілігленерінҷе полызығлар, олғаннарның ырлир паза чайаачы тилізі. 2023 чылда республиканың идінҷектері ӧткін араласхан сылтаанда Хакасия «Минің пос киреем полысча» тиксі Россиядағы чӧрімде хазнаның иң артых ӱс практиказына кірген. Республиканың тиліс чыындызы, наа оңдайлар, хабазығлар тілеп, пу чылдаң сығара ӧнетін чаа операциязы араласчыларынаң тоғынып пастапча. Чаалазығдаң айланған чааҷылар пос киреен хайди пастирдаңар, хайдағ полызығлар парынаңар піліп алғаннар. Піс ідӧк регионның экономика тилізі, істеніс паза социальнай арачыланыс министерстволарынаң хада-пірге чӧптіг тоғынчабыс, идінҷектерге социальнай пос киреене позыдылчатхан гранттарға пічіктер тимнирге полысчабыс.
Хакасияның делегациязы Питердегі чоннар аразындағы экономика форумында тоғызын узаратча.
Сом Хакасияның экономика тилізі министерствозыни
Автор :
Тимнеен Наталья Сюптерекова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
