Хакасияда БПЛА операторларын тимнепчелер
18.06.2025
Хабарлар
Хакасия пазының орынҷызы Владислав Мингела СВО араласчызына дрон читірче
Кӱн сурии. Ӧнетiн чаа операциязында дроннар кӧп пӧгiн толдырчалар. Синi паза кӱзi хоостыра чааҷыларға, ухтардаң пасха, кииҷе суғ даа ағыл пирчелер. Iдӧк олар разведка тоғызын нииктепчелер
Аннаңар амды тиксi хазнада чааҷыларны БПЛА операторларына тимнепчелер. Хакасияда пу пӧгiн iдӧк толдырылча. Хакасия правительствозының хабазиинаң «Россия ДОСААФ-ының кіні» учреждениенің Хакасиядағы пӧлиинiң iстiнде «Сапсан» ӱгредiг кiнi СВО араласчыларын алай ба андар парарға тимненчеткеннернi дроннаң тоғынарға ӱгретче. Пу наада нинҷе-де чааҷы ӱгредiг иртiбiскен. Оларның пiрсi «Хан» солалығ СВО араласчызы. Ол хазна чахиин толдырар орынзар хатап айланча.
Ӱгредiг программазы 72 часха кӧрiлген. Ооллар пастап симуляторда дроннарны учухтыр чӧрчелер, аймах чахығлар толдырарға ӱгренчелер. Ӱгредiгнiң ӧӧн чардығы тасхар иртче. Ӧнетiн орында олар симуляторда ӱгренген пiлiстерiн тыытчалар, устарын чiтiтчелер.
Учуғарынаң пасха, таңдағы операторларны дроннарны сайирға, чыырға, тыхтирға ӱгретчелер. БПЛА-ның пӱдiзiн пiлгенi iдӧк улуғ кирексiнiсте. Хайди чоохтапча инструктор, «Витязь» солалығ СВО араласчызы, ыырҷының дроннарын чох итсең, ол чара чачырап парча, че аның хай пiрее чардыхтары пӱдӱн халча. Дроннарны тыхтап полчатхан специалисттер, оларны чыып, БПЛА-ны тыхтап алчалар.
«Хан» пу наада операторға ӱгренiп алған. Итсе-де, аннаң тоғынарын ол 2022 чылдох пастаан. Че пiлiзi читкіҷе полбаан.
– Мин дронны нинҷе-де чыл изере учухтыр чӧргем, че ӧнетiн ӱгредиим чох полған, аннаңар ДОСААФ-та курстар иртiрілчеткенде, андар пазын салғам. Прай тикке. Мында кӧп хоза пiлiс алғам паза узымны тилiткем. СВО иртчеткен орыннарда БПЛА операторлары улуғ тоғыс апарчалар. Оларның узынаң ыырҷы алай пiс чиңiс тудары палғалыстығ. Аннаңар олар кирексiнiстелер, – чоохтапча «Хан».
Чаа тириин СВО араласчыларына Хакасия пазының орынҷызы Владислав Мингела читiрген.
– БПЛА операторларын республика ӱр ниместең не тимнеп пастабысты. Кӧп административнай сурығ пӧгерге килiскен. Ӱгредiг апарарға оңдайлар прай тимнелген. Электроннай симулятор алылған, практика иртер орыннар тимнелгеннер. Лицензия алып алғанда, тоғыс пар сыххан. Чыл пасталғаннаң пiс 50 азыра специалист сығарыбысхабыс. Iзенчем, мыннаң мындар пiс мындағ специалисттернi тимнирiн алғыдарбыс паза кирек тирiглер аларын узарадарбыс, – чоохтаан Владислав Мингела.
Хайди таныхтапчалар «Россия ДОСААФ-ының кіні» учреждениенiң Хакасиядағы пӧлиинде, олар БПЛА операторларына СВО араласчыларын на ӱгретпинчелер, iдӧк пасха сфералар тоғынҷыларын, кӧзiдiмге, ағас хониинда iстенчеткеннернi.
Сом Илона Каковани
Автор :
Оксана Котюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
