Хакасия «Ӧбекелер ойыннарын» удурлир
18.06.2025
Хабарлар
Кӱрес – чоныбыстың хынчатхан спорт кӧрімі
Спорт. 21-22 хандыхта Н.Г. Булакиннің адынаң спорткомплексте национальнай кӱрестерҷе тиксі Россия марии иртер
Пӱӱлгі хандых айы пістің республикада фестивальларға пай. Ӱр ниместе ле кӱӱлеп-суулап ирт парды «От ыры» тиксі Россиядағы сарыннар пайрамы. Ол Хакасия чуртағҷыларына кӧп ӧрініc ағылған. Чағдапчатхан тынағ кӱннерінде, тізең, республика «Ӧбекелер ойыннары» арға-мӧрійні удурлирға тимненче. Кибіске 12 регионның кӱресчілері cығар, ол санда Татарстанның, Якутияның, Тағлығ Алтайның паза пасхазы. Фестивальның ӧӧн пӧгіні – Россия президенті Владимир Путиннің национальнай политиказына хабазары. Турнирнің пастағҷыларының пірcі – тренер, Хакасияның кибірліг cпорт кӧрімнерінҷе федерациязының вице-президенті Станислав Челтыгмашев. Хайди таныхтаан Станислав Анатольевич, фестиваль иртірер сағыс пылтыр орғах айында тӧреен. Андада Хакасияның командазы Бишкексер хапсағайҷа (якут чонның кӱрезі) пастағы тилекей чемпионадына чӧрген. Ол чоохтапча:
– Чемпионатха чахсы пар килгебіс. Чир-суғҷыбыс Михаил Болганов республикаа хола медаль ағылған. Арға-мӧрійні кӧріп алғанда, мындағ марығны Хакасияда иртiрібізерге чарир тіп сағын салғабыс. Пастағнаң республика пазы Валентин Олегович Коноваловсар айланғабыс. Сағыс аның кӧңніне кірген, ол спорт ведомствозына фестиваль иртірер чахығ пирген.
Станислав Анатольевичтің чооғынаң, тоғыс ӧмезі турнирні пастап 1-2 кӧрікте иртірерге пӧгінтір. Че пӱӱл хысхызын Якутиязар чоннар аразындағы марыға пар килгенде, оңарып алғаннар: хысхаҷах тус аразына турыстыра фестиваль тимнеп аларға маңнанмастар. Аннаңар турнир хандых айынзар чылдырылған. Ол ікі кӱн парар, программада кӱрес, куреш (алтайларның кӱрезі) паза хапсағай полар. «Ӧбекелер ойыннары» – ӧмелер марии. Полған на регион команда тимнепче. Андар пизер кӱресчі кірер. Спортсменнер 60 кг, 70 кг, 80 кг, 90 кг паза 90 кг артиинаң кӧдірімнерде устарын кӧзідерлер. Хакастар, алтайлар паза якуттар, постарының кӱрестерінҷе марығ иртіріп, ахчалығ сыйыхтар паза медальлар тимнепчелер. Аннаңар олар ікілер команда сығарчалар. Пір сӧснең, чиңіс ӱчӱн харбазығ хазыр парар.
Программа хоостыра фестивальны 21 хандыхта 10.00 часта хакас кӱрезінҷе марығ азар. Анаң кӱресчілер хапсағайда кӱс сынирлар. 22 хандыхта чонны алтай курежі сағыпча. Турнирні кӧні эфирде кӧзідерлер. Хакасияның ӧӧн командазынзар кірчелер Роман Сагалаков (60 кг), Виталий Канзычаков (70 кг), Александр Сергеев (80 кг), Михаил Болганов (90 кг) паза Константин Аполлонов (90 кг артиинаң). Ікінҷі ӧмезер Денис Пастаевтің хумартхызына чарыдылған Асхыс аймааның чемпионадында чиңіс тутхан улус кірер. Марығ 7 хандыхта Ӱс чул аалда ирткен. Анда 150 спортсмен узын кӧзіттір. Чооғының халғанҷызында Станислав Челтыгмашев теен:
– Хакасияда кӱреске хынчатхан чон чуртапча. Прайзын фестивальға хығырчабыс. Кӧрігҷілерні cпорткомплекссер тикке кирерлер. Спортсменнер, республика ӱчӱн турызарға пӧгініп, кӱннің сай залда тирлепчелер. Че оларға хабазығ киректелче. Хысхырыстарыңнаң кӱресчілерге полыс пиріңер. Ідӧк ахчанаң полысчатхан идінҷектерге алғызым читірчем.
Сом Альбина Чистогашевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
