Чӧптезіге хоза пірге тоғыс пӧгiнi
18.06.2025
Хабарлар
Тоғыс чорығы. Ирткен неделяда Хакасия пазы Валентин Коновалов Кемеровта тоғыс чорығынаң полған
МАСС чӧбінің чыылиинда
Кемеровта Хакасия пазы Валентин Коновалов «Сибирьдегі чӧптезіг» регионнар аразындағы ассоциация (МАСС) чӧбінің теестегі чыылии тоғызында араласхан. Анда ідӧк Россия президентінің Сибирьдегі федеральнай округтағы полномочиеліг кізізі Анатолий Серышев полған.
Кӱн суриина мындағ сурығлар сығарылған: Сибирьдегі федеральнай округтың тилізінҷе мероприятиелерні чуртасха кирері паза федеральнай правительство синінде ӧӧн проекттерні тибіредері; 2027 чылда Сибирь чоннарының спартакиадазын иртірері паза аны 2035 чылға теере иртірер оңдайларны кӧрері; «Улуғ Сибирь. Чиңіcке хозым» искірігліг порталны тимнирінҷе паза тоғындырарынҷа регионнар аразындағы проекттің чуртасха кирілчеткені.
Аннаң пасха, округ регионнарының Петербургтағы чоннар аразындағы 28-ҷі экономика форумында «Улуғ Сибирь» пірге кӧзідиинде аралазары ӱзӱрілген. Форум пу неделяда 18 –21 хандыхта иртче.
Кемеров облазынаң палғалыстарны тыыдып
Хакасия паза Кемеров облазы – Кузбасс садығ-экономикадағы, наука-техникадағы паза культурадағы хада-пірге тоғысты паза пірге инвестиция проекттерін чуртасха кирерін узарадарлар. Ол пӧгіннең Хакасия пазы Валентин Коновалов паза Кузбасс губернаторы Илья Середюк чағынғы пис чылға тоғыс планында хол салыбысханнар. Ол регионнар правительстволары аразындағы хада-пірге тоғынардаңар чӧптезігҷе чуртасха кирілер.
Регионнар устағ-пастаа аймах-пасха кӧстеглерде палғалыстарны паза хайызығларны тыыдарға, пірге проекттерні паза программаларны чуртасха кирерін узарадарға, кӧзідімге, Ағбан – Бийск транспорт коридорын пӱдірерінҷе чӧптес салғаннар.
Садығ-экономика кӧстеенҷе пӧгiнде экономиканың ӧӧн кӧстеглерін тилідерiнҷе, пос киреен, инвестиция проекттерін чуртасха кирерінҷе опытнаң алызары кӧріл парған.
Ідӧк аал хонии промышленнозы комплексінде, пӱдіріг паза ЖКХ киреенде, ибіркі чир-чайаанны хайраллирында хада-пірге тоғынары, культура, ӱгредіг паза наука сурығларынҷа искіріг-методиканаң алызары узарадылар.
I чайғы Сибирь спартакиадазы
Олох кӱн Хакасия пазы Валентин Коновалов Сибирь чоннарының I чайғы спартакиадазының пайрамни азылчатханында араласхан. Россия президентінің Сибирьдегі федеральнай округтағы полномочиеліг кізізі Анатолий Серышевке пу танығлығ марығларны азар оңдай пирілген.
Пастағы спартакиадаа округтың 10 регионынаң 500 азыра араласчы чыылысхан. Спорт марығлары 11 – 15 хандыхта «Кузбасс-Арена» ачыхта ирткеннер.
Программада спорттың сигіс кӧрімі кӧріл парған: олаңай кӱрес, аар атлетика, стол теннизі, ухтаң атыс, волейбол, самбо, чӱзері паза кӱрес. Аннаң пасха, ӧнетін чаа операциязының араласчыларына алынҷа дисциплиналар тимнелген: ухтаң атыс, одыра волейбол паза пауэрлифтинг.
Хакасиядаң пу марығларда 13 спортсмен араласхан. Ӧменең республиканың чыылған ӧмелерінің спорт тимненізі кінінің устағҷызы Константин Скульский устаан. Ӧме кӱресте, олаңай кӱресте, самбода паза стол теннизінде республика алнын алған. Iдӧк ӧнетін чаа операциязының араласчылары кӧрілген спорт кӧрімнерінде марығласханнар.
Спартакиаданы азарында В.Г.Чаптыковтың адынаң республика филармониязының «Кӱн сузы» ансамбльы хакас теелбек сілиин кӧртіскен.
Сом Хакасия пазының телеграм-каналынаң
Автор :
Тимнеен Наталья Сюптерекова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
