Конституция – юрист пічии ле нимес...
06.06.2025
Хабарлар
Пастағы рядта Сергей Соколнаң хада Хакасияның Конституциязының тӧстегҷiлерi одырчалар
Хакасия Конституциязына – 30 чыл. Хакасияның Ӧӧркі Чӧбінде республиканың ӧӧн пічиинің 30 чылына чарыдылған пайрамнығ чыылығ иртті
Хакасияның Ӧӧркі Чӧбінің улуғ залында конституция комиссиязының араласчылары, Хакасиядаң табылған Хазна Думазының депутады Николай Шульгинов, Хакасияның Ӧӧркі Чӧбінің депутаттары, правительство, прокуратура паза чарғы кізілері чыылысханнар. Пастағы рядта, тізең, Хакасия Конституциязын тимнирінде араласхан, чоныбыс аразында улуғ аарласнаң тузаланчатхан кізілер одырғаннар: Владимир Штыгашев, Николай Сайбараков, Андрей Асочаков, Михаил Саражаков паза пасхазы.
Пастап Хакасия Конституциязының тархынына чарыдылған кӧзідіг кӧртізілген, анаң В.Г.Чаптыковтың адынаң Хакас филармониязының «Каданс» хоры Россия гимнін орыс тілінең паза Хакасияның чон артизі, Алтайның саблығ артизі Артур Марлужоковнаң хада Хакасия гимнін ікі тілнең толдыр пиргеннер.
– Конституция – ол ӧӧн юрист пічии ле нимес, ол Хакасия Россия Федерациязы пӱдізінде пос алынҷа субъект полчатханының тании! – теен Хакасияның Ӧӧркі Чӧбінің кнезі Сергей Сокол. – Конституция ол атты тыытча паза піс тудынчатхан синнерні паза чарадығларны таныхтапча! 30 чыл аразына аның ӧӧн хыйғызы халча: Хакасия Россияның чарылбас чардығы полған, полча паза полар, кізі, тізең, паза аның правозы, пос чуртазы хыйа алылбинчатхан чардығы.
Сергей Сокол Хакасия Конституциязын тимнеен прай араласчыларға улуғ алғызын читірген. Хакасия пазының алғыстазын аның орынҷызы Богдан Павленко читірген, анаң Хазна Думазының депутады Николай Шульгинов алғыстаан. Конституция авторлары 1991 – 1997 чылларның Хакасияда даа, Россияда даа амыр нимес, таластығ паза хыпчых тус полғанын сағысха киргеннер. Анзының cын киречізі Владимир Штыгашев полча, ол позы 1993 чылда чарыс айында танкттарға атырған парламент туразында полған. Олох туста оларның пір чӧпке, пір сағысха килерге хыйғалары паза кӱстері читкен. Пӱӱн, 30 чыл ирт парғанда, алылған Конституцияның полған на статьязы тӱзімніг, амғы тусха теере кирек полчатханын киречілеен.
Хакасияның Ӧӧркі Чӧбі авторларға, Конституцияны тоғындырарына хозым иткен чуртағҷыларға Аарластығ паза алғыстас пічіктерін читірген. Сыйыхха турысханнар аразында ХакНИИЯЛИ-ның улуғ наука тоғынҷызы, филология наукаларының кандидады Вия Субракова полған. Ученай-тілҷі Конституцияның халғанҷы тӱзедiглерiн хакас тіліне килiстiре тимнеен. Пайрамға Хакасия Конституциязы ӧнетін сығарылған паза чыылығның полған на араласчызына читірілген.
Пайрамнығ чыылығны Россияның саблығ артизі, Хакасияның чон артизі Евгений Улугбашевтiң чатханнаң ойыны паза хайы чазаан, ырҷы Артур Марлужоков, чыылығны чаап, республика искусствозының саблығ тоғынҷызы Татьяна Маслованың «Хакасия» сарынын толдыр пирген.
Сом Илона Каковани
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
