Пос тiлiнең пасчатханнарға – ахчалығ сыйыхтар
06.06.2025
Хабарлар
Олғаннар аразында чиңіс тутхан Вероника Кольчиковаа сыйыхты Таштып аймаа пазы Николай Чебодаев паза орындағы газета тоғынҷызы Тарина Бутонаева читіргеннер
Марығ салтарлары. Пӱӱл Таштып аймааның «Земля Таштыпская» газетазы аймахтың улуғ паза кiчiг чуртағҷылары аразында марығ иртiрген
Ӧӧн кирексiнiс амғы тусха хайраллап халған хакас чозах-кибiрлердеңер, ас-тамах тимнепчеткен оңдайлардаңар, туған-чағын алай ааллар аразында таныхталчатхан хакас ӱлӱкӱннердеңер паза кип-чоохтардаңар хакас тiлiнең пас салары полған.
Салтарларын Чыл пазы ӱлӱкӱнге сығар салар сағыс полған, аннаңар ол «Чыл пазына удур» адал парған. Че кӧрiлген тусха килiспин парған, аның ӱчӱн сыйыхтар, ӱгредiг чылы тоозылчатханда, 22 – 24 сiлкерде читiрiлгеннер.
Марығ улуғлар паза 10 – 18 частығлар аразында иртiрiлген. Утып алғаннарға 2 муңнаң пасти 5 муң салковайға теере ахча сыйлалған. Сыйыхтар чыындызын «Земля Таштыпская» газета редакциязының тоғынҷылары пос ахчазынаң тӧстееннер.
Чиңiсчiлернiң паза сыйыхтығ орыннарға турысханнарның тоғыстары «Чир-суум ӱнi» хакас сығарызында сыхханнар.
Олғаннар аразында чиңiсчi Таштып аалның 4 класс ӱгренҷiзi Вероника Кольчикова пол парған. Ол пабазының Кольчиковтар родынаңар, амғы туста тузаланчатхан кибiрлердеңер, Илбек Ада чаада араласхан ағазынаңар пасхан. Iкiнҷi орын Пыдырах аалдағы 9 класс ӱгренҷiзi Джамиля Мурусуповаа пирiлген. Саарбах хызыҷах чооғында сӧбiрезiнде хайраллалчатхан хакас чозахтардаңар, ууҷазы, паба-iҷезi нимее ӱгретчеткеннеңер чарытча. Ӱзiнҷi орынны iкi араласчаа пирiбiзерге чарадығ алылған – Пыдырах аалдағы 9 класс ӱгренҷiзi Кристина Сульбирековаа паза Ибiг аалдағы 3 класс ӱгренҷiзi Варвара Корабейниковаа. Кристина тӧреен аалында Чыл пазы ӱлӱкӱн хайди таныхталчатханнаңар пасча, Варвара – талғанның тузазынаңар, хакас чонның пу ас-тамаан тартчатхан, сатчатхан, «Алтын ас» пайрамда араласчатхан, пала-пархаларын, школа ӱгренҷiлерiн талғанны тимнирге ӱгретчеткен ағазынаңар.
Улуғлар аразында чиңiсчi Кiчiг Арбыт аал чуртағҷызы Валентина Артонова пол парған. Позының чооғында ол пала кирҷең кибiрдеңер чарытча. «Наа тӧреен паланы туразар кирзе, хайдағ сӧстернең удурлапчалар? Ниме сыйлапчалар? Ноға ол кибiрге тудынарға кирек?» паза даа пасха сурығларға ол позының нандырығларын пирче. Таныхтирға кирек, кибiрлернi улуғлапчатхан чииттерге уғаа тузалығ искiрiг.
Iкiнҷi орынны Улуғ Арбыт аалның чуртағҷызы Ирина Артонова (Сазанакова) утып алған. Чооғында ол позының тӧреен аалында 1980 чылларда, чиит тузында, Тросин ӱкӱкӱннi хайди таныхтап турғаннарын сағысха кирче, амғы туснаң тиңнестiрче паза Арбыт аал хыриндағы тағ ады хайди пӱт парғаннаңар кип-чоохнаң ӱлесче.
Ӱзiнҷi орын Ибiгдегi школаның хакас тiлi ӱгретчiзi Надежда Кулумаеваа пирiл парған. Ол хакас тiлiне хынызынаңар, аны улуғлапчатханнаңар пасча, хынған поэттерінiң кибелiстерi ӱзiктерiнең ӱлесче. Надежда Семёновна чииттерзер айланча: «...ӱгренiңер тӧреен тiлнi, чоохтазыңар аннаң, ундутпаңар аны, улуғ пол парзаңар ла, сiрер аның татхынын алай ниме чiдiр салғанын пiлiп аларзар...»
Сом авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
