Иң пик хылыхтығлар чиңiс тударлар
06.06.2025
Хабарлар
Ӧрт ӱзiрҷеңнер, хатығ кӱрезiг апарып, марығласчалар
Марығлар. Пу кӱннерде МЧС-тың Хакасияҷа Ӧӧн устааның Спартакиадазы санына кiрчеткен ӧрт ӱзiрҷең-арачылаҷаң спорт марығлары иртчелер
Мындағ ӧрт ӱзiрҷең-арачылаҷаң спорт кӧрiмiнҷе марығлар Хакасияда чыл сай иртiрiлчелер. Пӱӱл олар 39-ҷы хати иртчелер. Ӱс кӱнге кӧрiлген марығларда иң артых команда табылча, iдӧк алынҷа кӧзiдiмнерҷе иң артых чиңiсчi iлезiне сығарылча. Прай пу марығлар МЧС-тың Хакасияҷа ГУ-зы иртiрчеткен Спартакиада санына кирiлчелер. Чиңiсчiлер улам пӧзiк синдегi марығларда аралазарлар, анда Хакасия ӱчӱн турызарлар.
Марығлар пайрамни азылған кӱнде «Саяны» стадионда МЧС тоғынҷылары тол парғаннар, ӧӧн трибуна саринда – устағҷылар, тоғырхы саринда – марығларда аралазар командалар. Спартакиадаа кiрчеткен марығларда араласчатхан командаларның парадын пастирдаңар чарадығ пирiлген соонда парад пасталған.
Командалар, изере иртiп, устағҷылар алнында стройнаң турыбысханнар. Ӧрт ӱзiрҷең-арачылаҷаң полған на отрядтың командирi команданың флагын тутхан, аның алнында отряд хайдағ город-аймахтаң килгенiн кӧзiтчеткен танығны тудын салған спортсмен полған. Iди, парадта изере иртiп, стройда турыбысханнар Ағбанның, Харатастың, Саяногорсктың, Асхыс, Орджоникидзе, Таштып, Шира, Алтай, Пии, Ағбан пилтiрi паза Боград аймахтарының командалары. Прай 11 команда. Параднаң устаан МЧС-тың Хакасияҷа ГУ пастығының орынҷызы, iстiндегi службаның полковнигi Денис Коновалов.
Россияның флагынзар «Смирно!» команда пирiлген соонда, Россияның паза Хакасияның гимннерi толдырылған.
Денис Коновалов, спорт командаларынзар айланып, марығларны иптiг иртiрiбiзерге паза иң кӱстiглерiне чиңiс тударға алғап, спорт ӱлӱкӱнiнең прайзын алғыстаан.
Iдӧк марығ араласчыларынзар алғыстас сӧстерiнең айланған Хакасия пазының орынҷызы Владислав Мингела:
– Мин Хакасия пазының чахиинҷа сiрернi республика марығлары пасталчатханнаң алғыстапчам! Пу прайзына тӧӧй нимес, алынҷа марығлар, мында иң кӱстiглер, иң табырахтар чиңiс тутчалар. Сiрер, постарыңа айабин, службада кiзiлернiң чуртазын паза хазиин арачылапчазар, чонға хорғыс чох чуртир оңдай пирчезер. Пӱӱн марыға 11 команда сыхча, иң пик хылыхтығлар, сындырлығлар, кӱстiглер чиңiс тударлар. Сiрерге сын кӱрезiгде оң ползын. Спорт ӱлӱкӱнiнең сiрернi алғыстапчам!
Аның соонда МЧС-тың Хакасияҷа Ӧӧн устааның пастығы, iстiндегi службаның генерал-майоры Александр Мулл хысхаҷах чоох тутхан. «Кӧбiзi пу марығларда пастағызын на араласпинча, прайзының чиңiс тудар оңдайы пар, че мында утыр салған кiзi чох полча. Марығларда аралазып, посха алынған тимненiс аннаң андархы службада тузалығ полар. Прайзын ӱлӱкӱннең алғыстапчам, наа чидiглер алғапчам!» – теен ол.
Мероприятие тузында «Я, ты, он, она – вместе целая страна...» ыр толдырылған. Анаң iдӧк алғыстас сӧстерiнең чоох тутханнар Хакасияның ӧрт ӱзiрҷең прикладной спорт пiрiгiзiнiң президентi Сергей Ожигов, Промсвязьбанктың бизнес пӧлиинiң директоры Максим Мироненко, «Динамо» спорт пiрiгiзiнiң Хакасиядағы пӧлиинiң кнес орынҷызы, Олимп ойыннарының араласчызы, чоннар аразындағы класстығ спорт узы Пётр Макарчук, ВДПО-ның Хакасиядағы пӧлиинiң кнезi Дмитрий Смешной паза пасхазы даа.
Прайзы алғыстас сӧстерiнең чоох тутхан соонда, Ағбанда ӧрт ӱзiрҷең-арачылаҷаң 39-ҷы марығлар азылчатханы чарлалған. Пӱӱн, тiзең, ӧрт ӱзiрҷеңнернiң арға-мӧрiйiнiң халғанҷы кӱнi – иң артыхтарын адир кӱн.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
