Чайғы – олғаннарның сағыссырас чох тузы
04.06.2025
Хабарлар
Георгий Павлов паза Евгения Тюкпиекова конструктордаң робот чыыпчалар
Пайрам. Палаларны арачылаҷаң кӱнде Ағбанның Чайаачы олғаннар кiнi алнында «Хада ынағ сӧбiре – город, пабам, iҷем, мин» алғым ӱлӱкӱн ирткен. Олған-узахха 50 интерактивнай площадка тоғынған
Анда олғаннарға аймах мастер-класстар, ойыннар, марығлар иртiрiлгеннер, концерт кӧзiдiлген.
Ағбан городтың депутаттар чӧбiнiң кнезi Альберт Тупикин, палаларны ӱлӱкӱннең алғыстап, «Ағбан» чир-суғны ӱгренҷең олған энциклопедиязының нааҷылалған сығарызынаңар чоохтап пирген:
– Пӱӱн олғаннарның кӧбiзi нааҷылалған энциклопедияны сыйыхха алар. Ол палаларға даа, улуғларға даа уғаа тузалығ полар. Пiстiң библиотека системазының чайаачы ӧмезінiң тоғызы паза кiчiг хоосчылар сылтаанда «Ағбан» энциклопедия уғаа хайхастығ книга пол парды. Ол пiстiң городтың тархынынаң таныстырча.
Концерттi апарчатхан кiзiлер, пис паланы сценаа хығырып, килген чонны ӱлӱкӱннең алғыстабызарға сурынғаннар. Иң чахсы алғыстас ӱчӱн сыйых пирерге молҷааннар. Кiчiг арах частығ палалар прайзын «Палалар арачылағҷызы кӱнiнең» алғыстааннар. Прайзына «Ағбан» энциклопедия паза ӱбӱрҷең шарлар читiрiлген.
«Кристалик» олған садының воспитательлерi Евгения Тюкпиекова паза Виктория Захваткина палаларны конструктордаң нимелер чыырға ӱгреткеннер.
– Пicтiң олған садында «Техномир» инновация площадказы пар, хайзында фанкластик конструкторны чыырға ӱгретчебiс. Пiс кӱннiң фанкластикче ӱгредiглер иртiрчебiс. Пу наа конструктор олғаннарның кӧңнiне кiрче, уламох оолағастарның. Аннаң уғаа килкiм нимелер чыырға чарир, аннаңар ол алты час толдыр салған паза аннаң даа улуғ палаларға кӧрiлген.
Пӱӱнгi мастер-класста пiс олғаннарны конструктордаң нимелер хайди чыырға кӧзітчебiс. Пiстiң тимде схемалар пар, пiреезi аны хоостыра чыыпча, пiреезi позы сағынып алча. Мындағ оңдайнаң олғаннар оох моторикаларын тилiтчелер. Палалар схема полызиинаң зонтосветик, чахайах паза робот чыыбысханнар, – теен Евгения Тюкпиекова.
Георгий Павлов конструктордаң робот чыыпчатханнаңар сағызынаң ӱлескен:
– Мин позым сағынып алған роботты чыыпчам. Конструктор хынған ойнаҷағым полча. Че фанкластик конструкторны хаҷан даа чығбаам, уғаа хынығ полтыр, кӧңнiме кiрче.
Палаларны арачылаҷаң кӱн Георгийге уламох танығлығ полча – пӱӱн аның тӧреен кӱнi.
Анна Тутаркова ӱлӱкӱнге Настя паза Катя палаларынаң хада килген. Настянаң Катя, аймах мастер-класстарда паза ойыннарда аралазып, ачых-чарых полғаннар. Анна Тутаркованың чооғынаң, олғаннарға мындағ пайрамнар иртiрiлчеткенi аның кӧңнiне кiрче.
– Мында палалар чайаачы оңдайларын кӧзiтчелер, марығласчалар. Аның ӱчӱн оларға жетончиктер пирiлче, оларның орнына сыйых алып аларлар. Аннаңар кӧңнiлерi уламох кӧдiрiлче. Ағаа хоза, прай мастер-класстар тикке иртiрiлчеткенi ӧрiндiрче. Мин кiчiг полғанда, Палалар арачылаҷаң кӱн iди алғым таныхталбаҷаң. Амды пу ӱлӱкӱн танығлығ иртiрiлчеткенi ӧрiндiрче, – сағызынаң ӱлескен Анна Тутаркова.
Настя Тутаркова асфальтта чахайах хоостапча
Чаҷыннаң маскалар тимнирiнҷе мастер-класста кiчiг палалар араласханнар. Олған садының воспитательлерi чаҷыннаң маскалар хыплап салғаннар, олғаннар оларны фломастернең, ӧңніг карандаштарнаң сырлап, пызыңнапчатхан блёсткаларнаң, хус чӱгінең чазапчатханнар.
Анда ӧӧнiнде хызыҷахтар араласханнар, пiреезi ӱс-тӧрт ле частығ полар, неке. Мастер-классты иртiрчеткен «Дашенька» олған садының воспитательi Екатерина Рубцованың таниинаң, чаҷын маскалар халбин даа парғадағ, аннаңар пайрам тоозылғанҷа олар чидерiне iзенiс чоғыл.
– Пӱӱл пiс мастер-классты пастағызын на иртiрдiбiс. Че пу син кӧп пала аралазарын пiр дее сағыбаабыс. Пiр час аразына мастер-класста 30-ча пала араласты. Оларның кӧбiзi школаа парғалах. Пiреезi масканы пис минута ла аразына сырлабысча, – теен Екатерина Рубцова.
«Ағбанның кiчiг архитекторлары» кӧзiдiгде олған садынзар чӧрчеткен олғаннар тимнеен Ағбан городтың танығлығ орыннарының макеттерi сығарылған. Пу кӧзiдiг прайзының даа хайиин тартхан. Олғаннар, пастыр килзе, Ағбандағы «Топиар искусствозының паркын» алай Илбек Ада чаада ӱреен чааҷыларға чарыдылған Чиңiс хумартхы тазын танып салып, чоо ӧрiнчеткеннер.
«Подснежник» олған садынзар чӧрчеткен София Чекишива iҷезiнең паза воспитательiнең хада пiр макеттi пластилиннең, чаҷыннаң паза конструктордаң Н.Г.Булакиннiң адынаң «Ағбан» спорткомплекстi паза «Заречье» паркты чайап салғаннар.
«Машенька» олған садының устағҷызы Наталья Кокова марығдаңар чоохтап пирген:
– «Ағбанның кiчiг архитекторлары» марығны ӱгредiг устанызы иртiрче. Анда Ағбанның прай олған садтары араласханнар, че пис ле олған садында чайаачы тоғыстарның площадказы полған, полғанында ла 11-12-лер олған сады. Полған на олған сады 40-ар макет пирген. Прай чайаачы тоғыстарны кӧзiдiге сығарған полза, орамада орын читпесчік. Пӱӱнгi кӧзiдiге иң улуғ паза сыйыхтығ орыннар алған чайаачы тоғыстарны сығарғабыс.
Ағбанның ӧӧн микрорайонының «Центральный» ТОС хоостар паза плакаттар кӧзiдиин иртiрген. Ол «Мин Ағбанға хынчам» адалған. Кӧзiдiгнiң тӧстегҷiзi ӧӧн микрорайонның старостазы Дарья Казак полча.
– Кӧзiдiге «Мин Ағбанға хынчам» марығның иң чахсы сомнары паза плакаттары сығарылғаннар. Пу марығ городтағы чуртастың правилоларына чарыдылған. Олғаннар газонҷа чӱгӱр чӧрерге, чахайахтар ӱзерге, хустарны паза пасха даа ниме-нооны рогаткадаң атарға, похсахты анда-мында тастирға паза пасха даа ниме-ноо идерге чарадылбинчатханнаңар хоостап салғаннар.
Марыға 10 – 18 частығ палаларның 30 азыра хоозы кiрген. Пӱӱн пiс чиңiсчiлерге сыйыхтар читiргебiс.
Пу хоостар iкiнҷi чуртас алзын тiп, пiс оларны, баннерлерде, плакаттарда сығарып, Ағбанның аймах орыннарында iлербiс, турғызарбыс. Олар похсахты тастирға чарадылбинчатхан орыннарда поларлар. Палаларның хоостары чуртағҷыларны городты арығ тударға кӧнiктiрер, – таныхтаан Дарья Казак.
Хакасиядағы чарғы приставтары устанызының тоғынҷылары олғаннарға Калашниковтың автомадын, «Кедр» пулемётты, «Бизон» пистолет-пулемётты, Ярыгиннiң паза Макаровтың пистолеттерiн сайирынҷа паза чыырынҷа мастер-класс иртiргеннер, олғаннарға бронежилеттер кизiрткеннер. Приставтарның чооғынаң, хай пiрее палаларның атчаң тирiгнi чапчаң сайабысханы паза чыыбысханы хоостыра пастағы чаа тимненiстерi пары пiлдiрче.
Сабира Кокова пайрамға iҷезiнең хада килген. Ол имбирь прянигін чазирынҷа мастер-класста паза «Движение первых» иртiрген марығда араласхан.
– Пряниктi артыс саларға сағынчам. Аны чирге айастығ. Мин 8-ҷi классты тоозыбысхам. Пӱӱл пайрамда кiзiлер дее кӧп хайынча, мастер-класстар даа илееде иртiрiлче. Анзы уғаа ӧрiндiрче. Ағбан городта аймах ӱлӱкӱннер таныхталза, сӧбiремнең паза ӧӧрелерiмнең хада чӧрерге кӱстенчем, – сағызынаң ӱлескен Сабира.
Сомнар Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
