«Чилдең табырах» фестиваль – часхының тании
28.05.2025
Хабарлар
Артём Попов паза Денис Чертыков чиңіске чӱгӱрчелер
Спорт. Ағбан пизінҷі хати «Чилдең табырах» чӱгӱріс фестивальын иртірді. 2025 чылда пас меетке 2936 кізі сыххан
Ниме андағ «Чилдең табырах» чӱгӱріс фестиваль? Ол – часка, ӧрініс, хазых чуртас, чонны піріктірчеткен спорт пайрамы. Пиc чыл аразына Хакасияда фестивальда аралазары чахсы кибірге айлан парған тирге чарир. Анзын спортсменнер саны киречілепче. 2021 чылда мероприятие пір муң кізі дее чыып полбаан полза, пӱӱл арға-мӧрійде пічіктер хоостыра 2936 араласчы кӱзін сынады.
Чыылған чон тӧрт дистанция тобырған. Пик хуйахтығлар чарым марафон (21,1 километр) чӱгӱргеннер. Ікінҷі дистанция – 10 километр, ӱзінҷі дистанция – 3 километр. Пір километрге чӱгӱрчеткеннерні частары хоостыра ікі ӧмее чарыбысханнар: 2012 – 2014 паза 2015 – 2018 чылларда тӧрееннер. Иң кічіглерге 500 метр кӧрілген. Аны 2019 – 2022 чылда тӧреен иркеҷектер чӱгӱргеннер. Пілдістіг, хысхаҷах дистанцияларда иң кӧп араласчы. Ол сылтағнаң анда кӱс сынапчатханнарны иң пурун пас меетке сығарҷаңнар. Че 2025 чылда программада алызығлар пол партыр. Пӱӱл пастап 21,1 паза 10 километрге чӱгӱрчеткеннерге чол пирерге чаратханнар.
Чоннаң чоохтасханда, кізілер «Чилдең табырах» спорт пайрамын аймахти паалапчаттыр. Спортсменнерге ол чахсы тренировка, че кӧбізіне азах меетке читкені – улуғ чидіг. 59 частығ Cергей Кичеев чӱгӱріснең усанабас айғас сыххан. Сергей Николаевич пӱдірігҷі полча. Чир-суғҷыбыс 50 час толдыр салғанда, аны тоғызында 3 километр чӱгӱрібізерге хығырғаннар. Аннаң сығара ол, хыниина кірібізіп, неделяда тӧрт хати 12 – 14 километр тобырча. Итсе, Сергей Николаевичтің таниинаң, орта чӱгӱрерге ол ӱс чыл мының алнында ла ӱгреніп алған. Салтарлар ӧріндірче. Пылтыр хосхар айында чир-суғҷыбыс, Москвадағы чарым марафонда аралазып, 50 час толдыр салғаннарның аразында онынҷы орынға сыххан, Владивостокта – пизінҷі орынға. Улуғ городтарзар арға-мӧрійлерге пӱдірігҷі идінҷектер Пётр Пермяковтың паза Денис Какаевтің полызиинаң пар килтір. «Чилдең табырах» фестивальзар айланза, Сергей Николаевич анда тӧртінҷі чылы изере араласча. 2023 чылда ол 50 час толдыр салғаннарның аразында кӱмӱс призер полыбысхан. Хакас спортсмен чоохтаан:
– Чӱгӱріс мағаа кӱс хосча. Ол улуғ хорадығлар кирексібинче. Позым тасхар ла чӱгӱр чӧрчем. Сурығлар сығыс килзе, нандырығларны интернетте тілепчем. Амғы фестивальда оң полбады. 16 километр чӱгӱрібіскен соонда дистанциядаң сығыбыстым. Че пӱӱн миннең хада фестивальда ікі хызым паза пархам араласчалар. Кристина 10 километр тобырған, Юлия – 3 километр, Тимур пархам – 1 километр. Анзы сынап улуғ чидіг. Ӧрінчем.
«Чилдең табырах» мероприятиеде пастағызын на араласханнарның санында Ольга Тинникованы паза Ирина Бахорукованы (хыс фамилиязы – Киштеева) адирға кирек. Ольга пір туста Хакас драма театрында артист полып істенген, пӱӱнгі кӱнде массаж узы полча. Чиит ипчі школада ӱгренчеткенде, ниик атлетиканаң айғастыр. Ол тустаң Ольга Владимировна спортнаң ынағласча. Хакас абахай иртен сай 5 километр чӱгӱрібізерге кӱстенче, маңнанминчатса, 2 километр. Фестивальда ол чарым марафонда кӱзін сынаан. Ағаа чӱгӱрерге сидік полбиндыр.
Ирина Бахорукова садығда істенче. 37 частығ ипчі пос туста «НеПешком» чӱгӱріс клубынзар чӧрчеттір. Аннаң устапча Светлана Овчинникова. Ирина Александровна таныхтаан:
– Алында тренажер залынзар, фитнес секцияларынзар пазынҷаңмын. Пылтыр ниик атлетикада кӱс сынирға чаратхам. Сизінгенде, клубта ӧӧнінде ипчі чон чыылыс парған. Прайзы даа 30 час толдыр салған. Неделяда ӱс хати тоғасчабыс. Пір тренировка ӱчӱн 300 салковай тӧлепчем. Пӱӱн 10 километр тобырғам. Фестивальда аралазарға кӧңніме кірді.
Ксения Когоякова А.А.Кенельнің адынаң олған музыка школазында фортепиано клазын апарча. 2024 чылдаң ол I Lovӱ Sғpӱrsport чӱгӱріс школазынзар чӧрче. Пір чыл аразына музыка ӱгретчізі «Чилдең табырах» фестивальда ікі хати аралазарға паза Хызылчарда «Ізіг» спорт пайрамында чӱгӱрерге маңнантыр. Дистанция – 10 километр. Чиит ипчінің таниинаң, пӱӱл трасса хай-хай чахсы, кӱн тур пирген, аннаңар ол тузын 3 минутаа чахсыландырыбысхан.
Узун дистанцияларға марығ тоозыл парғанда, фестиваль пайрамни азылған. Спорт мероприятиезi – Хакасияның ӧӧн городының проекті, аннаңар пастап сӧс пирілген Ағбанның пазы Алексей Лёминге. Алексей Викторович прайзына хазых, часка алғаан. Алғыстастарға хозылғаннар Ӧӧркі Чӧп кнезі Сергей Сокол, спорт министрінің тоғызын толдырчатхан Дмитрий Сафронов паза фестивальның ӧӧн чарғыҷызы Андрей Ромащенко. Чылығ сӧстер сыйыхтаснаң узарадылған.
2025 чылда чемпионнарға пазох Россияның спорт устары Денис Чертыков паза Артём Попов сыхханнар. Чоохтирға кирек, Денис Михайловичке сілкер – чидіглер айы. Ол тағлығ чӱгӱрісче Россия чемпионадын 22 сілкерде 2021 чылда утхан. Пір чыл пазынаң аның Даяны хызы тӧреен, пӱӱл 17 сілкерде – Диана палазы. Саблығ cпортсмен пылтыр азаанаң кинеп парған, ол сылтағнаң 2025 чылның пастағы пас мееттері ағаа сидік арах иртчелер. Ниик атлетикада ӧӧн марығлар кӱскӱзін полча, хакас ирен ол тусха хазыхтанып аларға кирек. Денис Чертыковтың чооғынаң, «Чилдең табырах» фестивальда ол хынып араласча. Пу фестиваль пости нооза.
Андағох сағыстарнаң ӱлескен Артём Попов. Спортсмен теен:
– Дениснең хада Ағбандағы марығда 2022 чылдаң араласчабыс. Город орамаларында «ағырчатхан» улус кӧрінмеҷең. Кізілер хайдағ мероприятие иртчеткенiн чахсы оңар полбаҷаңнар. Пӱӱн чӱгӱргенде, чон пісті таныпча, піске чиңіс алғапча. Чазырбаспын, чӱрекке истіг.
Артём Попов Пии аалдаң, ол 2001 чылда тӧреен. Денис Чертыков чіли, чиит кізі тренер Игорь Владимировтың холында узын таптапча. Пӱӱл Попов, Москвадағы чарым марафонда чиңіс тудып, Хакасияа алтын медаль ағылған. Cпортсмен чӱгӱрҷең чолда наа чиңіcтер тударға тимде.
Тӧстегҷілернің кӱстенізінең «Чилдең табырах» фестиваль тӧреміл пӧзік синде иртче. Сыйыхтар аймағы даа араласчыларны ӧріндірче. Кӧзідімге, чарым марафонда чиңіс тутхан Денис Чертыковха 50 муң салковай паза аймах сертификаттар читірілген. 10 километрні прайзынаң табырах тобырған Артём Попов 25 муң салковайны холға кирген. Пьедесталға сыхханнардаң ідӧк Ирина Ульчугашеваны паза Максим Тохтобинні таныхтирҷыхпыс. Пастағы спортсмен, 10 километрні чӱгӱріп, ипчілер аразында ӱзінҷізі полыбысхан. Тохтобин 3 километрде прайзын ас парыбысхан.
Сом абакан.рф сайттаң
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
