Нааҷылалған стадион азылғаны – спорт ӱлӱкӱнi
21.05.2025
Хабарлар
Стадионда спортнаң айғасчатханнарға даа, кӧрiгҷiлерге дее истiг полар
Аал тилiзi. Алтай аймааның кiнiнде «Аалларның тиксi тилiзi» хазна программазынҷа нааҷылалған «Колос» стадион пайрамни азылды
Спорт объектiнде iкi трибуна, чарғыҷылар, тренерлер паза чоохтазығлар апарҷаң пӧліктер, имҷi кабинедi, кип-азах алыстырҷаң, чуунҷаң, ниме-ноо хайраллаҷаң орыннар пӱдiрiлген. Iдӧк футбол чазызы, волейбол, баскетбол ачыхтары, чӱгӱрҷең чолыҷах тимнелгеннер, стадион сиденi, чарытхы тіреглері турғызылған, ибiркiзi иптелген, асфальт тӧзелген.
Стадионны тиксi нааҷылир тоғыстар 2020 чылдаң апарылғаннар. Пастап проект-смета пiчiктерi тимнелгеннер, соонаң футбол чазызы, чӱгӱрҷең чолыҷах тӧзелген, ГТО комплексi турғызылған, пасха даа тоғыстар апарылғаннар. Пу кӧстеглерге ахча аймах оңдайларнаң табылған. 2023 чылдаң, тiзең, Хакасияның аал хонии паза ас-тамах министерствозы, Алтай аймаа устағ-пастаа кӱстенiзiнең спорт объектi «Аалларның тиксi тилiзi» хазна программазына кирiл парған. Мындағ оңдайнаң, пӱӱнгi кӱнге амғы тустың прай кирексiнiстерiне нандырчатхан стадион тимнел парған. Аны нааҷылирына тиксi 255 миллион азыра салковай ахча хорадылған.
Таныхтирға кирек, пу хазна программазынҷа Хубачарда iдӧк 120 орынға олған сады, олғаннарға паза чииттерге кӧп кӧстеглiг кiн, 420 орынға кӧрiлген Культура туразы пӱдiрiлче. Олар, стадионох чiли, тӱрчедең тузаланысха кирiлерге киректер.
Стадионны пайрамни азарына чарыдылған мероприятиеде Хакасияның аал хонии паза ас-тамах министрi Сергей Труфанов, Алтай аймаа пазы Ирина Войнова, Хызылчардаң килген футбол федерацияларының «Сибирь» пiрiгiзiнiң президентi Владимир Евтушенко, республикабыстың футбол федерациязының кнезi Валерий Келин чоох тутханнар, Хубачар паза тиксi Алтай аймаа чуртағҷыларын мындағ танығлығ кӱннең алғыстааннар. Ирина Ивановна стадионны нааҷылирға полысхан, пӱдiрiг апарған кiзiлерге, организациялар устағҷыларына алғыстас пiчiктерiн читiрген.
Спорт ӱлӱкӱнi «Хакасия» паза Хызылчар крайы чииттерiнiң піріктірiлген командазының тоғазиинаң узарадылған. Ойын хынығ ирткен, футболисттер чазыда ӧткiн хайынғаннар. Аал чуртағҷылары матчты хынып кӧргеннер. Ойын салтарларынҷа хонҷых регионнаң аалҷылар 7:5 саннаң утыр салғаннар. Аның соонаң 2013-2014 чылларда тӧреен олғаннар аразында «Тууп меспек – школа футбол лигазы» мини-футболҷа марығлар иртiрiлгеннер. Анда 26 хосхардаң 16 сiлкерге читiре ирткен таллағ чардығын иртiбiскен республика школаларының 16 командазы ойнаан. Марығның полуфиналы паза финалы хандых айының пастағы кӱннерiнде иртерлер. Анда Н.Г.Булакиннiң адынаң лицейнiң, Ағбандағы 26 №, Асхыс чоғархыдағы паза Хубачардағы школаларның командалары чиңiс ӱчӱн харбазарлар.
Нааҷылалған стадионнаңар чоохтаза, анда футболнаң, волейболнаң, ниик паза аар атлетиканаң, баскетболнаң, пляжтағы волейболнаң айғасчатхан олған-чииттернiң тренировкалары иртер.
Сом «Сельская правда» газетаның ВК-дағы страницазынаң
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
