Ипподром 93-ҷі сезонын асты
16.05.2025
Хабарлар
Пик туйғахтығлар марығласчалар
Ат чарызы. Пу наада республиканың ипподромында ат чарызы ирткен. Пас меетке 47 чортчаң сыххан
Хакасияда ат чарызына хынчатхан улус чуртапча. Анзы тиктең нимес. Піcтің ӧбекелерібіс атты иң улуғ арғысха санаҷаңнар. Ол ибдегі тоғысты идерге, чаалазарға полысчаң. Тоғыстарның кӧбізі техника кӱзінең иділ сыхханда даа, чонның чӱреенде аттарға хыныс сообаан. Амғы туста чарыстар Ағбан пилтірі, Асхыс, Шира аймахтарында тӧреміл иртчелер. Че кінге республиканың ипподромы саналча. Анда пас меетке тӧлліг ле чортчаңнар паза халыхтатчаңнар сыхчалар.
Кибір хоостыра ат чарызы ипподромда сілкер айынаң пасти ӱртӱн айы тоозылғанҷа иртче. Тӧрт азахтығ спортсменнер чечіме сай марығласчалар. Итсе, пӱӱл ипподром 7 сілкерде сезонны асхан. Пастағы чарыстар неделя ортызына киліс парғаннаңар, кӧрігҷілер саны кӧп полбаан. Анзы аттар ээлерінің дее, чыылған чонның даа кӧңнін тӱзірбеен. Сіліг аттар пар полза, хайди хомзынҷаң. Марығ пасталар алнында хабарҷыларның сурығларына нандырған ипподромның директоры Пётр Гаврилов. Хайди таныхтаан Пётр Васильевич, пӱӱнгі кӱнде пірігісте киректер хомай нимес парча. Сезон тооза чарыстарда илееде ат узын сынир. Пис чыл мының алнында пас меетке удаа ікілер-ӱзер ле ат сығарҷаң полтырлар, амды чиңіс ӱчӱн пизер-алтылар тӧрт азахтығ спортсмен харбасча. Республиканың ипподромында чортчаңнарны фермер Виктор Брух (16 пас), идінҷек Виктор Калинин (18 пас), «Тюльковский» ОАО (22 пас) тутчаттырлар. Пірігістің хазаалары 150 пас атха кӧрілген, амғы туста анда 170 мал тимненіс иртче.
Саң сабылғанда, марығ пасталыбысхан. Чоохтирға кирек, ол кӱн чортчаңнар ла устарын кӧзіткеннер. Халыхтатчаңнар кӱстерін сынирға кирегӧк полғаннар, че оларны чыып полбааннар таң. Программанаң танысханда, ол кӱн 2 – 5 частығ паза аннаң даа улуғ частығ аттар чӱгӱргеннер. Прайзы 1600 метр тобырған. Ӱзінҷі чарыс уғаа чӱрексіністіг ирткен. Ікі частығ орлов тӧлліг чортчаңнар чӱгӱргеннер. Адыҷахтар чииттер, трибунадағы чонны кӧр салып, ӱрӱк парғаннар. Салтарында Собор солалығ асхыр чиңіс тутхан. Ол дистанцияны 2,41,4 минутаа тобырыбысхан. Пизінҷі чортыс Илбек Чиңіcтің 80 чылына чарыдылған. Анда пис частығ асхырлар кӱстерін сынааннар. Сылағай, узун азахтығ чортчаңнарға чон ӧкерсінген. Аттарның пӧзік узы харахха тасталған. Олар табырах чӱгӱрібізерге, олох туста постарының сілиин турыстыра кӧзіт пирерге кӱстенгеннер. Асхырлардаң Комикс пора ат прайзын ас парыбысхан. Чиңісчі 1600 метрні 2,08,8 минутаа чӱгӱрібіскен.
Хакастардаң тӧлліг аттарны тударынаң Иван Миндибеков паза Николай Сагалаков айғасчалар. Николай Григорьевич – Оңхак аалның чуртағҷызы. Аның халыхтатчаңнар даа, чортчаңнар даа пар. Че амғы сезонда Сагалаков араласпинча. Ол асхырын тӧллендірерге тутча. Хулунахтары кӱс алынып алза, оларны чарысха сығарар.
Иван Миндибековнаң чоохтасханда, ол амғы туста тӧрт азахтығ 21 спортсмен тимнеп алған. Иң кӱстіглері «Сибирьнің улуғ хурчаа» кӧп оңдайлығ турнирде аралазарлар. Танығлығ марығ 7 хандыхтаң иртер. 2025 чылда арға-мӧрійні иң пурун Омск удурлир, анаң – Хызылчар. Хакасияның теезі 19 отта чидер. Халғанҷы чарыс Барнаулда иртер. Анда полған на чарыста сыйыхтығ чыындының улии пір миллион салковайға тиңнелер. Иван Ивановичтің таниинаң, пӱӱнгі кӱнде ол чортчаңнарны ла тутча. Москвадағы ипподромда аның аттары парох. Чир-суғҷыбыстың сағынған сағызы – «Дерби» марығда чиңіс тудары. Ол пістің хазнада тӧреен тӧрт частығ орлов тӧлліг чортчаңнарға кӧрілген. Чоохтирға кирек, 2013 чылда Миндибековтың Балетмейстер асхыры Россия президентінің сыйиина ирткен чарысты утып алған. Чидігдеңер федеральнай СМИ-ларда пасханнар. Балетмейстер 12 «ыырҷызын», ол санда Чечняның пазы Рамзан Кадыровтың Гаяр паза Хорезм асхырларын ас парыбысхан. Аннаңар кирек пазох килізер тіп ізеніс пар.
Сезон азылғанда, ипподромның устағ-пастаа ат чарызына хынчатхан улусты марығларны кӧрерге хығырча. Теестегі чарыс 17 сілкерде иртер.
Сом Равиль Дзязькони
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
