Хаҷан даа тигiр айас ползын
15.05.2025
Хабарлар
Василий Георгиевич Сагалаков
«Минiң матыр ағам». Улуғ пабам Сергей Васильевич Сагалаковтың чооғы хоостыра пiс Асхан туңмамнаң хада матыр ағабыстаңар пас пирерге сағынчабыс
Илбек Ада чаада чиңiс тударына прай совет чоны кӱзiн салған. Ол санда улуғ пабамның пабазы Василий Георгиевич Сагалаков (1913 – 2005), андада Егорович полған, отчествозын саба кир салтырлар.
Улуғ пабамның пабазы Василий Георгиевич Сагалаков чааның пастағы айларында фронтсар парыбысхан. Ол 1941 чылда августта, сӧбiрезiнең анымҷохтазып, Чир-суун арачылирға парған. Новосибирскте 1228-ҷi атығҷы полк тӧстелген. Ол анда iкi ай разведчиктер школазында ӱгренген. Соонаң Москва хыринзар тастатхан. Че оларның поездтерiн ыырҷының самолеттары тың чаалааннар. В.Г.Сагалаков анда аар палығлат салған. Аннаңар ағаа госпитальда ӱр чадарға килiскен. Имненiп алып, ол 1942 чылда пазох фронтсар айланған. Мурманск хыринда чааласхан, артиллеристтернiң наводчигi полған: хайдар атарға кӧзiтчең. Ағаа аар пушкаларны атнаң тарт чӧрерге килiсчең.
Архив пiчиинең: 76 мм калибрлiг пушкалар батареязының разведчигi В.Г.Сагалаков, 1944 чылның 12 – 16 октябрьында Петсамо хыринда парған чаалазығлар тузында 30 кг ух-тарны позына артынып, иртчее чох тағлығ чирлерҷе чааласчаң алнындағы хырығларзар читiрген. Iдӧк чаалазығ чазызынаң аар палығлатхан тӧрт чааҷыны сығарған.
Кiчiг хырлас айының 5-ҷi кӱнiнде 1944 чылда «За боевые заслуги», «За оборону Советского Заполярья» медальларнаң сыйыхтатхан, Свирь суғны кискен ӱчӱн орденнең, сыйыхтарнаң таныхтатхан. 1945 чылда ибзер айланып, колхозта малҷы полып тоғынған. Iдӧк ол аарлар тутхан. Василий Георгиевич аттарға тың хынған, тоғысха кӱс паза кiзее паарсах полған. Ол 92 часха теере чуртаан. Ипчiзiнең хада тоғыс пала ӧскiр салған. Оларның пiр ле оол полған – минiң улуғ пабам Сергей Васильевич Сагалаков.
Чаа соонда пайрамнығ медальларның пiрсi II степеньнiг Ада чаа орденiнең (06.04.1985) сыйыхтатхан.
Улуғ пабамның пабазы Василий Георгиевич Сагалаков 2005 чылда улуғ хырлас айының 24-ҷi кӱнiнде cын чирзер парыбысхан, ол Кiчiг Нонып аалның халғанҷы чаа араласчызы полған. Ол хаҷан даа пiстiң сағызыбыста чуртир, сӧбiреде аның чаа соондағы кӧп сомы пар, пiс оларны аарласнаң хайраллапчабыс.
Сом сӧбiре архивiнең
Автор :
Аделина паза Асхан Сагалаковтар, кӧргенектерi
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
