Ӧӧркі Чӧптің чӧптері – чарадығларның ӧзені
14.05.2025
Хабарлар
Кӱн сурии. Хакасияның Ӧӧркі Чӧбінің искіріг политиказынҷа паза халыхтарнаң палғалысча пӧліктің федеральнай синде хара тас кӧстеенің тилізінҷе паза хабазиинҷа искіриин пирчебіс
Хакасияның Ӧӧркі Чӧбі Россия Федерациязының президенті Владимир Владимировичтің хара тас кӧстеенің киректерін иптирінҷе хабазығларын чуртасха кирердеңер чарадиина хабасча, оларның чардығы Хакасияның Ӧӧркі Чӧбінің 2025 чылның азығ айындағы чыылиинда тӧстелгеннер, анда ідӧк регионның хара тас кӧстеенің предприятиелері ӧткін араласханнар.
Пу хаалағлар кӧрілген кӧстег 2024 чылдох урунған тиксі хығыртығларға нандырығ полыбысханнар: региондағы экспорттың 18%-ке тӱскені, предприятиелернің ӱреглері 2,6 млрд салковайға читкені паза хатығластарның теелізі ӧсчеткені.
Хакасия чӧптеен пастағлар Ӧӧркі Чӧп кнезі Сергей Соколның устаанынҷа ирткен азығ айындағы чыылиинда алылғаннар паза чыылығ протоколында таныхталғаннар, анаң федеральнай чарадығларның ӧзені полыбысханнар. Оларның санында – хара тастың іскеркі саринзар гарантиялығ сығарызы, экспортха апарылчатханы ӱчӱн пааны 12,8%-ке тӱзіргені паза Россияның тимір чолларының тарифтерін тӱзірчеткен коэффициенттерні айландырғаны.
Логистиканың хорадығларын тӱзіреріне кӧстелген пу хабазығ 2025 чыл тоозыларына регионның предприятиелеріне нольға чағын рентабельностьха чидерге полызар, ол, тізең, экономиканы паза чон чуртазын иптиріне най кирек.
Предприятиелернің мыннаң мындархы оңдайларын алыстырарынаңар паза тоғынҷыларны наа тоғысха ӱгредерінҷе программаларны тӧстирдеңер чӧптернің президент пакедіне кирілгені улуғ туза пирер. Хакасияа хара тас кӧстее ӧӧн налог парыстарын паза муңар тоғыс орыннарын пирче, аннаңар пу чарадығлар кризистең тоғыр устаныс тирии ле нимес, че ідӧк тӱзімніг тиліс оңдайына кіреріне чахсы тӧстег полар. Мыннаң мындархы тоғыс харатасчыларнаң апарылар, ол санда хара тастаң ниме-ноо тимнирінҷе технологияларны кирерінҷе. Ӧӧн чидіглернің пірсі Хакасияа экспорт квотазын 6,5 млн тонна синінде хайраллап халғаны полча, ол Россияның тимір чолларының Іскеркі полигонының хызырылых иртірҷең оңдайларында даа таарлағ кӱзін тӧстирге полызар.
Пір туста федеральнай синде ӧӧн садығ чырғалларындағы сидіксіністерні тобырарынҷа тоғысты узаратханы – россиядағы хара тасха импорт пошлиналарын хыйа идерінеңер Хыдатнаң паза Индиянаң чӧптезіглер – хара тас аныпчатхан регионнарға хоза парысты 2026 чылдох алар оңдай пирер.
Ӧӧркі Чӧп таныхтапча, пирілген чӧптер – тиксі программаның пастағы ла чардығы. «Хара тас кӧстеене хабасханы – ол Хакасияның таңдағызына инвестициялар. Федеральнай синге сығарылған пістің пастағларыбыс бизнестің, ӱлгӱнің паза халыхтарның чоохтасханы ойын оңдайларын иң сидік тее туста алыстырар кӱстіг полчатханын киречілепчелер. Пӱӱн піс кризисті олаңай ла туйухтабинчабыс – піс тимде ис-пай оңдайынаң пӧзік сығарыстығ экономикаа кірерге ӧзен тӧстепчебіс», – таныхтаан Хакасияның Ӧӧркі Чӧп кнезі Сергей Сокол.
Чарадылған хабазығларның чуртасха кирілгені 2025 чыл тоозылғанҷа хара тас анирын паза регионның хара тас аныпчатхан предприятиелерінің экономиказын иптирге полызар, 2026 чылға, тізең – экспорттың кризис алнындағы кӧзідіглерін айландырарға. Ол Хакасияның хара тас чырғаллындағы ӧӧн орнын тыыдарға полызар, ідӧк сидіксіністерге урунчатхан пасха регионнарға кӧзідім полар.
Сом Хакасияның Ӧӧркі Чӧбінің хабарлар пӧлиини
Автор :
Тимнеен Наталья Сюптерекова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
