Хакас тілінең хабарлар – радиоҷа паза телевидениеҷе
14.05.2025
Хабарлар
Хакас тілліг радио-телевидение хабарҷылары Альберт Кулумаев, Алевтина Букванова паза Юрий Челтыгмашев
Сыйыхтас. 7 сілкерде Россияда Радио кӱні таныхталча
Пу кӱнде Хакасия правительствозында республикадағы радио паза телевидение тоғынҷыларын сыйыхтааннар. Хакасия правительствозының чыылығлар залында стол кистінде профессия ӱлӱкӱнінде сыйыхха турысхан тоғынҷылар одырғаннар. Столның оң пазында республиканың толдырығлығ ӱлгӱзінде хабарлар таратчатханнарнаң илееде тус тоғынған Ирина Емельянова одырған, сол саринаң – Россияның хабарҷылар пірігізінің Хакасиядағы пӧлиинің кнезі Ольга Ширковец. Стол пазында одырып, кибірли аалҷыларны удурлап, алғыстас чооғын тутхан республика пазы Валентин Коновалов:
– Сірер Хакасиядағы, Россиядағы паза тилекейдегі хабарлардаңар иң пурун піліп алчазар. Аннаңар сірернің алныңарда иң не нандырығлығ пӧгін турча: ол хабарларны тузында, сынында, хысхаҷахти паза чапчаң читір пирерге. Наа искіріг технологиялары табырах тилізелер дее, радио паза телевидение пістің чуртағҷыларға хабарларнаң танысчаң ӧӧн оңдайлар полып халчалар. Мин профессия узы, киртінізі, тастыхти турбинчатханы паза чон кибірлерін – улуғларны улуғлирын, чир-сууна хынысты – амғы чуртаста уғаа кирек сариларны хайраллапчатханы ӱчӱн сірерге алғызым читірчем.
Валентин Коноваловтың холынаң тоғынҷылар Россияның хабарҷылар пірігізінің (СЖР) пӧзік сыйыхтарын паза республика правительствозының алғыстастарын алғаннар. Оларның санында хакас тілліг радио-телевидение хабарҷылары полғаннар: «Хакасия» ВГТРК-ның телевидениезінің программа ведущайы Альберт Кулумаев, «Хакасия» ВГТРК-ның радиовещание службазының хабарҷызы Алевтина Букванова паза РТС-тың улуғ редакторы Юрий Челтыгмашев.
Альберт Кулумаев «Честь. Достоинство. Профессионализм» CЖР-ның кӧкcіне хазанҷаң таниина турысхан. Альберт Александрович телевидениеде істеніс чолын пастааннаң сығара пӱӱл ӱртӱн айында 30 чыл толар. Аның алында, тізең, чарым чыл пічіктері киліспинчеткен сылтаанда тоғысха алылбин чӧрген. Пастап, чапсыстығ даа, чиит кізіні электрик тоғызына алғаннар. 1994 чыл. Хазна алызығлары ВГТРК тоғызына теелгенӧк. Республикадағы орыс таа, хакас таа редакциялар алғып пастааннар.
– Хакас телевидениезiнің редакциязында пастап ікі ле хабарҷы саналҷаң, ол минің ӱгретчілерім – Андрей Дмитриевич Томочаков, хазых нимес, паза Ольга Евгеньевна Карачакова, амды РТС-тың хабарҷызы. Олар мині тоғысха алғаннар, – сағысха кирген Альберт Кулумаев. – Соонаң олардаң ноға мині тоғысха алғазар тіп сурғанымда, піске эфирге сыхчаң кізі кирек полған тееннер. Сынында ол туста эфирге дикторлар ла, ӧнетін ӱгредіг алған специалисттер, сыхчаң. Олар саблығ артист адына даа турысчаңнар. Хабарҷылар, тізең, искіріглерні чыырынаң айғасчаңнар. Кӧзідіге оларны редакторлар, режиссёрлар, анаң ӧӧн редакторлар постары тимнеҷеңнер.
Пӱӱнгі кӱнде телевидение хабарҷызы прай тоғысты позы итче тирге чарир: искіріг чыып, аннаң хабар алай кӧзідіг тимнепче, оларның піреезін позыох апар турча. Альберт Кулумаев ӧӧнінде хабарҷы тоғызынаң айғасча паза ӧмедегілернең хада алында апарған «Кӧні эфир» кӧзідігні айландырып аларға ізенче.
– Пу программада піс чоныбыстың, чирібістің иң ағырсымнығ сурығларын ӱзӱрчебіс: политика, промышленность, аал хонии, культура кӧcтеглерінің сурығларын, – чарытча хабарҷы. – Кӧзiдiгнің тузы піс ол сурығларға уламох нандырығлығ хайарын киректепче. Алызығларның пірсі – аалҷылар студиязар килбинчелер, піc оларзар – иблерінзер алай тоғыс орнынзар – чӧрчебіс.
Радио паза палғалыс кӱнінде Алевтина Букванова Хакасия правительствозының алғыстас пічиине турысхан. Хакас тілліг хабарҷы Хакас радиозында чибіргiҷе чыл істен парир. Пӱӱнгі кӱнде хабарҷы спорт искіріглерін тимнепче, «Наа кӱн» искірігні апарча паза ипчілер сурығларынаң айғасча. Аннаң пасха, ӧткін хабарҷы Хакас телевидениезінің хабарларын апарарға маңнанча.
РТС-тың улуғ хабарҷызы Юрий Челтыгмашев республиканың телевидениезінде хакас тілліг кӧзідіглер ӱчӱн нандырча: полған на тоғыс кӱнінде сыхчатхан «Хабарлар» паза неделя сай сыхчатхан «Солбан» кӧзідiглер ӱчӱн. Юрий Петрович хакас чонның паза республиканың халых чуртазында ӧткін араласча, аннаңар сыйыхтар чыындызы пар. Че амғы тоғызында Хакасия правительствозының алғыстазына пастағызын на турысты. Анзы хабарҷының профессия ӱлӱкӱнінде кӧңнін уламох толдырған.
Пу танығлығ профессия ӱлӱкӱнінде хабарҷылар паза тоғынҷылар чылығ сӧстер кӧп искеннер, ол санда Ольга Ширковецтең, Ирина Емельяновадаң паза СМИ устағҷыларынаң.
Сом Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
