Пӧгiн – чорыхтарға чӧрерге
14.05.2025
Хабарлар
Ӧнетін чаа операциязының ветераны Константин Кыдымаев
Матырлар тузы. Пу кӱннерде Ағбандағы Чиңiс паркында Хакасия пазы Валентин Коновалов СВО араласчызы Константин Кыдымаевке холнаң чӧргісчең ӧнетiн автомобиль клӱзiн читiрген
Республикада ӧнетiн чаа операциязының араласчызына пастағы автомобиль пирiлген, аны федеральнай программаҷа, чаалазығда палығладып, ікі азаа чох халып кинек пол парған чааҷыларға читiрчелер. СВО араласчызы Константин Кыдымаев чаалазығда палығлатхан соонаң iкi азаа чох халған. Ӧнетiн транспортты «Ада чир-суубыс арачылағҷылары» чыындының республикадағы пӧлии ал пирген. Сыйыхтасты асхан чыынды устағҷызы Оксана Трусова.
– Пӱӱн пiс ӧнетiн тимнелген автомобильнiң клӱзiн СВО араласчызы Константинге пайрамни читiрчебiс. Пу аарлығ сыйыхты сiрерге читiрерге пiске улуғ чеес, – таныхтаан чыынды устағҷызы Оксана Трусова. – Сiрернiң пик хылииңарға поғдархапчабыс. Пу автомобиль олаңай чӧрҷең транспорт ла полбазын, ол ӧткiн чуртас апарарына тузалығ ползын.
Чааҷыны чаалазығда махачы тудынған ӱчӱн Хакасия пазы Валентин Коновалов алғыстаан, холнаң чӧргісчең «SSWMGO1 кроссовер» клӱзiн пайрамни читiрген.
– Константин Андреевич, сiрерге айас ла тигiр алтында чӧрерге, хазых поларға паза чуртазыңарда чалахай ла кӱннер алғапчам. Сiрерге позыңарға чӧрерге паза хайынарға кирек полчатханын чахсы пiлчебiс. Пӱӱнгi кирек оой нимес чуртастаң сiрер кӧнiк парған чуртас оңдайын апарарына айланарға улуғ нимес хаалағ полча. Мыннаң мындар чуртазыңар иптiг паза амыр салылзын, – теен Хакасия пазы Валентин Коновалов.
Константин Кыдымаев тӧреен-ӧскен Асхыс аймаандағы Палыхтығ суғ аалда. Сӧбiреде ол иң улии полча, аның iкi хыс туңмазы пар. Аннаңар iҷе-пабазының ӧӧн полысчызы полҷаң. Иб аразында хайынҷаң, мал-хус ӧскiрерге паза ӱӱҷiк тамаан салып, айғазарға полысчаң. Чиит оол кiчiгдең сығара, тағ ӧзiмнерiн теерiп, тағларҷа чӧрҷең паза спортнаң хынып айғасчаң, аннаңар пик сындырлығ полҷаң. Школа соонаң Кемеров облазында шахтада тоғынарға кiрiп алған, анда ол шахта тоғыстарын пастирына чол салҷаң. Ӧнетiн чаа операциязына 2023 чылның чарыс айында, Россияның арачыланыс министерствозынаң чӧптезiг идiп, чӧрiбiскен. Улуғ хырлас айында Авдеевка хыринда, минометтың атызына кiр парып, аар палығлатхан. Аның соонаң чааҷы iкi азаа чох халған. Москвадағы чааҷылар госпитальында Константин Кыдымаев он ай чатхан. Чир-суубыссар 2024 чылның ӱртӱн айында айланған. Амғы туста Светлана хыс туңмазының сӧбiрезiнде чуртапча, олар Константинге, чӧлег полып, сидiксiнiстер тобырарға полысчалар. Пiстiң республикада 28 частығ ветеран ӧнетiн тимнелген холнаң чӧргісчең транспортты алған пастағы чааҷы полча. Аны аларында ағаа «Ада чир-суубыс арачылағҷылары» чыындының Хакасиядағы пӧлии полыс пирген. Константин Кыдымаевтiң автомобильнең чӧрҷең правазы пар полған, транспортнаң чӧрҷең опыды асхынах нимес. Ибдегi автомобильнi ол iдӧк холнаң на чӧргісчең иде алыстырып алтыр, пос алынҷа аннаң чӧрерге ӱгренiп алған, аннаңар чорыхтарға парарға тимде.
– Минiң пӧгiн – ыраххы чорыхтарға пар килерге. Байкалзар чит пар килерге сағынчам паза Хакасияның чапсых орыннарында пол килерiм килче. Мин мының алнында чир-суубыстың прай даа пулуңнарында пол килгем паза Хызылчарның хай пiрее чирлерiнзер автомобильлiг чӧрҷең полғам. Байкал кӧлзер пар килген соонаң кӧрiнер, хайдар чол тударға, сағынчам, кӧллерҷе чӧрербiн.
Мин прайзына, кем мағаа хайығ салып хабасча, улуғ алғызым читiрчем. Мағаа мындағ автомобиль пирiлер тiп сағынмаам даа. Аннаңар полысчатхан, ундубинчатхан ӱчӱн «Ада чир-суубыс арачылағҷылары» чыындаа алғызым читiрчем, – чоохтаан ветеран Константин Кыдымаев.
Амғы туста ӧнетiн чаа операциязының араласчызына Россияның социальнай фонды азах протезтерiн идеріне ахча позытча. Пӧзiк технологиялығ протезке ахча чидiспинчетсе, «Ада чир-суубыс арачылағҷылары» чыынды хос пирерге пӧгiнче.
Ӧнетiн чаа операциязында аар палығлатхан ветераннарға ӧнетiн тимнелген автомобильлер пирер сурығны «Ада чир-суубыс арачылағҷылары» хазна чыындызының устағҷызы Анна Цивилёва кӧдiрген. Россия президентi Владимир Путин аннаң чарасхан. Тиксi хазнада чыл тоозылғанҷа 500 ветеранға андағ автомобиль ал пирерi кӧрiлче.
Сом Илона Каковани
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
