Хакасияның культура министерствозында хабарҷыларға «Священная война» сарынға суурылған видеоклиптi кӧзiткеннер. Хакас паза орыс тiллернең толдырылған видеоклип «Пабаларның махачылары – оолларның ханаттары» республика чӧрiмi хоостыра тимнелген.

Пу улуғ тоғыста В.Г.Чаптыковтың адынаң Хакас филармониязы, «Ветер перемен» киностудия, республиканың креатив индустрия школазы паза пасха даа организациялар араласханнар. Видеоклип Л.Р.Кызласовтың адынаң республиканың чир-суғ ӱгренҷең музейiнде пурунғы тастар аразында суурылған. Специалисттер ол орынны иртеннең сығара орай иирге теере тимнееннер.   

Симфоническай оркестрге одырчыхтарны килiстiре орыннарда турғысханнар. Ырҷылар паза кӧгҷiлер чахсы истiлзiннер тiп акустиканы оңдайлааннар. Видеоклип Россияның саблығ артизi, Хакасияның чон артизi Евгений Улугбашевтiң, чатхан сиртiп, хайынаң пасталча. Ағаа филармонияның симфоническай оркестрi хозылча. «Священная война» сарынны Хакасияның саблығ артизi Артур Марлужоков морсымнығ, хойығ ӱнiнең толдырча. «Каданс» хорның оол-хыстары, хозылып, сарынны улам хайхастығ чазапчалар.

Наа проектке чарыдылған пресс-конференцияны Хакасияның культура министрi Светлана Окольникова асхан.

– Хакас Республика пастаанынаң хонҷых паза пасха регионнар, пiске хозылып, пос тiллерiнең «Священная война» сарынны толдырарлар тiп iзенчебiс. Пастағы куплет орыс тiлiнең парча. Анзы пiлдiстiг, орыс тiлiнең хазнабыстың прай чоннары чоохтасча. Че хайди даа пу сарында пос чонының тiлi истiлзiн. Iди «Священная война» сарынны, прайзы ырлап, чон чӧрiмiне айландырыбысчаң кӧңнiбiс пар.

Улуғ хомзынысха, хырых чыллардағы чааның яңылазы ам даа халған. Пӱӱнгi кӱнде оолларыбысты iдӧк чiдiрчебiс, городтар изелчелер. Хакасияның культура тоғынҷылары, филармонияның артисттерi ол хорғыстарны пос хараанаң кӧргеннер. Олар Донбассар чӧргеннер, изел парған заводтарны, тураларны, культура учреждениелерiн кӧргеннер, соох залларда концерттер кӧзiдiп, орындағы чуртағҷыларның кӧңнiн кӧдiрерге кӱстенгеннер, – теен Светлана Анатольевна.

«Священная война» сарынның сӧстерi Илбек Ада чаа пасталғаннаң iкiнҷi кӱнiнде «Известия» паза «Красная звезда» газеталарда чарыхха сығарылған. Аны саблығ совет поэт Василий Иванович Лебедев-Кумач пас салған. Композитор, СССР паза Россия гимннерiнiң авторы Александр Александров, ол сӧстернi хығырып алғанда, сағамох килiстiре кӧг пазыбысхан.

– Кӧӧ оой даа полза, че аны толдырарға сидiк. Сарнапчатханда, тамаамға тығылыс тол килҷең. Пу уғаа кӱстiг сарын. Музейде видеоклиптi суурарға килiстiре орын табылған. Тастарзар кӧрзе, пурунғыдағы матырлар харах алнында турыбысчалар. Олар Чир-суубысты арачылирға хығырчатханы пiлдiрче, – кӧңнiнең ӱлескен видеоклиптiң ӧӧн ырҷызы Артур Марлужоков.

– Видеоклиптi музейдегi тастар аразында суурғаны танығлығ. Тастарға 4-5 муң чыл. Пу тус аразына олар ниме ле кӧрбееннер, пурунғыдағы чаалазығларның киречiлерi полчалар, аннаңар тастарзар аарласнаң хайчам, – теен режиссёр Михаил Мерзликин.

Видеоклиптi тимнирiнде чӱсче кiзi араласхан. Оларның отысча кiзiзі техническай тоғыстарны толдырған, аннаңар кадр кистiнде халғаннар. Пу проект креатив индустрия школазының ӱгренҷiлерiне улуғ опыт пирген. Олғаннар видеоклиптi тимнирiнде ӧткiн араласханнар.

Видеоклип «Ветер перемен» киностудияның ВКонтакте страницазынаң алылған

Сом авторни