Донецктегi филармония Хакасияда ааллады
18.04.2025
Хабарлар
Артисттер Константин Шатохин паза Кристина Катело ырлапчалар
Чайаачы иир. В.Г.Чаптыковтың адынаң Хакас национальнай филармонияда ыраххыдаң килген Донецктегi ӱбӱрҷең кӧг тирiглiг оркестр хайхастығ концертнең чапсытхан
Хосхар айының 4 – 17 кӱннерiнде Донецктегi хазна академическай филармонияның артисттерi гастрольларнаң Сибирьдегi городтарҷа чӧрдiлер. Улуғ чорыхты, Россия культуразы министерствозының тиксi Россияҷа чорыхтығ концерттер пӧгiннерiн толдырып, РОСКОНЦЕРТ ФГБУК иртiрген.
Артисттер Хакасияның ӧӧн городы Ағбанда паза Хызылчар крайының 12 городында полғаннар. Чайаачы устар «Мосфильмнiң чӱс чыллығ тархыны» концерт программазын ағылғаннар. Олар совет тузындағы фильмнернiң кӧглерiн толдырғаннар.
Хакас чирiнде аарлығ аалҷыларны Хакасияның культура министрi Светлана Окольникова паза Хакас филармонияның директоры Вячеслав Инкижеков чылығ удурлааннар.
– Пiс позыбыстың чирiбiсте Донбасстағы нанҷыларыбысты ӱр сахтаабыс. 2023 чылдаң сығара пiс оларнаң хада пик палғалыс тутчабыс. «Зори здесь тихие» проектнең Лугансктағы театр искусствозы академиязының 14 студентiнең хада прай Сибирьҷе чӧргебiс. Операны 5500 кiзi кӧрген. Чыылған ахчаны Лугансктағы театр искусствозы академиязын наа оборудованиенең тирiндiреріне ысхабыс. Олох чылда операны Лугансксар апарғабыс. Iди пiс пiр проектте араласхабыс. Хайди олар пiстi ӱдескеннер! Прайзының харахтары частанған. Аннаң сығара пик ынағласчабыс.
Чыл сай пicтiң филармонияның артисттерi гастрольларнаң Донбассар чӧрчелер. «Кӱн чахайағы» ансамбльның артизi Анна Бурнакова Лугансктағы, Донецктегi, Макеевкадағы госпитальларҷа чӧрген, сарыннар толдырған.
2023 чылның улуғ хырлас айында пiстiң музей тоғынҷылары Свердловсксар чапсых кӧзiдiг апарғаннар. Юрий Курочка фильмнер презентациязын иртiрген. Олох чылда «Нымах» кӧклӧ театрының артисттерi Донбассча, Херсон паза Запорожье областьтарынҷа олғаннарға ойыннар кӧзiдiп чӧргеннер. Палалар андағ театрны кӧрбеен полғаннар. Олар тың хайхааннар.
Пылтыр хосхар айында Чыл пазы ӱлӱкӱннi Червонопартизанскта паза Свердловскта таныхтаабыс. Чуртағҷыларны хакас чонның кибiрлерiнең таныстырғабыс, концертнең ӧрiндiргебiс. Уғаа тың хорғыстығ тус полған. Пiске ӱлӱкӱннi тасхар иртiрерге чаратпааннар, анда атыстар истiлген. Андағ даа полза, Чыл пазына уғаа кӧп кiзi килген. Оларға ӱлӱкӱннi сыйлап пиргенiбiс ӱчӱн ӧрiнчебiс.
2024 чылда пiссер Донецктегi академическай кӧклӧ театры кил парған. Аның ойыннарына школа ӱгренҷiлерiн хығырғабыс.
Хакасия пазы Россияның культура министрi Ольга Борисовна Любимоваа пiчiк пасхан. Анда пiс Донецктегi ӱбӱрҷең кӧг тирiглiг оркестрнi, Лугансктағы филармонияның «Раздолье» сарын паза теелбек ӧмезiн Хакасиязар ызарға сурынғабыс. Iдӧк iкi чыл мының алнында «Чир Чайаан» фестивальға Донецктегi кӧклӧ театры кил парған. Олғаннар аның ойыннарына тың хын парғаннар. Аннаңар пӱӱл пазох пiссер килзiннер тiп хығырғабыс. Кӧклӧ театры паза «Раздолье» ансамбль пiссер iдӧк килерлер. Че пу улуғ чайаачы турны Донецктегi филармония асча, – теен Хакасияның культура министрi Светлана Окольникова.
Хакасияның чуртағҷылары «Мосфильмнiң чӱс чыллығ тархыны» чайаачы иирнi 13 хосхарда кӧрiп алғаннар. Филармонияның залына кiзi сыыспинчатханда, билеттер балкондағы пос орыннарға садылғаннар. Че анда даа кiзi илееде полған.
Таныхтирға кирек, Донецктегi филармонияның артисттерi улуғ фестивальларда сыбыра сыйыхтығ орыннар алчалар. Ағаа хоза, оларның кӧбiзi, Чир-суун неонацисттердең позыдып, ӧнетiн чаа операциязында араласхан.
Концерт пасталар алнында республика пазының орынҷызы Михаил Побызаков аарлығ аалҷыларға чылығ сӧстер чоохтанған.
– Хакасия пазы Валентин Олегович Коноваловтың чахиинаң сiрерге алғыс сӧстерiн читiрерге чарадыңар. Пiс сiрернi улуғ сценабыста кӧрерге ӧрiнчебiс. Хакасияны паза Донбассты кӧп ниме пiрiктiрче. Пiс чонның чуртазына туза ағылҷаң чӧптезiглерде кӧп хол салғабыс, аны хоостыра хада-пiрге чӧптiг тоғынчабыс. Чайаачы ӧмелерiбiс Донбасстың мероприятиелерiнде ӧткiн араласчалар. Сiрер Хакасиязар килерге тус тапханнарың ӱчӱн ӧрiнчебiс. Мыннаң мындар пicтiң республикалар аразындағы ынархас улам тыып одырарына iкiнҷiлес чох iзенчем, – теен Михаил Анатольевич.
Россия президентi 2025 чылны Ада чир-суубыс арачылағҷызы тiп чарлаан. Паза пiстiң хазна пӱӱл Илбек Чиңiстiң 80 чылын таныхтапча. Ханнығ чаада Чир-суубыстың ӱчӱн харбасхан чааҷыларны сағысха кирiп, оларны улуғлап, Донецктегi оркестр кӧрiгҷiлерге «Белорусский вокзал» фильмнең алылған маршты толдыр пирген. Аны «Мосфильм» киностудия 1970 чылда суурған.
Чайаачы иир «Старый рояль» композициянаң узарадылған. «Мы из джаза» фильм чиит режиссёр Карен Шахназаровтың iкiнҷi режиссёр тоғызы полған. Аны 1983 чылда 17 миллион азыра кӧрiгҷi кӧрген. Фильм фестивальларда кӧп сыйыхтар алған. Режиссёрға Ленинскай комсомол премиязын читiргеннер. Ол аның пастағы улуғ чидии полған. Iди Карен Шахназаровтың улуғ кинозар чолы азылған. Соонаң ол пасха даа чахсы кӧп фильм суурған. Концертте «Старый рояль» сарынны ырҷылар Константин Шатохин паза Кристина Катело толдырғаннар.
Композитор Александр Зацепин джазха хынҷаң. Аннаңар пiрсiнде хызы позыңның тиң частығ кiзiлерге ле кӧглер пасчазың тiп чоохтаныбыстыр. Ол сӧстер соонаң Александр Зацепин, чайаачызында наа оңдайлар тiлеп, эстрада сарыннарына тартыл сыхтыр. Iди саблығ композитор «31 июня» фильмге чапсых кӧглер пас салған. Донецктегi филармонияның артисттерi ол фильмнең алылған «Ищу тебя» ырны пiстiң кӧрiгҷiлерге сыйлап пиргеннер.
«Мэри Поппинс, до свидания!» фильмнiң полған на сарыны хит пол парған. Оларны прай хазна сарнаан. Пылтыр фильмге 40 чыл толған, че аның сарыннарын чон ам даа хынып исче. Композитор Максим Дунаевскийнiң кӧглерi чӱрекке чылығ пирчелер. Хакасияның улуғ частығ чуртағҷылары, сценадаң таныс кӧглернi ис салып, сағыстарынаң чиит тустарынзар парыбысханнар.
«Мосфильмнiң чӱс чыллығ тархыны» концертте кӧрiгҷiлер «Джентльмены удачи», «Бриллиантовая рука», «Иван Васильевич меняет профессию» хынған фильмнернiң сарын-кӧглерiн хынып искеннер, «Браво!» хысхырғаннар. Чайаачы иир тооза оркестрнең дирижёр Михаил Мартыненко устаан. Сценадағы улуғ экранда совет фильмнiң ӱзiктерi кӧзiдiлген. Олар оркестрнiң кӧглерiне килiстiре тимнелгеннер.
– Пу чорыхта аймах городтарнаң, культураларнаң танызып аларға чапсых пiлдiрче. Полған на город пос оңдайли хайхастығ. Кiчiг городтарда чылығ удурлапчалар. Программа уғаа чапсых. Пiс прайзы совет кинолары хоостыра ӧскебiс, кӧглерiн исчеңмiс. «Мосфильмнiң чӱс чыллығ тархыны» тур 2024 чылда чарыс айында чуртасха кирiлген. Андада «Мосфильм» киностудияның пайрамы таныхталған. Президенттiң культура пастағлары фонды хабазиинаң проект чуртасха кирiлген, – ӱлескен Донецктегi филармонияның директор орынҷызы Дмитрий Карась.
Сом Любовь Халявинани
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
