Туризм – Хакасия экономиказын алыстырарынҷа ӧӧн чолларның пірсі
18.04.2025
Хабарлар
Хазна Думазының депутады Артём Прокофьев
Тоғазығ. Хакасия пазы Валентин Коновалов Хазна Думазының депутады Артём Прокофьевнең тоғасхан
Хакасиязар тоғыс чорығынаң Хазна Думазының депутады Артём Прокофьев килген. Ол туризмҷе паза турист инфраструктуразын тилідерінҷе комитетсер кірче. Регион пазы аннаң хада тоғазығ иртірген, республикаа хайығ салғаны ӱчӱн алғызын читірген.
Тоғазығ тузында ӧӧн хайығ экономика сурығларына паза кидеркi хазналар санкцияларнаң хыза пасчатхан оңдайларда регионны тилітчең стратегияны чуртасха киреріне салылған.
Хакасия пазы регион экономиказының диверсификациязы хоостыра пӱӱнгі ӧӧн кӧстеглер санында туризм полчатханын таныхтаан. Халғанҷы алты чыл аразына республика правительствозы туризм отрасльынзар регион бюджедінең ахча позыдарын 15 хати ӧскірібіскен, федеральнай ахчаны тартары ідӧк ӧс парған.
Салтарында республиказар килчеткен туристтер саны чыл сай ӧсче. 2024 чылда, мобильнай операторларның саны хоостыра, Хакасиязар iкi миллион азыра турист килген, чарыда чоохтаза, республиканың полған на чуртағҷызына тӧрт турист килісче. Ағаа хоза, анзы бюджетсер тӧлелчеткен налог ахчазында кӧрінче: алты чыл аразына олар ӱс хати ӧс парғаннар. Туризм полызығларын пирер сферада идінҷектер саны пілдірте ӧс парған. Турист инфраструктуразын тилідеріне улуғ хайығ салылча.
Ідӧк пос алынҷа тиліс программазы хоостыра, хайзынзар Хакасия пу чылдаң сығара кір парған, федерация саринаң туризм отрасльына хабасчаң нинҷе-де мероприятие кӧріл парған.
Артём Прокофьев Хакасия правительствозы апарчатхан тоғысты, экономика диверсификациязын идер паза чир алтындағы ис-пайны анирынаң палғалыстығ поларын хызырар кӱстеністерні чахсы паалаан. Хайди ол таныхтаан, эксперттер паалаанынаң туризм отрасльы экономикаа тиксі саринаң туза ағылчатхан ікінҷізі полча, пӱдірігнің соонаң.
– Піс кӧрчебіс, хайди туризм Хакасияда ӧткін тиліпче. Республика национальнай проектті тӱзімніг тоос салған, 2025 чылда аның наа чардығы пасталыбысхан, туризмні тилідерінҷе улуғ пӧгіннер турғызылған. Пістің хазнада турист чорыхтары чылдағы 140 миллион санны ас парыбызарға киректер. Ол амғы кӧзідімнердең 50 процентке ӧзіс. Ағаа хоза, хайди сахтапчалар эксперттер, ол ӧзісті пастағызынаң сығара туризмні тиліт сыххан регионнар пирерлер. Кӧзідім чіли, Хакас Республика ол кӧстегні тӱзімніг тилітчеткенін кӧзітче. Пасха улуғ пӧгін – туризм отрасльының хазна ВВП-зынзар хозым иткенін ікі хати ӧскірері. Мында даа Хакасияның улуғ кӱзі пар, – таныхтаан Артём Прокофьев.
Ол ідӧк республика правительствозының туристтерге тохтаҷаң орыннар санын ӧскірерінҷе тоғызын таныхтаан. Паза инвесторларның улуғ проекттерін чуртасха тӱзімніг киргені Хакасиязар туристтер килчеткенін мыннаң мындар ӧскірерге полызар тіп ізенізін читірген.
Сомнар r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
