Пiстiң кӱзiбiс – хада-пiрге тудыныста
18.04.2025
Хабарлар
Хакасия пазы Валентин Коновалов
Айланыс. Хакасия пазы Валентин Коновалов республика чуртағҷыларынзар айланған
Хакасияның аарлығ чуртағҷылары!
Танығлығ кӱннең сығара неделяа чағын иртiп парды – 12 хосхардаң, 2015 чылда полған хорғыстығ ӧрттернiң онынҷы чылынаң. Ол кӱннердегi киректер, тилекей хайдағ порт полчатханнаңар паза чир-чайаан кӱзiнеңер хоза искiрiг чiли, пiстiң сағызыбыста хаҷанға даа халарлар. Улуғ чобағлар паза ӱреглер пiске уғаа ачығ, че кирек урок пол парғаннар.
Пу чобағлығ кӱн алнында, пӱӱл 5 хосхарда, чир-чайаан пiстi пазох сыныхтады. Турчатхан кӱн – уғаа iзiг, хуруғ паза хазыр чил – он чыл мының алнындағы чобаға ағылған тусха уғаа тӧӧй пол парған. Ӧрт пiр саңай нинҷе-де аймахта сых килген, чобағлығ киректер хатап пол парарынаң хорғыс сынап полған.
Че пiс ол хорғысты пасха удурлаабыс. Республика, паза иң ӧӧнi – пiс сiрернең хада пасха пол парғабыс.
Он чыл тикке ле иртпеен. 2015 чылдағы чобағдаңар сағыс пiстi ӧӧнiне ӱгреткен: алнынзар кӧре тоғынарға, хорғыстарға азынада тимненерге паза тиксi чобағ алнында прайзына пiрiгерге. Правительство, прай службалар, муниципалитеттер – пiс алҷаастарны тӱзедер тоғыс апарғабыс. Че мында прай халых чонның тимненiзi ӧӧнi пол парған.
Пiске 5 хосхарда улуғ чобағ полдыртпасха ниме полысхан?
1. Пiс техника саринаң чахсы тимде полғабыс. Ӧрт ӱзiрҷең паза арачылаҷаң техника паркы нааҷылалған, тоғынар планнар тимнелген, искiрiг пирҷең система чахсыландырылған, ӧрт иртiрбес чоллар тартылған.
2. Ӧӧнi – пiс прайзыбыс хада-пiрге тоғынғабыс. Ӧрттердең тоғыр кӱрезiгде иң алнында профессионаллар ла полбааннар. Улуғ полызығ иткеннер пiстiң ӧткiн чуртағҷылар, пос кӧңнiнең тоғынчатхан ӧрт ӱзiрҷең командалар паза волонтёрлар. Сiрернiң сизiктiг полчатханыңар, нандырииңар, полызарға килерге сыбыра тимде полчатханыңар, пос чирiн чахсы пiлчеткенiңер – ӧртке тоғырланар иң ӧӧнi пол парған. Кiзiлер 2015 чылны чахсы пiлчелер, хайдағ хорғыс поларын пiле тоғынғаннар. Кiзiлернiң андағ сағызына паза полызиина тӧстенiп, профессионаллар даа тӱзiмнiг тоғыныбысханнар: МЧС-тың Хакасияҷа Ӧӧн устааның, ГО паза ЧС-ча хазна комитедiнiң, ағас хонии министерствозының, чир-чайаан ис-пайы министерствозының, полицияның, энергетиканың, орындағы ӱлгӱлернiң тоғынҷылары.
Андағ тимненiс паза, хатап чоохтапчам, пiстiң хада-пiрге тудынызыбыс сылтаанда, 5 хосхарда сыххан прай ӧрттернi табырах ӱзiрiп алғабыс. Я, кирек уғаа сидiк парған. Че пiс идiлген ӱрег синiн хызырып алғабыс. Паза иң ӧӧнi – пiс кiзiлернiң чуртазын паза хазиин ал халғабыс. Анзы кӧзiтче: 2015 чылның уроктарын алынып алғабыс. Хакасия кӱстiг паза хада-пiрге тудыныстығ пол парған. Пiс турабысты арачылирға ӱгренiп алғабыс – хада-пiрге!
Мин хатап прай чӱреемнең алғыстирға сағынчам Хакасияның полған на ӧткiн чуртағҷызын, пос кӧңнiнең ӧрт ӱзiрҷең командалар кiзiлерiн, волонтёрларны, службаларны, прайзын, кем хыйа тур халбаан паза чобағ полдыртпасха полысхан – ӧрт сыхчатханнаңар искiрген, ӧрт сығарбас правилоларға тудынған, хонҷыхтарға полысхан. Сiрернiң ӧткiн кӧрiзiңер – пiстiң прайзыбыстың хорғыс чох чуртазына тӧстег.
5 хосхарда полған сыныхтағ пiстiң кӱзiбiс пiрiгiсте полчатханын кӧзiткен, че олох сағысха кирген, Хакасияда ӧрттер сығарынаң хорғыс ам даа халча, улам часхыда. Хатап искiрчем, республиканың прай чирiнде ам ӧрттердең тоғыр алынҷа режим тоғынча. Анзы хорғыс чох поларына кирексiнiстер хатығлал парғанын кӧзiтче. Аннаңар полған на кiзiдең сурынчам: сизiктiг поларын узарадыңар паза ӧрт сығарбас правилоларға сыбыра тудыныңар!
Хайдағ даа хуруғ отты ӧртирге чарадылбинча! Ол иң аар сайбағларның пiрсi полча, аар салтарларға ағылча.
От тамызарға паза азых отнаң тузаланарға чарадылбинча арығларда паза чазыларда ла нимес, дача участоктарында даа, алынҷа туралар чирлерiнде дее (ол санда сӧп-сапты паза хуруғ отты iдiсте ӧртирi).
Туралар хырин паза дача участоктарын иптеп салыңар: хуруғ отты, кӧйҷең сӧп-сапты, оой тамылчатхан материалларны, хыйа идiп, арығлап салыңар. Ӧрттi ӱзiрҷең тирiглер тимнеп салыңар (суғлығ iдiс, хум, огнетушитель).
Ӱзiрiлбеен спичкаларны паза тамкыны тастабаңар.
Палаларға отнаң ойыннар хорғыстығ полчатханнаңар чоохтап пирiңер паза оларны кӧрбин артыспаңар.
Пiлiңер: кӧмес тее сизiктiг тудынмааны улуғ чобаға ағыларға айабас. Пiстiң полғаныбыстың нандыриинаң Хакасияның прай чуртағҷыларының хорғыс чох чуртазы палғалыстығ. Хада-пiрге тудынып, пiстiң республиканы ӧрттең хайраллаалар!
Сом Хакасия пазы Валентин Коноваловтың ВК-дағы страницазынаң
Автор :
Тiлбестеен Николай Султреков
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
