Тоғысчы профессияларҷа специалисттернi тимнепчелер
18.04.2025
Хабарлар
Финалисттер (оң саринаң): София Матишевская, Анжелика Шингареева, Лидия Чиколаева, Софья Моруденко, Ольга Чичинина Анатолий Бутенконаң хада
«Чыл узы-2025». Хакасияда ӱгредiг кирее тоғынҷылары аразында профессиональнай марығлар хыызында парчалар. Ӱр ниместе республиканың «Чыл ӱгретчiзi» адалды. Теес ортын профессиональнай ӱгредiге читтi. Пу кӱннерде «Чыл узы» марығның регион синiнiң финалы ирттi
Аны Хакасияның ӱгредiг паза наука министерствозы устаанынаң республиканың ӱгредiг тилiзi паза квалификация кӧдiрерi институды (ХакИРОиПК) иртiрче. 2025 чылда Россияның ортын профессиональнай ӱгредии 85 чылын таныхтапча. Амғы туста тоғысчы профессияларҷа специалисттернi тимнирi улуғ хайығда, аннаңар даа «Чыл узы» чылдаң чылға ӧткiн тилiп одырча. Пӱӱл марығ пизiнҷiзiн ирттi. Анда аралазарына ортын профессиональнай ӱгредiг организацияларында тоғынчатхан 34 кiзiнiң сурыныс пiчии кiрген.
Олар марығның дистанционнай оңдайнаң ирткен пастағы чардығында мастер-класстар кӧзiткеннер. Прай араласчылар чарғыҷылар санынаң пис финалисттi таллааннар. Республиканың «Чыл узы» ат ӱчӱн харбасханнар: коммунальнай хоных паза сервис техникумының ӱгретчiлерi София Матишевская, Софья Моруденко паза Хакасияның профессиональнай технологиялар, экономика паза сервис колледжiнiң ӱгретчiлерi Ольга Чичинина, Лидия Чиколаева, Анжелика Шингареева.
Марығның халғанҷы чардығы Хакасия пазы Валентин Коноваловтың алғыстас сӧстерiнең пасталған.
– Пӱӱн пiс «Чыл узы» марығның регион синiнiң салтарларын итчебiс. Пу ачыхта республикабыстың аймах кӧстеглерҷе iстенчеткен иң артых ӱгретчiлерi тоғасча. Сiрер профессияңарны пӧзiк синге олаңай ла кӧдiрбинчезер, сiрер хазнабыстың таңдағызын тӧстепчезер, специалисттернiң наа тӧлiн ӱгредiп, алнынзар хорыхпин хаалир, сидiксiнiстердең туртухпас, пасхазын позының соонҷа апар полар кiзiлернi ӧскiрчезер. Прайзыбыс пiлчебiс, ӱгредiг паза наука чох хазна, экономика, социальнай паза халых чуртас аннаң андар тилiп полбас. Сiрернiң кӱзiңернең ӱгредiгдегi наа оңдайлар чуртасха кирiлче, педагогика практикалары, ӱгредiглiг тоғыс тилiпче. Анзы чон чуртазының тиксi тилiзiне хозым полча. Сiрернiң тоғызыңарнаң палаларыбыстың хайди ӧзерi, экономиказар, ниме-ноо сығарызынзар, культуразар, науказар паза чуртастың пасха даа кӧстеглерiнзер хайдағ специалисттер килерi палғалыстығ. Тиксi чоохтаза, ӱгретчiлер чонның чуртазына паалаҷаа чох хозым итчелер. Аарлығ финалисттер, сiрернiң полғаныңар ла амох чиңiсчi полча, оой нимес таллағны иртiбiзерi iдӧк пӧзiк чидiг полча. Пу марығ устарыңны тилiдерiнде наа хаалағ ползын, Россия синiнде республикабыстаңар чоохтир оңдай пирзiн, – теен Валентин Олегович.
Iдӧк марығ араласчыларын паза оларның ӱчӱн «ағырарға» килген чииттернi, хада тоғынчатхан арғыстарын республиканың ӱгредiг паза наука министрi Анатолий Бутенко, физическай культура паза спорт министрiнiң тоғызын толдырчатхан Дмитрий Сафронов, ХакИРОиПК-ның ректоры Светлана Дмитриева удурлааннар. Ӱгретчiлернiң тимнеен тоғыстарын паалаан чарғыҷыларға кiргеннер: Хакасияның ӱгредiг паза наука министерствозының профессиональнай ӱгредiг пӧлиинiң пастығы Евгения Черных, профессияа азынада тимнир кiннiң устағҷызы Надежда Дьяченко, ХакИРОиПК-ның методизi Ольга Чмыхало, олимп резервi училищезiнiң (техникумының) методизi Татьяна Воронкова, Ағбандағы пӱдiрiг техникумы директорының орынҷызы, ирткен чылдағы «Чыл узы» марығның республика синiнiң чиңiсчiзi паза Россия синiнiң лауреады Юлия Абакумова.
Марығның «Мин – успын» тiп адалған халғанҷы чардығында ӱгретчiлерге постарынаңар, тоғыстағы чидiглерiнеңер, ӱгредiгде тузаланчатхан наа оңдайлардаңар чоохтирға киректелген. Таныхтирға кирек, араласчыларның хайзы даа чиңiске турыстыра полған, хайзының даа чидiглерi танығлығ. Полғаны ла чооғында тоғызының ӧӧнi палаа хынары полча, ол чох пiр дее ниме килiспес тiп таныхтаан. Преподавательлер студенттерiнең хада даа, постары даа аймах синнiг марығларда ӧткiн араласчаттырлар, хайзы-да пасха хазналарзар даа чӧртiр.
Кӧзiдiмге, Ольга Чичининаның студенттерi «Ландшафтный дизайн» кӧстегҷе «Абилимпикс» марығның Россия синiнде пiр ле хати сыйыхтығ орыннарға турыспааннар. Анжелика Шингареева – ӧнетiн дисциплиналар паза профессиональнай модульларның преподавательi. Аның студенттерi хакас паза орыс национальнай костюмнар тiкчелер, мода театрын тӧстееннер, кип-азах чыындыларын аймах кӧзiдiглерде, марығларда кӧзiтчелер. Оларның санында Россия синiндегi «Премия больших перемен» проект, «Россия – страна возможностей» форум, «Планета искусств» чоннар аразындағы марығ паза пасхазы даа. Килчеткен неделяда Анжелика Евгеньевна позының паза аның студентi полған, амды колледжте ӱгретчi полчатхан Ирина Тестованың кип-азах чыындыларын Хызылчарзар «Сибирский стиль» модельерлер паза дизайнерлер мариина апарча.
Чарғыҷыларға араласчылар аразында иң артығын табарға оой ла полбаан полар. Че, хайдағ даа полза, чиңiсчiнiң ады адалған – ол Лидия Чиколаева. Лидия Александровна Хакасияның профессиональнай технологиялар, экономика паза сервис колледжiнде ОБЗР предметтi апарча. Пу наа предмет, анда ӱгренҷiлер, студенттер чуртасха паза хазыхха хорғыс ағылчатхан тустарда посты орта тудынар оңдайларны ӱгренчелер, iдӧк пасталығ чаа тимненiзiн иртчелер. Мында чииттернi чир-сууна хынарға кӧнiктiрерiне улуғ хайығ салылча. Ӧнетiн чаа операциязы иртчеткен туста пу кӧстегҷе тоғысты уламох тыыдарға киректелче. СВО темазы Лидия Чиколаеваа чағын, амғы туста аның хада хонғаны ӧнетiн чаа операциязы парчатхан орыннарда служба иртче. Аннаңар даа Лидия Александровна тоғызына пар-чох кӱзiн салча. Амды ол Хакасия ӱчӱн Курскта иртер «Чыл узы» марығның Россия синiнде турызар.
Сом Илона Каковани
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
