Чиит ооллар армияа парчалар
16.04.2025
Хабарлар
Хакасиядаң срочнай чааҷы службазына войсколарзар ызылчатхан призывниктер военкоматтың плацында стройда турчалар
Чааҷы службазы. Россия президентiнiң Указы хоостыра 1 хосхардаң чааҷы службазына хығыртар часхыдағы кампания пасталғанда, республиканың чааҷы комиссариадынаң пастағы команда войсколарзар ызылған
Хас-хаҷаннаң пiстiң хазнада армияда служба иртпеен чиит оолны сын иренге санабинчатханын прайзы пiлче. Аннаңар даа амғы чиит улус чааҷы службазынаң хыйыстыра хала парарға ӧӧнiнде кӱстенминче. Улам срочнай службаның тузы пiр ле чылға тиңнелчеткенде, ағаа хоза, оларны ам чаалазығлар парчатхан «iзiг точкаларзар» ыспинчалар.
Республиканың чааҷы комиссариадының плацында чааҷыларның камуфляж кип-азаана тонандырылған 10 призывник стройда турыбысхан. Ол Хакасиядаң войсколарзар пӱӱл парҷаң пастағы команда полған. Хайди искiрген республиканың чааҷы комиссариадының орынҷызы, чааҷы службазына тимнир паза хығыртар военкомат пӧлиинiң пастығы, подполковник Евгений Волков, призывниктер хонҷых Кемеров облазындағы Юрга городсар парчалар. Анда Центральнай чаа округының Сухопутнай войсколарының частьы турча. Призывниктерге чааҷыларға киректелчеткен прай ниме-ноо пирiлген, олар, частьсар читселер, анда кем хайдағ службада поларын кӧрерлер.
Служба иртчең орын ырах нимес, пазағы кӱнде олар Юргадағы чааҷы частьында поларлар. Иирде призывниктернi Ағбанның тимiр чол вокзалында паба-iҷелерi, туған-чағыннары поездке ӱдезерлер. Команданы чааҷы частьынаң килген офицер поездтіг cлужба иртер орынзар апарар.
Кибiрге кiр парған оңдайҷа «Равняйсь! Смирно!» команда пирiлген соонда, Евгений Волков, строевой хаалағнаң чааҷы комиссарының орынҷызы, подполковник Дмитрий Тацийзер килiп, призывниктернiң войсколарзар ызылар пастағы командазы стройға турғызылғаннаңар рапортнаң искiрген. Россияның паза Хакасияның гимннерi толдырылған соонда Дмитрий Таций призывниктерзер алғас сӧстерiнең айланған:
– Пiстiң хазнада чааҷы службазы Ада чир-суубысты арачылир аарластығ обязанность полча. Прай тустарда ол чииттернi Чир-сууна хынарға, командирлернiң чооғын истерге, чааҷы дисциплиназына тудынарға ӱгретче. Чааҷы службазы сiрернiң хылииңарны тыыдарға, сын ирен полып аларға хабазар. Сiрерге Ада чир-суубысты арачылир службада пӧзiк чидiглер алғапчам! Ибдегiлерiңнi ундубаңар, пик хазых сiрерге!
Призывниктернi чааҷы службазы пасталчатханынаң Хакасия пазы адынаң алғыстаан республиканың садығлар сферазында контракт системазын иптирiнҷе хазна комитедi кнезiнiң тоғызын толдырчатхан Владимир Петров.
Iдӧк войсколарзар парчатхан чиит оолларны службаны чахсы апарарға, анда пӧзiк чидiглер кӧзiдерге алғаан Россияның «Юнармия» халых пiрiгiзiнiң региондағы пӧлиинiң штаб устағҷызы Ваган Харатян.
Мыннаң Хакасиядаң призывниктернiң пастағы командазын войсколарзар пӱӱл ысчатхан пайрамнығ мероприятие тоозылған. Ооллар стройдаң позыдылғаннар, олар уғаа ӧрчiлiг полғаннар, анзы пiстi дее ӧрiндiрген.
Чааҷы службазына хығыртар часхыдағы кампания хоостыра Хакасиядаң войсколарзар 500 азыра кізі ызылары кӧрілче. Регионның муниципалитеттерінде 13 хығыртығ комиссиязы паза республиканың пір хығыртығ комиссиязы тоғынчалар.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
