Наталья Малышеваның «хола» чидии
16.04.2025
Хабарлар
Наталья Малышева
Поғдархас. 7 – 13 хосхарда Братиславада спорт кӱрезінҷе Европа чемпионады ирткен
Пу марығларны спорт кӱрезіне хынчатхан улус чидікпин сахтаан. Европа чемпионады – чылның пастағы улуғ арға-мӧрійі паза Олимп ойыннары соондағы сыныхтағ. Ол хазналарның піріктірілген командаларында иртчеткен алызығлардаңар, кӱресчілернің узынаңар піліп алар оңдай пирче. Пӱӱл чемпионатта пас меетке 443 кізі cыххан. Кӱресчілер 33 хазна ӱчӱн турысханнар. Россияның паза Белоруссияның спортсменнері нейтральнай атлеттер чіли араласханнар. Чир-суғҷыларыбыстаң Абдулрашид Садулаевке оң полбады. Ікі хати олимп чемпионына пазох виза пирбееннер. Европада аннаң іди хорыхча поларлар чи? Алай марығ тӧстегҷілері, Садулаевнең тартызып, Россияның піріктірілген командазының кӧңнін тӱзірерге пӧгінгеннер бе? Саба сағынтырлар.
Программа хоостыра иң пурун олаңай кӱресче марығ ирткен. 8 хосхарда оолларыбыс соон сӱрістіре медальлар утханнар. Пастап Начын Монгуш (57 кг) чиңіc тутхан, анаң Ибрагим Ибрагимов (65 кг) чидиинең ӧріндірген. Ӱзінҷі алтын медальны ағылған Давид Баев (70 кг), тӧртінҷізін – Ахмед Усманов (79 кг). 97 килограмм кӧдірімде Садулаевтің орнына харбасхан Магомед Курбанов. Ол азах меетте Гиви Мачарашвилиге 2:3 саннаң утыр салған. Мачарашвили, тізең, 2024 чылдағы Олимп ойыннарының кӱмӱc призеры. Чемпионаттың ӱзінҷі кӱнінде медальлар саны хозыл парған. 61 килограмм кӧдірімде прайзын чиңіп алған Заур Угуев. Хомзынысха, Заурбек Сидаков (74 кг) ікінҷі орыннаң пӧзік кӧдіріл полбаан. Артур Найфонов (86 кг) – хола призер. Россияның олаңай кӱресте 8 медаль: 5 алтын, 2 кӱмӱс паза 1 хола.
9 хосхарда кӱресчі хыстарның теезі читкен. 2024 чылда абахай спортсменнер Европа чемпионадында постарын турыстыра кӧзіт полбааннар. Сыйыхтығ орынға Милана Дадашева ла сыххан. Ол ӱзінҷізі полыбысхан. Пӱӱл кирек хайди парыбызар ни? Кӧрігҷілер тиктең чӱрексiнтірлер. 10 хосхарда финаллар ирткеннер. Хазыр харбазығда алтын медальларны утханнар Екатерина Вербина (55 кг) паза Анастасия Сидельникова (59 кг). Надежда Соколова (50 кг) ӱзінҷі орынға сыххан. «Ағырчатхан» улустың ӧрінізі пу чир нимес.
Че Хакасия чуртағҷыларының прай хайии Наталья Малышевада ла. Арға-мӧрій тузында аның ӱс тоғазығ полтыр. Марығның тӧртінҷі чардығында ол Мария Дилоне Баезнең (Испания) харбасхан. Хакас хыс «ыырҷызын» 10:0 саннаң чиңіп алған. Че чарым финалда Наташаа оң полбаан. Ол румын чонның хызы Андреа Анаға 3:5 саннаң утыр салған. Кічіг финалда чир-суғҷыбыс Лилия Маланчукнаң (Украина) хола медаль ӱчӱн харбасхан. Малышева «ыырҷызын» тоғазығ тоозылғанҷа 11:0 саннаң чиңіп алған. Наташа – Европа чемпионадының хола призёры!
Хакас хыстың хола медальы піске алтыннаң пызыңнапча тирге чарир. Ноғадаңар? Хакас кӱресчілер Европа чемпионадының пьедесталына халғанҷызын 2017 чылда сыхханнар. Ол Наталья Малышеваныңох чидии полған. Андада пістің спортсмен ікінҷі орынға сыххан. Итсе, пӱӱл хакас абахай алтын медальға ізентір. Талаан кӧмес читпин парды. Амғы чемпионатта 53 килограмм кӧдірімде чемпион атха турысхан Мария Преволараки (Греция). Пылтыр Наталья Малышева аны Бакуда ирткен чоннар аразындағы турнирде чиңіп алған.
2025 чыл хакас кӱресчее хомай нимес иртче. Кӱрген айында ол Ярыгин турнирінде чемпион полыбысхан, Европа мариинаң хола медальлығ айланча. Наталья Малышева республиканың харбас кӧрімнерінҷе Олимп резерві спорт школазының ӱгренҷізі полча. Изебi чох таланттығ спортсменнің тренерлері – Владимир Чучунов, Леонид Чучунов паза Виталий Канзычаков.
Европа чемпионадынзар айланза, кӱреcчі хыстар алты медаль утханнар. 11 хосхарда чиңіc тутхан Ольга Хорошавцева (57 кг), Динара Кудаева (65 кг), Наталья Малышева чіли, ӱзінҷізі полыбысхан.
Халғанҷызын кибіске сыххан грек-рим кӱрезінең айғасчатхан улус. Пістің спортсменнердең Европа чемпионы атха турысханнар Эмин Сефершаев (55 кг) паза Сергей Семёнов (130 кг). Садык Лалаевтің (60 кг) хола медаль.
Россияның піріктірілген командазы медальлар санынаң прайзын ас парыбысхан. Чир-суғҷыларыбыстың 17 медаль: 10 алтын, 2 кӱмӱс паза 5 хола. Пістің чемпионнар паза призерлар пьедесталға Бувайсар Сайтиевтің омазы хоосталған футболкалығ сыхханнар. Ӱс хати олимп чемпионы пӱӱл кӧрік айында чуртастаң кинетін парыбысхан. Чӧрімге ідӧк Мария Преволараки хозылған. Ікінҷі орында парча Азербайджан. Аның 4 алтын, 2 кӱмӱс паза 7 хола медаль. Украинаның ӧмезі ӱзінҷі орында: 4 алтын паза 5 хола медаль.
Тилекей чемпионады пӱӱл Загребте (Хорватия) 13 – 21 ӱртӱнде иртер. Наталья Малышева анда аралазар тіп ізенчебіс. Ағаа наа чиңістер алғапчабыс. Абдулрашид Садулаевке виза пирген ползалар, уламох чахсы поларҷых.
Сомнар интернеттең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
