Иң артых ӱгретчi Таштып аймаанаң
16.04.2025
Хабарлар
«Чыл ӱгретчiзi» марығның чиңiсчiзi Анна Лукашевская Анатолий Бутенконаң хада
«Чыл ӱгретчiзi-2025». Хакасияда ӱгретчiлернiң 2025 чылдағы ӧӧн марии тоозылды, аның салтарлары идiлдi
Хакасияның ӱгредiг тилiзi паза квалификация кӧдiрерi институдында «Чыл ӱгретчiзi» марығның республика синiнiң халғанҷы чардығы ирткен.
Тиксi марығда 11 кiзi араласхан. Аның алнында олар, школа паза муниципальнай синнерде аралазып, чиңiсчiлер полыбысханнар. Республика синiндегi марығ iкi чардыхтаң пӱткен. Пастағызында ӱгретчiлер «Ӱгренҷiлернең чоохтазығ» паза «Урок» марығларда олғаннарнаң, чоохтазып, тоғын полчатханын, урокты амғы тустың кирексiнiстерi хоостыра иртiрчеткенiн кӧзiткеннер. Пу марығлар салтарынҷа араласчылар аразынаң пис финалист табылған: Татьяна Костякова, Ағбандағы 19 № школаның география ӱгретчiзi, Анна Лукашевская, Таштыптағы 1 № школа-интернаттың орыс тiлi паза литература ӱгретчiзi, Гульнара Аухадеева, Харатастағы 5 № школаның музыка ӱгретчiзi, Юлия Чуракова, Орджоникидзе аймааның Наа аалындағы школаның математика ӱгретчiзi, Михаил Маляров, Ширадағы 18 № школаның физкультура ӱгретчiзi.
«Чыл ӱгретчiзiнiң» халғанҷы чардығында ӱгретчiлер мастер-класстар кӧзiткеннер, профессиональнай паза ӱгренҷiлер чарғыҷылары сурығларына нандырғаннар. Анда араласчылар чон алнында чоох тут полчатханын, хада тоғынчатханнарнаң пiлiстернең алызарға тимдезiн кӧзiткеннер.
Чарғыҷылар кнезi Хакасияның ӱгредiг паза наука министрi Анатолий Бутенко полған. Iдӧк ӱгретчiлернi ӱгредiг паза наука министрiнiң орынҷызы Елена Конева, Россияның чон ӱгредии паза наука тоғынҷыларының профсоюзының Хакасиядағы организациязының кнезi Любовь Барабанова, ӱгредiг тилiзi паза квалификация кӧдiрерi институдының директоры Светлана Дмитриева, «Чыл ӱгретчiзi» марығның ирткен чыллардағы чиңiсчiлерi Александр Глухов, Николай Степанчук, Татьяна Немцева, Дмитрий Кирсанов паалааннар. Ӱгренҷiлер чарғыҷыларына Харатастағы 7 № школаның психолог-педагогика кӧстеенҷе ӱгренчеткен 9 класстың ӱс ӱгренҷiзi кирiлген.
Татьяна Костякова ӱгретчi полып тӧртiнҷi чылы iстен парир. Аның алнында ол Хакасияның техническай институдында наука-iстезiглiг лабораторияда стажёр-iстезiгҷi полып тоғынған. Анда чиит хысха олғаннарнаң кӧп тоғынарға килiскен. Лабораторияда оларға аймах мастер-класстар, тоғазығлар иртiрiлҷеңнер, наукадаңар чоохтаҷаңнар. Палаларнаң тоғынары кӧңнiме кiрҷең, ковид тузында, андағ тоғыс апарылбиныбысханда, мағаа ниме-де чидiспинчеткен чiли пiлдiрген тiп ӱлесче сағыстарынаң Татьяна Валерьевна. Андада ол школазар тоғынарға парардаңар чарадығ алыбысхан. Марығдағы мастер-клазында ол наука-iстезiглiг тоғыстың чардыхтарынаң школадағы ӱгредiгде тузаланар оңдайлардаңар чоохтаан.
– Наука iстезiглерiнде опыдым пар. Уроктарымда наука-iстезiглiг тоғыстың чардыхтарынаң тузаланчам. Андағ чардыхтар илееде, оларны прайзын олғаннарға сизiнерге оой нимес. Аннаңар мин оларны ӱгредiг-iстезiглiг тоғысха килiстiре ползын тiп пис чардыхха чар салғам. Соонаң палалар оларнаң олаңай чуртаста тузалан поларлар. Амғы туста пiстi аймах искiрiглер ибiрче. Оларның илеедезi тайма полча, сынны табарға сидiк поладыр. Аннаңар паланы ол-пу хабарға сах андох киртiнмеске, аны сыныхтап ал турарға ӱгредерге кирек. Кӧзiдiмге, олғанның алнында хайдағ-да сурығ сығыс килдi, ол пастап аны хоостыра гипотеза турғызып аларға кирек, анаң аны киречiлеп алар ӱчӱн, аймах оңдайларнаң тузаланарға: эксперименттер турғызарға, библиотеказар парып, искiрiглер тiлирге. Мындағ оңдайнаң ол хайдағ-да салтарларға килче, оларның анализiн идiп, пала суриина нандырығ таапча, – таныхтаан география ӱгретчiзi.
Татьяна Валерьевнаның чооғынаң, мындағ тоғыстың салтарлары пар. Аның ӱгренҷiлерi олимпиадаларның муниципальнай, регион синiнде сыйыхтығ орыннарға турысчалар, наука-практикалығ конференцияларда ӧткiн араласчалар. Олар удаа 8, 10 класс соонаң проекттер арачылирына географияны таллапчалар. Олғаннар федеральнай синдегi марығларда даа араласчалар. Ӱр ниместе Татьяна Костякова ӱгренҷiлерiнең хада «Атомнай урок» проектте араласхан, ӱс муң ӱгретчi аразынаң 70 полуфиналист санына кiр парғаннар.
Марығлар салтарларынҷа 2025 чылның «Чыл ӱгретчiзi» адалған. Чиңiстi Анна Лукашевская холға кирген. Iкiнҷi орында Михаил Маляров пол парған, ӱзiнҷiзiнде – Гульнара Аухадеева. Ӱгренҷiлер жюризi дипломынаң Михаил Маляровты таныхтатхан.
Сом Хакасияның ӱгредiг паза наука министерствозының пресс-службазыни
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
