Илбек Чиңіске чарыдылған чӧрiмге аймах чон хозылча
16.04.2025
Хабарлар
Аймах чон пір чӧрімде аралазарға тимде
Чыылығ. Хакасияның правительство туразында регион пазы Валентин Коновалов республикада чуртапчатхан аймах тiллiг чоннарнаң, тоғазып, «Пабаларның махачылары – оолларының ханаттары» чӧрiмнi ӱзӱргеннер
– Пӱӱл пiс Илбек Чиңiстiң 80 чылын таныхтапчабыс. Ханнығ чаада Совет Союзының аймах тiллiг паза киртiнiстiг чоны, хада-пiрге тудынып, Чир-суубысты азымахчы ыырҷыдаң арачылирға кӧдiрiлген. Оларның махачызы пic пiр ынағ чон полчатханыбысты киречiлеен. Россия президентi 2025 чылны Ада чир-суубыс арачылағҷызы чылы тiп чарлаан. Республикада Хакасияның матырлары чылын апарчабыс. Чыл пасталғаннаң республикада Илбек Чиңiске чарыдылған танығлығ мероприятиелер кӧп иртiрiлче. Пӱӱл Хакасияның правительствозы кӱстенiзiнең «Пабаларның махачылары – оолларының ханаттары» чӧрiм чуртасха кирiлдi. Ол матыр чир-суғҷыларыбысты хаҷан даа ундутпас ӱчӱн иртiрiлче. Аннаңар, аарлығ нанҷылар, халых пiрiгiстернi пу чӧрiмде ӧткiн аралазарға хығырчам, – айланған Хакасия пазы Валентин Олегович.
Чӧрiм азығ айынаң сығара тоғынча. Ол амғы тӧлге кӧк тигiр алтындағы амыр чуртазыбыс ағаларыбыстың илбек кӱзiнең пирiлгенiн чоохтапча. Оларның сылтаанда пiс пасха чонға пазындырбин чуртапчабыс. Ӧнетiн чаа операциязы парчатхан туста махачы оолларыбыс, ағаларынаң кӧзiдiм алып, iдӧк Чир-суубысты неонацисттерге типсирге пирбинчелер.
– Чӧрiмнiң пӧгiнi – хазнаның тархынына поғдархиры, Илбек Ада чаада чуртастарын пир салған матырларыбысты, Чиңiстi чағыннатхан махачы чааҷыларыбысты паза тыл iстенҷiлерiн хаҷан даа сағыста ал чӧрерi, – чыылығда чоох тутхан Хакасияның чииттер политиказы паза халых тилiзi министрi Евгения Майнагашева. – Чӧрiмге республиканың прай организациялары, учреждениелерi, халых пiрiгiстерi хозылчалар. Полған на муниципальнай пӱдiсте чӧрiм ӱчӱн нандырығ тутчатхан кiзi пар. Республикада прай 50 азыра куратор тоғынча.
Чӧрiмнiң полған на араласчызы позының матырынаңар чоохтап пирер, сӧбiре архивiнең ӱлезер оңдайлығ. Хумартхы стене «тiрiг» музейге айлан парар. Полған на сом сӧбiренiң тархынын хайраллир.
Тимде баннерлер учреждение-организацияларның чирлерiнде 5 сiлкерге теере турарлар. Анаң муниципальнай пӱдiстің устағ-пастаа кӧзiткен орыннарзар кӧзiрiлерлер. Анда олар Илбек Чиңiске чарыдылған ӱлӱкӱн мероприятиелерi тоозылғанҷа турарлар.
Iдӧк чыылығ араласчыларынзар Хакасияның национальнай паза территориальнай политика министрi Лев Сафьянов айланған:
– «Хакас Республиканың региондағы политиказы» республиканың хазна программазы хоостыра Россияның аймах тiллiг чоннарның киректерiнҷе федеральнай агентствозы (ФАДН) Илбек Чиңiстiң 80 чылына чарыдылған хысха фильмнi суурарға ахча позытхан. Ол «Победа одна на всех» адалар. Аны орындағы теле-радио компания тимнеп пастапча. Иң ӧӧнi – ол фильм «Наведи и смотри» чӧрiмнiң чардығы пол парары. Пiс республиканың 13 муниципалитедiне улуғ баннерлер тимнеп саларбыс. Андар куар-код турғызылар. Iди, смартфонны чағын тудып, фильмнi сығарып алып, кӧрерге чарир.
Iдӧк пiс нинҷе-де хысха видео сығарарға пӧгiнчебiс. Анда Илбек Ада чаадаңар прайзына таныс кибелiстернi хығырарлар. Пу мероприятиеде олғаннар хайди даа аралазарға киректер.
Россияның ФАДН-ы диаспораларнаң хада «Пiр хазна, пiр чон, пiр хумартхы» чӧрiмнi иртiрерге тимненче. Оларға хозылып, iдӧк прайзы чыылызып, матырларыбыстың хумартхы тазы тӧзiнзер чахайахтар саларға чӧп пирчем.
Прайзын сӧбiреңернең хада пу танығлығ мероприятиелерде аралазарға хығырчам.
«Пабаларның махачылары – оолларының ханаттары» чӧрiм пiр ле чылға кӧрiлбеен. Ол кибiрге кiр парарына iзенчеткенiн читiрген регион пазы. Тимде баннерлер учреждениелерде, организацияларда, предприятиелерде хайраллал турар. Полған на Илбек Чиңiс кӱнiнде оларны пiр линияа турғыс турарлар.
– Чӧрiмге тыл iстенҷiлерiн, чаа палаларын, кизек чаалазығларда, ӧнетiн чаа операциязында араласхан туған-чағыннарның сомнарын кирерге чарир. Пу уғаа улуғ тоғыс. Аны пiс, хада-пiрге тоғынып, матлама толдырып аларбыс, – теен Хакасия пазы Валентин Коновалов.
Сом Дмитрий Сунчугашевти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
