Тигiриб чааҷыларға полысча
14.04.2025
Хабарлар
Хабазығ. Автомобильде чӧрчеткен тигiриб «Центр» войсколар ӧмезiнiң тимiр чол пiрiгiзiндегi чааҷыларның кӧңнiн кӧдiрерге СВО зоназынзар Хакасиядаң килдi
Православие тигiрибi «Буханка» УАЗ автомобиль базазында тимнелген. Чааҷыларға фронтта, чааласчатхан орыннарында, Худайға пазырар оңдай пирер пӧгiннең, Хакасиядаң ызылған тигiриб частьтар паза подразделениелер аразынҷа чӧрер. Iди чӧрчеткен тигiриб ам тоғызын пастабысты. Чааҷыларның кӧңнiн кӧдiрерге паза кирек тигiриб обрядтарын иртiрерге, абыстар чағынғы неделяларда фронттың аймах участоктарынзар парарға пӧгін тутчалар. СВО зоназынзар килген кӱн абыстар, Тал пазы ӱлӱкӱнiне чарыдып, чазыдағы тигiрибде Худайға пазырғаннар. Чааҷылар, ол службада аралазып, ӱлӱкӱннiң тании полчатхан тал ағас салааларын алғаннар. Ағаа хоза абыстар чааҷыларға гуманитарнай полызығ ағылғаннар: иң пастап киректелчеткен ниме-ноолар, ӱрге хайраллалчатхан ас-тамах паза чааҷыларның чуртазын чахсыландырҷаң постың ниме-ноолары.
Автомобильде чӧрчеткен тигiриб килгенi, гуманитарнай таарлағдаң пасха, СВО зоназындағы чааҷыларға кӧңнiлерiн кӧдiрiп, оларға хабазар хоза пiр хаалағ идiлгенi пол парған. Анзы «Центр» войсколар ӧмезiнiң тимiр чол частьы чааҷыларының Худайға киртiнiс пастыра постарының хылиин тыыдар оңдай пар пол парды. Анзы чаалазығларда уғаа кирек полча.
Автор :
Тимнеен Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
