Чииттернiң пiлiстерi регионға туза паза парыс ағылча
11.04.2025
Хабарлар
Тоғазығ араласчылары
Тоғазығ. Сiрер республика поғдархазы паза пасха чииттерге кӧзiдiм полчазар тiп айланған Хакасия пазы Валентин Коновалов федеральнай форумнарда араласхан оол-хыстарзар
Хакасияның правительство туразынзар иң артых 20-ҷе чиит кiзi хығыртылған. Олар прайзы 2023-2024 чылларда федеральнай форумнарда араласханнар. Iдӧк оол-хыстар, аймах проекттер пазып, федеральнай синнең регионзар хоза ахча тартып, мында проекттерiн чуртасха кирчелер.
Хайди искiрче Хакасияның чииттер политиказынҷа паза халых тилiзiнҷе министрi Евгения Майнагашева, ирткен чылда республика федеральнай форумға 100 азыра чиит кiзiнi ысхан. Оларның проекттерiн федеральнай син пӧзiк паалаан паза оларны чуртасха кирерiне ахча позытхан. Пӱӱл дее республиканың оол-хыстары федеральнай форумнарда аралазып пастабыстылар, пастағы грант ахчазы пар.
Iди ӱр ниместе пiстiң чииттернiң проектi чиңiсчiлер санында пол парған. Аны хоостыра пу чылның iкiнҷi чардығында Илбек Ада чаа араласчылары чатчатхан сыыраттар арығлаларлар паза иптелерлер. Пу проект чарым чылға кӧрiл парған.
Маргарита Ломова Алтай аймаандағы Хубачар аалдаң. Ол олған садында воспитатель полып тоғынча, аның хайиинда олған садының иң кiчiг палаҷахтары. Ирткен чылда чиит хыс нинҷе-де федеральнай фестивальның араласчызы полған. Анда аралазып, пiлiс паза опыт алынып, воспитатель кiчiг палаларнаң хада видеонымахтар суурып пастаан. Амды пу проекттi чиит воспитатель федеральнай синде кӧзiдiге cығарча паза ӱгретчiлер форумнарында пасхазынаң пiлiзiнең ӱлесче.
Правительство туразында ирткен тоғазығда Н.Ф.Катановтың адынаң Хакас хазна университедiндегi педагогиканың тӧремiл ӱгредии институдының наука тоғызынҷа директор орынҷызы Дарья Якубенко ХГУ наука кӧстегҷе хайдағ тоғыс апарчатханын, хайдағ форумнарда араласчатханын искiрген. Iдӧк университеттiң специализi грант марығларының сидiк сариларын таныхтаан.
– Грант марығларында араласчатхан чииттер пiлче поларлар, хайди пiчiктернi тимнирге аар. Марығның тимнеглiг чардығына уғаа кӧп тус хорадылча. Iкiнҷiзi, удаа грант ахчазы тӧбiн позыдылча. Кӧзiдiмге, пiс пiр миллион салковай таныхтапчабыс, позытчалар 800 алай ба 700 муң салковай. Паза, халғанҷызы, ол сан пирiс. Я, хазна пiлерге кирек, хайдар хорадылча ол позытхан ахча, че сан пирiс идерге сидiк паза ӱрге тартыл парыбысча. Анзы грант марығларының араласчыларын майыхтырча паза пазағы хати оларның анда пазох аралазар кӧңнiлерi тӱсче, – таныхтаан Дарья Эдуардовна.
Хайди искiрген Хакасияның чииттер политиказынҷа министрi Евгения Майнагашева, ол устапчатхан министерствода гранттарҷа академия тоғынча. Андағы специалисттер грант марығларында аралазарға сағынчатхан оол-хыстарға проект пазарға, сурыныс пiчiктерiн тимнирге, сан пирiс идерге паза даа пасха кӧстеглерҷе полызарға тимделер.
Пӱӱл Хакасия ӧткiн чииттернi федеральнай форумнарға ызарын узарадар. Че мында улуғ нимес алызығлар кирiлче. Хайди чарытча Евгения Валерьевна, Россия синiнде ирткен мероприятиеде араласхан чиит кiзi, айланған соонаң, республиканың пасха оол-хыстарынаң наа пiлiстерiнең, опыдынаң ӱлезерге кирек, киректелзе, мастер-класс таа иртiр пирзiн.
Чыылығда Хакасияның иң артых, кӱлӱк чииттерiнзер регион устағҷызы Валентин Коновалов айланған.
– Россия синiнде ирткен форумнарда аралазар ӱчӱн, ciрер хатығ таллағ ирткезер паза республиканы турыстыра кӧзiткезер. Сiрернiң кӱстенiстерiң хоостыра пасхазы Хакасия таланттығ чииттерге пай регион полчатханын пiлче.
Улуғ форумнарда аралазып, сiрер проекттерiң чуртасха кирер ахчалығ хабазығ таап алчазар. Сiрер регион поғдархазы паза пасха чииттерге кӧзiдiм полчазар. Форумнарда алған опыттарың регионға туза ағылзын, – теен Валентин Олегович.
Тиксi алза, тiзең, ирткен чылда Хакасияда ирткен мероприятиелерде 15 муң азыра чиит кiзi араласхан. Пӱӱл форум кампаниязы «Чиит Хакасиядаң» пасталған. Ол регионның прай даа муниципалитеттерiнде ирт парыбысхан паза 1,5 муң азыра паланы пiрiктiрген. План хоостыра мыннаң мындар республикада улам кӧп мероприятие иртiрiлерi кӧрiлче, ол санда «Этнова», хайзы халғанҷы чылларда иртiрiлбеен, аны чииттер матап сахтапчалар.
Сом Илона Каковани
Автор :
Оксана Котюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
