Теестегі хорғыстарға тимде поларға кирек
11.04.2025
Хабарлар
Хакасия пазы Валентин Коновалов паза МЧС-тың Хакасияҷа Ӧӧн устааның пастығы Александр Мулл комиссия чыылиин иртірчелер
Комиссия чыылии. Хакасия пазы Валентин Коновалов республика правительствозының министерство-ведомстволары паза муниципальнай пӱдістер устағҷыларынаң сағыбаан саайларҷа комиссия чыылиин иртірген
Чыылығның ӧӧн сурии полған республикада суғлар чайыларына паза ӧрттер сығарына прайзына тимненері. Улам чағынғы туста Худай ӱлӱкӱннері, Хызыл нымырха паза Хара нымырха, полар. Оларда кӧп чоннығ мероприятиелер сыбыра иртiрілчелер. Оларны иптеп, хорғыс чох иртірері iдӧк кӱн суриина сығарылча. Таныхтирға кирек, пу чыылығда полған на министерство-ведомствоның устағҷызы позының сферазында аймах хорғыстарға тимненіс тоғыстары хайди апарылчатханнаңар сан пиріс тутхан.
Хайди таныхтаан Валентин Коновалов, ирткен тынағ кӱннерінде полған чир-чайаан хазырланызы республиканың хорғыс чох идер прай системазына хатығ сыныхтағ пол парған. Піс сыдасхабыс, хазыр чилнің салтарларын, ӧрттердең тоғыр прай чоннаң харбазып, сала иптеп алғабыс. Че ол пістің уйан орыннарыбысты ілезіне сығарған, хайзыларын ам, сӧӧ тартпин, табырах тӱзет саларға кирек.
МЧС-тың Хакасияҷа Ӧӧн устааның пастығы Александр Мулл хазыр чилнің сылтаанда ӧрттер тарааннаңар хысхаҷахти искірген. Аның чооғынаң, чилнің кӱзі пірее орыннарда секундада 34 метрге чит турған. Чазыларда сыххан ӧрттер табырах тарапчатханнар, олар аалларға чағдапчатханнар, туралар даа, пӱдіріглер дее, пасха даа объекттер ӧртке хабылғаннар. Чазыларда 60 ӧрт санға алылған, арығда пір ӧрт полған. Пу неделяда чилліг кӱннер турары кӧрiлче, ағаа хоза киинің чылии 27 градусха теере кӧдірілер.
Хазыр чилде кииҷе учухчатхан ниме-ноодаң, ағастардаң илееде кізі палығлатхан, ол санда ікі пала, пис кізі имнег туразына кiр парған. Прай Хакасияда 331 объект сайбалған. Амды иділген ӱрегнi комиссиялар паалапчалар, ол тоғысты табырах толдыр саларға кирек. Iдӧк сайбалған объекттерні тӱзедер, тыхтир тоғыстарны толдырар план тимнирге кирек. Хосхар айы тоозылғанҷа ӱреге кіргеннерге прай тӧлеглернi читiр пирерi кӧрілче. Аалларны иптеп, ӧрт иртірбес чолларны хатап чахсы тартарға кирек. Хысхыда тузаланылбаан суғ алҷаң орыннар ӧрт ӱзірҷеңнерге тимде ползыннар. Патруль, маневр ӧмелерін сыныхтағнаң чӧргізіңер, ӧрт ӱзірҷең тиріглер, техника прай тимде ползын. Iдӧк ам ӧрттердең тоғыр режим тоғынча, ол хайди толдырылчатханын сыныхтағда тударға кирек. Полған на аал хайығда тудылзын, ілезіне сығарылған читпестерні табырах тӱзедерге кирек.
Хакасияның ГО, ЧС паза ПБ хазна комитедiнің кнезі Владимир Карамашевтің искіриинең, чазыларда иң улуғ ӧрттер Алтай, Пии, Боград, Ағбан пилтірі аймахтарында, iдӧк Саяногорск хыринда полғаннар. Пӱдіріглер Ағбанда, Харатаста, Саяногорскта паза илееде аймахта кӧйгеннер. Иң кӧп ӧрт Ағбан пилтірі аймаанда ӱзiрілген. Ӧрттерні ӱзiрерінде 1777 кізі паза 328 техника араласхан. Iдӧк чуртағҷылар паза волонтерлар чахсы полысханнар. Чилліг кӱннер ам даа турар, аннаңар прайзына ӧрт сығарбас правилоларға тудынарға кирек. 5 хосхардаң республикада ӧрттердең тоғыр режим тоғынча, азых отнаң тузаланарға пір дее чарадылбинча. Ӧрт сығарбас пӧгіннең, чир участоктарының прай ээлеріне туралар хыриндағы чирлернi сӧп-саптаң паза хуруғ ӧзімнердең арығлап саларға кирек.
Амды хар хайылғаннаң палғалыстығ тустың ікінҷі чардығы иртче. Ағбан суғдағы пус Абаза хыринда паза Райковтар аалы хыринда иніп пастабысты. Абазазар андағы киректерні сыныхтағда тударға МЧС-тың тоғысчы ӧмезі парыбысхан. Суғлар чайыларының иң улуғ сині, сілкер айы тоозылчатса паза хандых айы пасталчатса, полча. Ағаа iдӧк тимде поларға кирек.
Чыылығда пасха даа кӧп устағҷы чоох тутхан.
– Муниципальнай пӱдістер пастарына Хызыл нымырха паза Хара нымырха Худай ӱлӱкӱннерiн, iдӧк сiлкер айындағы ӱлӱкӱннерні хорғыс чох, иптеп иртірібізерiне алынҷа хайығ саларға чӧп пирчем. Патруль, маневр ӧмелерін сыныхтағнаң чӧргізіңер. Олар чазыларда, арығларда сыхчатхан ӧрттерні тузында iлезiне сығар турзыннар. Ӧӧні – ӧрттерні аалларзар таратпасха. Пазох хоза таныхтапчам, республикада ЧС режимі паза ӧрттердең тоғыр режим тоғынчалар, постың чирлерінде дее от тамызарға чарадылбинча, – теен Хакасия пазы.
Iдӧк Валентин Коновалов позының орынҷызы Дмитрий Бученикке, ӧрттерде чурттарын чідiрген кізілернең алынҷа тоғазып, тӧлег читірер сурығны чарат саларға чахығ пирген.
Cом Равиль Дзязькони
Автор :
Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
