Нинҷе кирек, анҷа хабазарбыс
04.04.2025
Хабарлар
Тимiр пес хабыстырчатхан туста
Матырлар тузы. Харатастағы тағ-пӱдіріг техникумының студенттері 2022 чылдаң сығара СВО чааҷыларына полысчалар: тимір хабыстырҷаң усха ӱгренчеткен ооллар чааҷыларға тимір пестер тимнепчелер
Ӱс чыл мының алнында Харатастағы тағ-пӱдіріг техникумының ӧткін тоғынҷылары ӧнетін чаа операциязында араласчатхан чааҷыларға хайдағ оңдай пар, аннаң полыс пирерге кирек тіп чаратханнар. Олар республикадағы гуманитарнай полызығ чыырынаң айғасчатхан ӧмелернең палғалысханнар. Паза техникумда #мывместе чӧрімнің штабы тӧстелген. Аннаң техникум устағҷызының ӱгредіг паза сығарыс тоғызынҷа орынҷызы Андрей Васильев устап сыххан. Пастап ӱгретчі студенттернең хада практика тузында сапёрларға киректелчеткен тирігні тимнеҷеңнер. Сапёрлар аны «хоосха» тіп адапчаттырлар. Аның полызиинаң чирде чара чачырабаан гранаталарны таапчалар. Ол «хоосханы» тимнеп, чииттер тимірні аймах оңдайнаң хабыстырарға ӱгренгеннер.
Олох арада техникумның ӱгретчілері, гуманитарнай полызығ чыырынаң айғасчатхан ӧмелернең палғалызып, чааҷыларға киректелчеткен ниме-нооны СВО-зар ысханнар. Пір чыл пазынаң техникумдағы штаб чааҷыларға аймах тимір пестер тимнеп сыххан. Оларны чиит ооллар ідӧк практика тузында Андрей Владимировичтiң устаанынаң тимнееннер. Андрей Васильевтiң таниинаң, ооллар ол кирекнең пос кӧңнінең айғасчалар. Ол пестерні тимнепчетсе, студенттернің устары кӧдірілче. Анда аймах чардыхтарны орта піріктірерге оңнирға кирек нооза. Iдӧк чииттер опыт алынчалар паза полғаны ла постың тоғызын уламох чахсы идерге кӱстенче.
– Пір пестi тимниріне ӱс занятие парыбысча. Пастап студенттер тимірні кирек синҷе кисчелер. Соонаң аны хабыстырар тоғыстарға тимнирге кирек. Анаң ӱзінҷі занятиеде ле ооллар тимірні хабыстырчалар, – теен ӱгретчі.
Чоохтирға кирек, техникумдағы студенттернің холынаң иділген пестер ӧнетін чаа операциязында араласчатхан чааҷыларға сыбыра ызылчалар. Чиит улус, пістің иреннер соохха тоңмазын тіп, тоғызын ӱс чыл тохтатпинча. 2025 чыл пасталғаннаң сығара техникумның ӧмезі 6 тимір пес СВО-зар ызыбысхан. Ідӧк алынҷа сурыныс хоостыра тӧрт тимір пес Таштып аймаандағы гуманитарнай полызығ чыыпчатхан орынзар апарылған. Паза узахнаң одынҷаң 49 кічіг пес кӧні чааҷыларның частьтарынзар ызылған.
Хыстар даа андағ чахсы киректең хыйа турбинчалар. Хайди таныхтапча техникум устағҷызының ӱгредіг паза воспитательнай тоғысча орынҷызы Елена Самарина, общежитиеде чуртапчатхан хыстар чааҷыларға носкилер палғапчалар. Олар ідӧк гуманитарнай полызыға кирілчелер. Ӱр ниместе техникумның ӱгретчілері пір чааҷының сурынызы хоостыра тепловизорға ахча чыыптырлар. Амды ол тиріг ӧнетін чаа операциязынзар ызылтыр.
Пу полызығлығ тоғысты техникумның ӧмезі аннаң андар апарарға пӧгінче. Чааҷыларыбысха нинҷе кирек полар, анҷа пес тимнирбіс тіп чоохтапчалар аның чағбан чӱректіг ӱгретчілері.
Сом Харатастағы тағ-пӱдiрiг техникумының архивiнең
Автор :
Ольга Томочакова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
