Дартс ойнапчатхан Рита
04.04.2025
Хабарлар
Маргарита Кулакова (ортызында) ӧӧрелері Карина Сенотрусованаң (сол саринаң) паза Сайора Кулумаеванаң марығ соонда
Спорт. Хакас хыс Маргарита Кулакова II курстаң дартс ойнапча. Пӱӱл Сибирь чемпионадында ол Хакасияа хола медаль ағылған
Амғы туста Хакасияда дартс иң табырах тиліпчеткен спорт кӧрімнерi санына кірче. Федерация 2022 чылда ла тӧстелген. Хысхаҷах тус аразына пірігіс илееде чидіге читті. Спортсменнер, аймах марығларда аралазып, нормативтер толдырчалар. 2025 чылның азығ айында федерация Ағбан пилтірі поселокта дартсча Сибирьнің первенствозын паза чемпионадын иртiрібіскен. Арға-мӧрійде читі регионның дартсменнері кӱстерін сынааннар. Тиксі алза, 200 кізі. Пу кӱннерде, тізең, Хакасияның саарбахтары Россия первенствозында араласханнар. Турнир Сочиде ирткен. Чир-суғҷыларыбыс медальлар чох халған даа ползалар, мында хомзынҷаң ниме чоғыл. Чииттерібістің чиңістері алнында.
Пӱӱнгі кӱнде пістің республикада дартснаң 80-ҷа cпортсмен айғасча. Кіннерге Ағбанны паза Асхысты санирға чарир. Че пастағы туста андағ полбаан. Секцияа нинҷе-де ле кізі чӧрген, оларның санында хакас хыс Маргарита Кулакова. Абахай Ританың тӧреен чирі – Шира аймаа. Итсе, чир-суғҷыбыс кічігдең Ағбанда чуртапча. Таныхтирға кирек, Рита – тоң хакас. Аның фамилиязы «хулах» сӧстең пӱткен. Хакас оңдайынаң ударение ікінҷі cлогка тӱзерге кирек. Кулаковтар – арам учурапчатхан хакас фамилия. Чоныбыстың тархынында хасхы Никита Кулаковтың ады халған. Ол 1919-1920 чылларда Боград паза Шира чирлерінде хайынған осхас.
Рита спортнаң 7-ҷі класста танысхан. Тыс пілбес хызыҷах ікі чылҷа регбиде кӱзін сынаптыр. Ол чоохтапча:
– Мин Ағбанның 2 № школазында ӱгренгем. Школада тренер Анатолий Сергеевич Мухин регбиҷе секцияны апарған. Хада ӱгренген арғыстарым мағаа кӱзің чоғыл, ӧскен сының пӧзік нимес тіп хатхырарға хынҷаңнар. Оларнаң чараспин, секцияа пазын салғам. Тренер тоғыр полбаан. Ікі чыл аразына тыып парыбысхам. Хай-хай табырах чӱгӱр сыххам. Пістің команда пӧзік чидіглерге читкен тіп чоохтап полбаспын. Пір хати ӧменең Татарстанзар марыға чӧргебіс. Турнир Хазан городта полған. Анатолий Сергеевич пісті ӧӧнінде Сибирьҷе ал чӧрҷең. Ол туста регби мағаа кӧп ӧрініс ағылҷаң. 9-ҷы класста сыныхтағлар тудар тус читкенде, спортнаң айғазарын тохтадыбысхам.
Маргарита наа кізілернең танызарға, оларнаң чоох алызарға хынадыр. Аннаңар ХГУ-да журналистика специальнозын таллап алған. Вузта физкультура уроктарын Роман Лежнин апарған. Хакас абахай ікінҷі курста ӱгренчеткенде, Роман Александрович студенттерні дартс ойнирға хығырған. Чир-суғҷыбыс чооғын узаратча:
– Киҷее ле полған осхас. Физкультура ӱгретчізі дротиктер тастирға хығырғанда, сағын салғам: «Дартс тынаға сых парған улусха кӧрілген нимес пе? Чиит кізі аннаң хайди айғазар?» Анаң сизін салғам, чуртазым саңай ӱгредігдең не пӱтче, хынчатхан киреем чоғыл. Чахсы сағынып алып, секцияа пар килерге чаратхам. Роман Лежнин арғызы Евгений Кызласовнаң хада тоғынчатхан. Кызласов мині дартс оңдайларынаң таныстырған, чыдаҷахтар пирген. Дротиктерні тастирға оой полбиндыр. Анзынаң пу спорт кӧрімі хынығ. Секцияа ікінҷі хати килгем. Тӱрчедең Роман Александрович ХГУ-ның институттары аразында турнир чарлабысхан. Институт ӱчӱн турызып, марығлазарға кӧңніме кірген. Ол тустаң дартс ойнапчам.
Маргаританың чооғынаң, дартста чичең харахтығ ла нимес, ідӧк пик хуйахтығ паза табырах сағыстығ поларға кирек. Спортсменнер, чыдаҷахтарны таңмаа хази тастап, саннар чыыпчалар. Чииттернің кӧбізі, калькуляторнаң тоғынарға кӧнік парып, саннарны сағыста пӧк полбин порастанчаттыр. Ританың андағох сидікcініс полған. Ол, тренировкаларға тӧреміл чӧріп, узын тиліткен, саннарны табырах пӧк сыххан. Чир-суғҷыбыс дартсты шахматха тӧӧйлепче. Дартсмен, пурунғыда тӧстелген ойындағы чіли, нинҷе-нинҷе чӧріске алнынзар сағынарға кирек. Хакас хыс таныхтапча:
– Дартста партиялар «лег» тіп адалчалар. Пас меетке ікілер кізі cыхча. Олар тӧрт легке теере марығласчалар. Полған на легте, ӱс чыдаҷахты таңмаа тастап, саннар чыыпчазың. Ідӧк ойынны орта тоос саларға кирек. Дартста арға-мӧрій иртеннең иирге теере парча. Ӱр нимеске ле пос салыныбыссаң, майых сыхчазың, кирек чох сағыстар кірчелер. Аннаңар пис час ойнапчазың, пис час тудын. Пасха оңдайнаң утып полбассың.
Дартс – чӱрексіністіг ойын. 2023 чылда Хызылчар крайының чемпионадында аралазарға ӱлӱс тӱскен. Азах меетке сығып алғанымны сизінмин халғам тирге чарир. Финалда Зеленогорск городтаң пӧзік устығ спортсмен Татьяна Мишинанаң ойнаам. Сан полған на легте алысхан. Пастап полған 0:1, мин утырчам, анаң 1:1. Халғанҷы лег халған, сан – 3:3. Ікізібіс тее таңманың кирек секторларынзар тастап полбиныбысхабыс. Аның командазы, мині чабыра пазарға пӧгініп, хысхыр сыххан. Арғыстарым зеленогорсктағылардаң халбинчалар. Позымны чадап амырадып, халғанҷы чыдаҷахты кирек секторзар тастабысхам. Ӧрінізім пу чир полбаан. Ол алтын медаль – минің пастағы улуғ чидиим.
Маргарита Кулакова пір ле хати нимес Сибирь, республика синінде иртчеткен марығларда чиңістер тутхан, сыйыхтығ орыннарға сыххан. Спорт узына кандидат нормативін хакас хыс пылтыр Сибирь чемпионадында толдырыбысхан. Рита паза аның ӧӧрезі Карина Сенотрусова ікілер марығда Хакасияа хола медаль ағылғаннар.
Чир-cуғҷыбыс улуғ поғдархаснаң Хакасияда ирткен Сибирь чемпионадын сағысха кирче. Пістің республика пӱӱл дартсча СФО марығларын пастағызын на удурлаан. Тимненіс нинҷе-нинҷе ай парған. Пірігіcтегілер Роман Лежниннің устаанынаң арға-мӧрійні пӧзік синде иртiрібіскеннер. Турнирні пайрамни азып, федерация марығласчатхан улусты хакас чонның кибірлерінең, культуразынаң таныстырарға кӱстенген. Салтарлардаңар чоохтаза, Хакасияның командазы (саарбахтар, чииттер паза улуғлар) 26 медаль утып алған: 4 алтын, 5 кӱмӱс паза 17 хола.
Амғы туста Рита Кулакова РТС телерадиокомпанияда хабарҷы полып істенче. Андар 22 частығ спортсмен ХГУ-ны тоосхан соонда тоғысха кірген. Чиит хыстың ӧӧн хомзынызы – тӧреен тілін пілбинчеткені. Чир-суғҷыбыс курстарға чӧртір, че кирек сидік арах парча. Маргарита аннаң андар дартс ойнирға пӧгінче. Пу спорт кӧрімі хакас хысха наа кізілернең танызарға, пасха регионнарда пол килерге оңдай пирче нооза. Россияның спорт узына нормативті толдырыбысса, уламох чахсы полар.
Сом Маргарита Кулакованың архивiнең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
