Хорғыстарға прайзы тимде ползын
04.04.2025
Хабарлар
Хакасия пазы Валентин Коновалов видеоселектор пастыра чыылығ иртірче
Селекторҷа чыылығ. Хакасия пазы Валентин Коновалов муниципальнай пӱдістер устағҷыларынаң суғлар чайыларынаң паза ӧрттер сығарынаң хорғыстығ тусха тимненіс тоғыстары хайди апарылчатхан сурығҷа чыылығ иртірген
Чыылығның тоғызын пастап, Валентин Коновалов аның араласчыларының хайиин республикадағы чазыларда ӧрттер сыхчатханы ӧсчеткеніне тартхан. Андағ ӧрттер сыхчатханын тузында ілезiне сығарып, оларны таратпас, улам аалларға чағыннатпас тоғыс апарарға кирек.
Хайди искірген Хакасияның ГО, ЧС паза ПБ-ҷа хазна комитедінің кнезі Владимир Карамашев, республикада хар хайылып пастабысханның пастағы чардығы тоозыл парды. Чазыларда хар ам даа хайылча. Аның хайылған суу Алтай, Пии, Таштып аймахтарындағы 3 чол кизіре аххан. Харатаста 47 тура участогынзар суғ кірген. Чабыс орыннарда суғ ам даа кірерге айабас. Харатастың устаа хомай тоғынчатханын таныхтирға кирек. Ам 2-ҷі чардыхта Ағбан суғдағы пус ин сығарын сағирға кирек, азынада кӧріснең ол 9 хосхарда иніп пастир. Ағбан паза Абаза хыриндағы пус чара чачырадылған. Муниципалитеттер устағҷыларына тимде поларға кирек.
Ӧрттердеңер чоохтаза, пу чыл пасталғаннаң сығара чазыларда 43 ӧрт ӱзірілген. Пу айның пастағы 10 кӱнінде чылығ нормада полары кӧрілче, ікінҷі 10 кӱнінде нормадаң 2 градусха чылығ полар, ӱзінҷі 10 кӱнiнде – 5 градусха чылығ. Чазыларҷа патруль, маневр ӧмелері сыбыра сыныхтағнаң чӧрчелер. Ӧрттер сығарынаң хорғыстығ тус пасталчатханнаңар чарлағ пирілген, амды ӧрт сығарбас правилоларны сайбаан кізілер административнай паза уголовнай нандырыға тартыларлар.
Хакасияның чир-чайаан ис-пайы министрі Владимир Лебедев суғлар чайыларына гидротехническай пӱдiріглер (ГТС) хайди тимнелгеннеңер чоохтаан. Аның искіриинең, республикадағы прай дамбалар сыныхталған, олар суғлар чайыларына тимделер. Инженернай арачыланыстың устаа прай ГТС-тарны сыныхтағда тутча.
Республиканың ағас хонии министрі Олег Матвиенконың чооғынаң, пӱӱл арығларда ӧрттер сыхханы таныхталбаан. Лесничестволарның тоғынҷылары паза техниказы iдӧк тимде. Палғалыс тутчаң дежурнай пункттар тоғынчалар, патруль ӧмелерi сыныхтағнаң чӧрчелер. ГСМ резерві тимнелген, ӧрт иртірбес полосалар нааҷылалчалар, ӧрт ӱзірҷең тирiглернiң тимненізі сыныхталған. Арығлар хыринда ӧрт сығарбастаңар искірігліг танығлар турғызылған.
Абаза город пазы Валентина Филимонова паза Ағбан пилтірі аймааның пазы Елена Егорова постарының чирлерінде суғлар чайыларынаң паза ӧрттер сығарынаң хорғыстығ тусха тимненіс тоғыстары хайди апарылчатханнаңар искіргеннер. Валентина Филимонованың чооғынаң, хорғыстығ орыннарда дежурнай посттар хараа-кӱнӧрте тоғынчалар, иблеп чӧріп, чуртағҷыларнаң профилактика чоохтазығлары апарылча, МЧС-наң палғалыс тудылча, чонны, кирек полза, ӱр нимеске кӧзірер пункттар городта тимнелген.
Елена Егорова аймахта полған ӧрттердеңер, оларда мал кӧй парғаннаңар искірген. Iдӧк хайдағ профилактика тоғызы апарылчатханнаңар, хорғыстарға тимненчеткеннеңер чоохтаан.
МЧС-тың Хакасияҷа ГУ-зының пастығы Александр Мулл устағҷыларның хайиин православие ӱлӱкӱннерін, Тал пазын, Хызыл нымырханы, Хара нымырханы, иптіг иртірiбізердеңер чоохтаан. Хайди ол таныхтаан, ааллардағы сыыраттарны хуруғ ӧзімнердең арығлап саларға, ибіре ӧрт иртірбес полосалар тимнирге кирек. Андағ полосалар прай ааллар ибіре тартыл парзын, иргілерні нааҷылап саларға киректелче.
Хакасия пазының орынҷызы тоғызын толдырчатхан Дмитрий Бученик iдӧк муниципалитеттернің прай устағҷыларынзар хорғыстарға тимде поларға айланған. Чазыларда хуруғ отты ӧртепчеткеннерні тохтадардаңар чоохтаан. Андағ тоғысты МВД тоғынҷыларынаң хада апарарға кирек.
– Муниципальнай пӱдістернің прай устағҷылары, аймах хорғыстарға тимненіс хайди апарылчатханын сыныхтағда тудыңар, чазыларҷа, арығларҷа патруль, маневр ӧмелерін сыныхтағнаң чӧргізіңер. Ӧрт сыхчатханын тузында ілезiне сығарып, ағаа тарап парарға пирбеңер. Аал чӧптерінең, аал хонии предприятиелерінең хада-пірге тоғыныңар, ӧрт иртірбес полосалар ааллар ибiре тимде ползыннар. Ӧрт ӱзірерге суғ алҷаң орыннарның, ГТС-тарның тимдезін сыныхтағда тудыңар. Суғ чайылчатханнаңар, ӧрт сыхчатханнаңар правительстваа паза кирек ведомстволарға тузында искір турыңар. Чоннаң тоғыс апарыңар, палаларға хайығ салыңар. Сизіктiг полыңар. Хорғыстарға прайзы тимде ползын, – теен Хакасия пазы.
Сом Хакасия пазы Валентин Коноваловтың ВК-дағы страницазынаң
Автор :
Николай Султреков
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
